ཕྱི་ལོ་ ༢༠༢༠ ཟླ་ ༧ ཚེས་ ༩ རེས་གཟའ་ཕུར་བུ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༧ ཚེས་ ༨ ལྷག་དཀར་ཉིན་མོར་སྐབས་བཅུ་པའི་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བའི་གསར་འགོད་ལྷན་ཚོགས་བསྐོང་ཚོགས་གནང་ཡོད།
དེ་ཡང་ཐོག་མར་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་གྲོས་ཚོགས་འཐུས་མི་སྐུ་ཞབས་ཧྥི་རེ་ཌི་ལིམ་ Freddy Lim ལགས་ཀྱིས་ཚོགས་པ་གསར་འཛུགས་གནང་བའི་བརྒྱུད་རིམ་དང་དགོས་དམིགས་སོགས་ངོ་སྤྲོད་གནང་དོན། གྲོས་ཚོགས་སྐབས་དགུ་པའི་དུས་བོད་དོན་རྒྱབ་སྐྱོར་ཚོགས་པའི་ནང་གྲོས་ཚོགས་འཐུས་མི་དེ་ཙམ་མང་པོ་མེད་པ་དང་། ལྷག་དོན་སྲིད་དོན་ཚོགས་པ་རེ་གཉིས་ཀྱི་གྲོས་ཚོགས་འཐུས་མི་ལས་མེད། ད་རེས་སྐབས་བཅུ་པའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ནང་སྲིད་དོན་ཚོགས་པ་ཚང་མའི་སྐུ་ཚབ་ཡོད་པ་མ་ཟད། ཁྱོན་གྲོས་ཚོགས་འཐུས་མི་ ༤༦ ནས་ཐོ་འགོད་མཉམ་ཞུགས་གནང་ཡོད་སོགས་གསུང་།
མཇུག་ཏུ་ཁོང་གིས་དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་། བོད་མི་མང་སྤྱི་འཐུས་ཀྱི་ཚོགས་གཙོ་མཆོག་གི་མཚན་ཐོག་ནས་བོད་དོན་རྒྱབ་སྐྱོར་ཚོགས་པ་གསར་འཛུགས་ལ་འཚམས་འཕྲིན་གནང་འབྱོར་བྱུང་བར་ཐུགས་རྗེ་ཆེ་ཞུས་རྗེས། ༸གོང་ས་མཆོག་གི་སྐུའི་འཁྲུངས་སྐར་ལ་འཚམས་འདྲི་ཞུ་ཆེད་གྲོས་ཚོགས་འཐུས་མི་རྣམ་པས་༸གོང་ས་མཆོག་གི་སྐུ་པར་ལ་མཇལ་དར་ཕུལ་བ་དང་། སྐུ་ཚེ་བརྒྱ་ཕྲག་བཞུགས་པའི་སྨོན་འདུན་ཞུས།
སྐུ་མགྲོན་གཙོ་བོ་ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ངོ་སྤྲོད་གནང་དོན། ཕྱི་ལོ་ ༡༩༥༠ ནང་རྒྱ་གཞུང་དང་བོད་དབར་ཞི་བའི་ཆིངས་དོན་བཞག་ནས་རྒྱལ་ཁབ་གཅིག་ལ་ལམ་ལུགས་གཉིས་ལྟ་བུ་རེད། འོན་ཀྱང་ལོ་གྲངས་བརྒྱད་མ་ཟིན་གོང་ཕན་མེད་དུ་གྱུར་བ་རེད། བོད་མི་བཙན་བྱོལ་དུ་གྱར་ནས་ལོ་དྲུག་ཅུ་བརྒལ་ཟིན་པ་རེད། རྒྱ་གཞུང་གིས་བོད་དང་། ཧོང་ཀོང་། ཐེ་ཝན་བཅས་ལ་འཛིན་པའི་སྲིད་བྱུས་ལྟར། ང་ཚོ་ཚང་མ་བཙན་པོ་དབང་གཤེད་དེར་གཅིག་མཚུངས་གདོང་ལེན་བྱེད་དགོས་ཀྱི་ཡོད་པས། ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་བཙུགས་པ་དེ་དུས་ལ་བབ་པ་ཞིག་རེད་སོགས་གསུང་།
ཚོགས་ཞུགས་གནང་མཁན་ཡོངས་ལ་གངས་ལྗོངས་དེབ་ཕྲེང་ ༤༠ སྟེ་ཐེ་ཝན་དོན་ཁང་བཙུགས་ནས་ལོ་ ༢༠ འཁོར་བའི་བརྙན་དེབ་རེ་ཕྱག་རྟགས་ཕུལ་ནས་མཉམ་དུ་དྲན་རྟེན་པར་ལེན་རྗེས། གསར་འགོད་ལྷན་ཚོགས་ཐོག་ཕེབས་པའི་གྲོས་ཚོགས་འཐུས་མི་བདུན་དང་། བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན། ཐེ་སྡོད་བོད་རིགས་ཚོགས་པའི་ཚོགས་གཙོ་བཅས་ནས་གསུང་བཤད་གནང་རྗེས། གསར་འགོད་པས་༸གོང་ས་མཆོག་ཐེ་ཝན་ནང་ཆིབས་སྒྱུར་སོགས་དང་འབྲེལ་བའི་དྲི་བ་ཁག་ལ་དོན་གཅོད་ཟླ་བ་ཚེ་རིང་ལགས་དང་། གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཧྥི་རེ་ཌི་ལིམ་ལགས་ཀྱིས་གསལ་བཤད་དང་ལན་འདེབས་གནང་སྟེ་གསར་འགོད་ལྷན་ཚོགས་མཇུག་སྒྲིལ་གནང་།
སྤྱིར་ཐེ་ཝན་གྲོས་ཚོགས་སྐབས་བརྒྱད་པའི་དུས་གྲོས་ཚོགས་འཐུས་མི་ལྕམ་ཤའོ་མེའི་ཆིང་ལགས་ཀྱིས་སྣེ་འཁྲིད་དེ་བོད་དོན་རྒྱབ་སྐྱོར་ཚོགས་པ་ཕྱི་ལོ་ ༢༠༡༢ ཟླ་ ༦ ཚེས་ ༢༨ ཉིན་གསར་བཙུགས་གནང་བའི་ཁྱབ་བསྒྲགས་གནང་བ་དང་། གྲོས་ཚོགས་སྐབས་དགུ་པའི་བོད་དོན་རྒྱབ་སྐྱོར་ཚོགས་པ་ཕྱི་ལོ་ ༢༠༡༦ ཟླ་ ༡༠ ཚེས་ ༧ ཉིན་དབུ་འབྱེད་མཛད་སྒོའི་ཐོག་བོད་མི་མང་སྤྱི་འཐུས་ཚེ་རིང་ལྷ་མོ་ལགས་དང་། བློ་བཟང་གྲགས་པ་ལགས་རྣམ་གཉིས་མཉམ་ཞུགས་གནང་ཡོད་པ་བཅས། །
