ཕྱི་ལོ་ ༢༠༢༠ ཟླ་ ༧ ཚེས་ ༥ རེས་གཟའ་ཉི་མ།

༄༅། །འདི་གར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༧ ཚེས་ ༣ ནས་ ༤ བར་ཉིན་གྲངས་གཉིས་རིང་ཌལ་ཧོར་ཕུན་ཚོགས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་རབ་བརྟན་ཚེ་རིང་ལགས་དང་། ཚབ་གསར་ས་གནས་འགོ་འཛིན་མེ་རི་སྐྱབས་ལགས་གཉིས་དབར་ལས་འགན་རྩིས་སྤྲོད་རྩིས་ལེན་གནང་ཡོད། དེ་སྐབས་རྩིས་སྤྲོད་རྩིས་ལེན་གྱི་ལས་དོན་ལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་ཏུ་ནང་སྲིད་ཟུང་དྲུང་བཀྲིས་བདེ་སྐྱིད་ལགས་སྤྲོད་དཔང་གིས་འགན་འཁུར་བཞེས་ཐོག་སྔ་དྲོ་ཆུ་ཚོད་   ༩  ཐོག་ས་འགོ་གསར་རྙིང་ནས་བཟོ་ཚོགས་ཀྱི་ཚོགས་ཁང་དུ་སྤྱི་ནོར་༸གོང་ས་༸སྐྱབསམགོན་ཆེན་པོ་མཆོག་གི་བཞུགས་ཁྲིར་མཇལ་དར་འབུལ།

དེ་རྗེས་ཆུ་ཚོད་ ༩།༡༠ ཐོག་ས་འགོ་དང་བཟོ་འགོ་གཅིག་ལྕོགས་ཀྱི་བདག་དབང་དུ་ཡོད་པའི་རྩ་འཛིན་གྱིས་གཙོས། ལས་ཁུངས་ཀྱི་ཡིག་སྣོད་རྩིས་ལེན་རྩིས་སྤྲོད་དང་། ས་འགོའི་ལས་ཤོག་གི་ཅ་དངོས་རྩིས་སྤྲོད་རྩིས་ལེན་གནང་། ལས་དོན་འཇུག་སྐྱོང་བྱ་དགོས་ཁག་ངོ་སྤྲོད་འགྲེལ་བརྗོད་གསལ་བཤད་གནང་། ས་འགོ་ལས་ཁུངས་ཀྱི་ལས་དོན་རྩིས་ཁྲ། དངུལ་རྐྱང་དངུལ་ཁང་ནང་དངུལ་འབོར་ཇི་ཡོད། བཟོ་གྲྭ་དང་། ས་གནས་འཕྲོད་བསྟེན་ཡན་ལག་སྨན་ཁང་བཅས་ཀྱི་ལས་དོན་རྩིས་ཁྲ། དངུལ་རྐྱང་དངུལ་ཁང་ནང་དངུལ་འབོར་ཇི་ཡོད། ཡོང་བསྡད་སྤྲོད་བསྡད་ཀྱི་ཐོ་གཞུང་བཅས་རྩིས་སྤྲོད་ཞུས།

ཉིན་རྒྱབ་ཌལ་ཧོར་ཁྱབ་ཁོངས་འོག་གཞིས་ཆགས་ཚེ་རིང་ཁང་དང་སྐལ་བཟང་ཁང་། རྒྱུད་སྟོད། ཨན་ཀན་ཌི་ཀ ཡན་ལག་སྨན་རྩིས་ཁང་། ས་གནས་འཕྲོད་བསྟེན་ཡན་ལག་སྨན་ཁང། གཏན་སློབ། སྔོན་སློབ་བཅས་སུ་འཚམས་གཟིགས་ངོ་སྤྲོད་གནང་།

སྐབས་དེར་ས་གནས་འཐུས་ཚོགས་ཀྱི་ཚོགས་གཙོ་པདྨ་གྲུབ་དབང་ལགས་ཀྱིས་འཚམས་འདྲིའི་གསུང་བཤད་གནང་། ས་གནས་འགོ་འཛིན་རབ་བརྟན་ཚེ་རིང་ལགས་ཀྱིས་འདས་པའི་མྱོང་ཚོར་དང་ལས་དོན་ཁག་གི་ལས་བསྡོམས་སྙིང་བསྡུས་ཞུས། ས་གནས་འགོ་འཛིན་གསར་པ་མེ་རི་སྐྱབས་ལགས་ཀྱིས་རང་གི་ངོ་སྤྲོད་དང་སྦྲགས་ལས་དོན་བྱེད་ཕྱོགས་ཀྱི་གསུང་བཤད་གནང་།