ཕྱི་ལོ་ ༢༠༢༠ ཟླ་ ༧ ཚེས་ ༥ རེས་གཟའ་ཉི་མ།
༄༅། །ཕྱི་ལོ་ ༢༠༢༠ ཟླ་ ༧ ཚེས་ ༤ རེས་གཟའ་སྤེན་པའི་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཐེ་ཝན་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩིའི་མཛད་སྒོའི་ཐོག་གསུང་བཤད་གནང་དོན།
ཐེ་ཝན་སྐུ་ཚབ་དོན་གཅོད་ཀྱིས་གཙོས་སྐུ་མགྲོན་ཡོངས་ལ་འཚམས་འདྲིའི་བཀྲ་ཤིས་བེད་ལེགས་ཞུ་རྒྱུ་ཡིན། ད་རེས་འཛམ་གླིང་ཡོངས་ལ་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་བཞིན་ཡོད་ཀྱང་། དམིགས་བསལ་ཐེ་ཝན་དུ་དངོས་སུ་ཚོགས་ཁང་ནང་དུ་མི་མང་འདུ་འཛོམས་ཀྱིས་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་ཐུབ་པ་ནི་གཞན་དང་མི་འདྲ་བ་ཆགས་ཀྱི་ཡོད་སྟབས། ད་ལམ་ཚོགས་ཁང་དུ་ཕེབས་པའི་མང་ཚོགས་དང་། དེ་བཞིན་དྲ་ལམ་བརྒྱུད་ཐད་སྲིང་གཟིགས་མཁན་དང་ཐེ་ཝན་དུ་ཡོད་པའི་བོད་ཀྱི་གྲོགས་པོ། བོད་དོན་རྒྱབ་སྐྱོར་བ། ནང་ཆོས་རྗེས་འབྲང་བ་སོགས་ཚང་མར་ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་འདི་བཞིན་༸རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་དགོས་དོན་ནི། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལས་ལྷག་པ་བོད་མི་རྣམས་ལ་བཀའ་དྲིན་ཆེ་བ་སུ་ཡང་མེད། ༸གོང་ས་མཆོག་ནི་ང་ཚོའི་ཕ་མ་ཙམ་མ་ཟད། རྩ་བའི་བླ་མ་རེད། ཚེ་འདི་ཕྱི་གཉིས་ཀྱི་སྐྱབས་གནས་ཡིན་སྟབས། ༸རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་ནི་འོས་ཤིང་འཚམ་པ་ཞིག་ཆགས་ཀྱི་ཡོད།
ད་ལན་ཐེ་ཝན་ནང་མང་ཚོགས་འདུ་འཛོམས་ཀྱིས་༸སྐུའི་འཁྲུངས་སྐར་སྲུང་བརྩི་དང་། ཕྱོགས་མཚུངས་ཐེ་ཝན་ཡོངས་ནས་དུས་རྟག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་དང་བརྩི་བཀུར་ཞུས་དང་ཞུ་མུས་ཡིན་པ་མ་ཟད། བོད་དོན་ལ་རྒྱབ་སྐྱོར་གནང་བར་འཚམས་འདྲི་ཡོད། ཅེས་གསུངས། །
