ཕྱི་ལོ་ ༢༠༢༠ ཟླ་ ༧ ཚེས་ ༢༨ རེས་གཟའ་མིག་དམར། 

༄༅། །ཕ་ཡུལ་འབྲི་རུ་ནས་ཡིན་པ་ཆབ་སྲིད་བཙོན་ཟུར་རྒན་བསྟན་འཛིན་ཆོས་གྲགས་ལགས་ཕྱི་ལོ་ ༢༠༢༠ ཟླ་ ༧ ཚེས་ ༢༦ ཉིན་གྱི་སྔ་དྲོའི་ཆུ་ཚོད་ ༧།༣༦ ཐོག་བཞུགས་སྒར་རྡ་ས་བདེ་ལེགས་སྨན་ཁང་དུ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག 
སྤྱིར་དམ་པ་ཁོང་ནི་ཕྱི་ལོ་ ༡༩༤༡ ལོར་མདོ་ཁམས་ནགས་ཤོད་འབྲི་རུ་རྫོང་དུ་འཁྲུངས། དགུང་ལོ་བཅུར་ཕེབས་སྐབས་རབ་བརྟན་དགོན་དུ་ཆོས་ཞུགས་གནང་ཡང་། ཡུན་རིང་མ་སོང་བར་རྒྱ་དམག་བོད་དུ་འབྱོར་ཏེ་བོད་མི་རྣམས་འཛིན་བཟུང་བཙོན་བཅུག་དང་། ལས་ཀར་བཙན་དེད་བྱེད་སྐབས་དགོན་པའི་དགེ་འདུན་པ་ཁག་ཅིག་དང་ལྷན་དུ་ཁོང་ཡང་བྱང་དུ་ཚ་ལ་བསྐོ་བར་ཕེབས་དགོས་བྱུང་སྟེ་དཀའ་སྡུག་སྣེ་མང་མྱངས། ཕྱི་ལོ་ ༡༩༦༨ ལོར་འབྲི་རུ་རྫོང་ཁོངས་སོགས་སུ་རྒྱ་རྒོལ་གྱི་ལས་འགུལ་ཤུགས་ཆེར་ཕྱིན་ཏེ་ཁོང་ཡང་དངོས་སུ་འཐབ་འཁྲུག་ནང་ཞུགས། ཕྱི་ལོ་ ༡༩༦༩ ཟླ་ ༩ པའི་ནང་ཁོང་འཛིན་བཟུང་གིས་སྔ་རྗེས་བཙོན་ཁང་རིམ་པར་ཁྱོན་ལོ་ངོ་བཅུ་གཉིས་ཙམ་དཀའ་སྡུག་ཚད་མེད་མྱངས་ཏེ་མཐར་ཕྱི་ལོ་ ༡༩༨༡ ཟླ་ ༩ པའི་ནང་གློད་བཀྲོལ་ཐོབ།

དེ་རྗེས་ཕ་ཡུལ་དུ་དགོན་པ་བསྐྱར་བཞེངས་དང་། ལྷ་སར་རི་ཁྲོད་བསྐྱར་བཞེངས་སོགས་དགེ་བའི་ལས་ཁོ་ནར་འབད་དེ་གནས། ཕྱི་ལོ་ ༡༩༩༦ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་མཇལ་གསུང་ཐོས་ཡོང་རེའི་སྐོམ་པ་ཆུ་འདོད་ཀྱི་འདུན་པ་དང་བཅས་བཙན་བྱོལ་གྱི་ལམ་དུ་བཞུད། རྡ་སར་བདེ་འབྱོར་རྗེས་༸གོང་ས་མཆོག་གི་སྐུ་ཚེ་ཞབས་པད་སྲིད་མཐར་བརྟན་པའི་དམིགས་ཡུལ་གཙོ་བཟུང་ཐོག་ལོ་གསུམ་ཕྱོགས་གསུམ་གྱི་བསྙེན་མཚམས་ཐེངས་གཉིས་ཙམ་བཞུགས་འདུག་པ་བཅས། །