ཕྱི་ལོ་ ༢༠༢༠ ཟླ་ ༧ ཚེས་ ༧ རེས་གཟའ་མིག་དམར།
༄༅།།བདེ་ལྡན་ཞིང་གི་མགོན་པོ་འོད་དཔག་མེད།། སྲས་ཀྱི་ཐུ་བོ་འཕགས་མཆོག་སྤྱན་རས་གཟིགས།། དྲིན་ཅན་རྩ་བའི་བླ་མའི་སྐུར་བཞེངས་པ།། རྒྱལ་བ་ཡབ་སྲས་གཉིས་ལ་གསོལ་བ་འདེབས།། ཞེས་ལག་གཉིས་ཐལ་མོ་སྦྱར་ཏེ་གུས་ཕྱག་འབུལ།
དེ་ཡང་ཕྱི་ལོ་ ༢༠༢༠ ཟླ་ ༧ ཚེས་ ༡ ནས་ ༢༠༢༡ ཟླ་ ༦ ཚེས་ ༣༠ བར་བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་ནས་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་རྗེ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་ལྟར། མགོ་ནག་རྩམ་ཟན་པ་ཡོངས་ལའང་མགོན་པོ་གང་ཉིད་མཆོག་གི་སྐུ་གསུང་ཐུགས་ཀྱི་ཡོན་ཏན་བཀའ་དྲིན་རྗེས་དྲན་ཞུ་རྒྱུའི་བཟང་སྤྱོད་ཀྱི་འགན་ཡོད། བཀའ་དྲིན་རྗེས་དྲན་ཞུ་སྟངས་དེ་ཡང་སྣ་ཚོགས་ཡོང་ཆོག་པ་ཞིག་རེད། དཔེར་ན་རྩོམ་ཡིག་བྲིས་ནས་བཀའ་དྲིན་རྗེས་དྲན་ཞུ་བ་དང་། གླུ་གར་གྱི་མཆོད་པ་ཕུལ་ནས་བཀའ་དྲིན་རྗེས་དྲན་ཞུ་བ། སེམས་ཅན་ཚེ་ཐར་བཏང་ནས་བཀའ་དྲིན་རྗེས་དྲན་ཞུ་བ། ལྗོན་ཤིང་བཙུགས་ནས་བཀའ་དྲིན་རྗེས་དྲན་ཞུ་བ་སོགས་བཀའ་དྲིན་རྗེས་དྲན་ཞུ་སྟངས་ཀྱི་ཐབས་ལམ་སྣ་ཚོགས་ཡོང་སྲིད།
སྐབས་སུ་བབས་པ་མགོན་པོ་གང་ཉིད་མཆོག་གིས་ཆོས་སྲིད་ཀྱི་ཐུགས་འགན་བཞེས་པ་ནས་བཟུང་ད་བར་འཛམ་གླིང་སྐྱེ་འགྲོ་ཡོངས་དང་། ཡང་སྒོས་རང་ཅག་བོད་ཁ་བ་ཅན་གྱི་མི་རྣམས་ལ་བཀའ་དྲིན་བསམ་གྱིས་མི་ཁྱབ་པའི་མཛད་པ་གྲངས་ལས་འདས་པ་བསྐྱངས་ཡོད་པའི་ཁྲོད་ནས་གཙོ་བོ་བཀའ་དྲིན་བྱེ་བྲག་པ་ཁ་ཤས་ཤིག་གི་སྐོར་མདོར་ཙམ་ཞུ་རྒྱུ་ཡིན། དེ་ཡང་བོད་གངས་ཅན་ལྗོངས་ཀྱི་ལྷ་སྐལ་འཕགས་མཆོག་ཐུགས་རྗེ་ཆེན་པོའི་རྣམ་སྤྲུལ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་དོན་གྱི་སླད་དུ་མཚན་ཡོངས་སུ་སྨོས་ན་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་ནི། ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་མཇམ་མགོན་བླ་མ་ཙོང་ཁ་པ་ཆེན་པོའི་འཁྲུངས་ཡུལ་བོད་མདོ་སྨད་སྐུ་འབུམ་གྱི་ཉེ་འགྲམ་སྟག་འཚེར་ཞེས་པའི་གྲོང་གསེབ་ཆུང་ཆུང་ཞིག་ཏུ་ཡབ་ཆོས་སྐྱོང་ཚེ་རིང་མཆོག་དང་ཡུམ་བསོད་ནམས་མཚོ་མོའམ་མཚན་གཞན་བདེ་སྐྱིད་ཚེ་རིང་མཆོག་གི་སྲས་སུ་སྐུ་བལྟམས་པ་དང་། ཕྱི་ལོ་ ༡༩༤༠ ཟླ་ ༢ ཚེས་ ༢༢ ཉིན་རྩེ་ཕོ་བྲང་པོ་ཏ་ལའི་ཚོམས་ཆེན་སྲིད་ཞིའི་ཕུན་ཚོགས་ནང་གསེར་ཁྲི་མངའ་གསོལ་གྱི་མཛད་སྒོ་ཚོགས།
མགོན་པོ་གང་ཉིད་མཆོག་གིས་དགུང་ལོ་དྲུག་ནས་བཟུང་རིག་གནས་བཅུ་དང་། ལྷག་པར་གཞུང་ཆེན་བཀའ་པོད་ལྔ་ལ་བསླབ་པ་སློབ་གཉེར་མཛད་དེ་དགུང་ལོ་ཉེར་ལྔའི་སྟེང་ལྷ་ལྡན་དུ་ཆོ་འཕྲུལ་སྨོན་ལམ་ཆེན་མོའི་སྐབས་སུ་སེ་འབྲས་དགའ་གསུམ་གྱི་མཁས་པའི་དབང་པོ་སྟོང་ཕྲག་མང་པོའི་དབུས་སུ་ལྷ་རམས་པའི་དམ་འཇོག་མཛད།བོད་ཁ་བ་ཅན་གྱི་བསྟན་སྲིད་འཆི་གསོན་གྱི་མཚམས་ལ་སླེབ་སྐབས་གངས་ལྗོངས་ལྷ་མི་ཡོངས་ནས་གསོལ་བ་ཕུར་ཚུགས་སུ་བཏབ་པ་ལྟར། ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་མགོན་པོ་གང་ཉིད་མཆོག་གིས་དགུང་ལོ་བཅུ་དྲུག་ལས་སོན་མེད་ཀྱང་ཐུགས་བརྩེ་བ་ཆེན་པོའི་སྒོ་ནས་མ་འོངས་བོད་ཀྱི་བདེ་སྡུག་ལ་ཐུགས་དགོངས་བཞེས་ཏེ་བོད་གངས་ལྗོངས་ཆོས་ལྡན་ཞིང་གི་ཆོས་སྲིད་གཉིས་ཀྱི་ཐུགས་འགན་གཙང་བཞེས་མཛད། མགོན་པོ་གང་ཉིད་མཆོག་གིས་བོད་ཀྱི་སྤྱི་ཚོགས་ཁྲོད་རྒྱུ་ནོར་གྱི་དབུལ་ཕྱུགས་ཁྱད་པར་ཆེན་པོ་ཡོད་པར་གཟིགས་ཏེ། ཕྱི་ལོ་ ༡༩༥༢ ལོར་ལེགས་བཅོས་ཚོགས་པ་ཆེད་བཙུགས་ཀྱིས་སོ་ནམ་པ་ཚོར་བུ་ལོན་སྐྱེད་འབབ་ཆག་ཡངས་དང་ས་ཞིང་བགོ་འགྲེམས་མཛད་པ་མ་ཟད། རྫོང་དཔོན་རྣམས་ཀྱིས་སོ་སོ་སྒེར་གྱི་འགྲོ་གྲོན་སླད་མང་ཚོགས་ནས་ཁྲལ་འཕར་གང་མང་བསྡུ་ལེན་བྱེད་བཞིན་པར་བསྒྱུར་བཅོས་བཏང་གནང་མཛད་པ་དང་། དེ་བཞིན་བཙོན་པ་རྣམས་གློད་བཀྲོལ་བཏང་གནང་མཛད་པ་སོགས་བོད་ཁ་བ་ཅན་གྱི་སྤྱི་ཚོགས་དེའང་དེང་རབས་ནུབ་ཕྱོགས་པའི་མང་གཙོའི་ལམ་ལུགས་སུ་བསྒྱུར་རྒྱུའི་གོམ་པ་དང་པོ་དབུ་བཙུགས་མཛད། བསྒྱུར་བཅོས་དེ་དག་ལ་མང་ཚོགས་ནས་དགའ་བསུ་ཚད་མེད་ཞུས་ཡོད།
མགོན་པོ་གང་ཉིད་མཆོག་ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་གྱི་མཚན་མོ་ལྷ་ལྡན་ནོར་གླིང་བསྐལ་བཟང་ཕོ་བྲང་ནས་རྒྱ་གར་འཕགས་པའི་ཡུལ་ལ་བཙན་བྱོལ་དུ་ཆིབས་བསྒྱུར་བསྐྱངས་གནང་མཛད་པ་དང་། ཕྱི་ལོ་ ༡༩༥༩ ཟླ་ ༤ ཚེས་ ༡༨ ཉིན་རྒྱ་གར་གྱི་ཏེཛ་པུར་ནས་རྒྱལ་སྤྱིའི་གསར་འགོད་ལྷན་ཚོགས་ཐོག་རྒྱ་ནག་གིས་བཙན་འོག་ཏུ་བཞག་པའི་ཆིངས་ཡིག་དོན་ཚན་བཅུ་བདུན་ངོས་ལེན་མེད་པའི་གཞུང་འབྲེལ་གསལ་བསྒྲགས་བསྐྱངས། ཕྱི་ལོ་ ༡༩༥༩ ཟླ་ ༡༢ ནང་གནས་མཆོག་རྡོ་རྗེ་གདན་དུ་བོད་མི་སེར་སྐྱ་མང་ཚོགས་ནས་མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་པ་དང་འབྲེལ་བླང་དོར་ཞུ་བྱའི་མནའ་གན་མཐུ་བོ་ཆེ་འབུལ་ལམ་ཞུ་སྐབས། མགོན་པོ་གང་ཉིད་མཆོག་གིས་ཆོས་བརྒྱུད་ཆེན་པོ་བཞི་ནས་འཐུས་མི་རེ་དང་། ཆོལ་ཁ་རེ་རེ་ནས་འཐུས་མི་གསུམ་རེ་འོས་འདེམས་བྱས་ཏེ་གྲངས་ཐོ་འཕྲལ་དུ་གནང་དགོས་པའི་སེར་སྐྱ་མང་ཚོགས་ལ་བཀའ་སློབ་བསྩལ། ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་སྐབས་དང་པོའི་བོད་མི་མང་སྤྱི་འཐུས་གྲངས་བཅུ་གསུམ་ནས་༸གོང་ས་མཆོག་ལ་མཇལ་ཕྱག་དམ་འབུལ་ཞུས་པ་དང་འབྲེལ་བོད་ཀྱི་ལོ་རྒྱུས་ནང་ཐེངས་དང་པོ་ཆོས་སྲིད་ཟུང་འབྲེལ་གྱི་མང་གཙོའི་གཞུང་དབུ་བརྙེས།
མགོན་པོ་གང་ཉིད་མཆོག་གིས་ཕྱི་ལོ་ ༡༩༦༠ ཟླ་ ༩ ཚེས་ ༢༩ དང་། ཕྱི་ལོ་ ༡༩༦༢ ཟླ་ ༩ ཚེས་ ༩ བཅས་ལ་མཉམ་འབྲེལ་རྒྱལ་ཚོགས་ཀྱི་དྲུང་ཆེ་མཆོག་ལ་ཕྱི་ལོ་ ༡༩༥༩ གོང་གི་བོད་ཀྱི་ལོ་རྒྱུས་ཀྱི་བྱུང་བ་བདེན་པ་ར་སྤྲོད་དང་། ཕྱི་ལོ་ ༡༩༥༩ རྗེས་བོད་ནང་དུས་འགྱུར་བྱུང་བའི་སྐབས་མི་མང་ལ་དཀའ་ངལ་ཇི་འཕྲད་སྐོར་ཞིབ་ཕྲ་འགྲེལ་བརྗོད་གནང་བ་མ་ཟད། མཉམ་འབྲེལ་རྒྱལ་ཚོགས་ནས་བོད་ལ་རོགས་སྐྱོར་གནང་དགོས་པའི་འབོད་སྐུལ་ཡང་མཛད་ཡོད། ཕྱི་ལོ་ ༡༩༦༣ ཟླ་ ༣ ཚེས་ ༡༠ ཉིན་༸གོང་ས་མཆོག་གིས་མ་འོངས་བོད་ཀྱི་རྩ་ཁྲིམས་ཟིན་བྲིས་རྒྱས་པ་ལེའུ་བཅུ་ཅན་ཡོངས་ཁྱབ་གསལ་བསྒྲགས་བསྐྱངས་ཏེ་བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་འཛུགས་གསར་གཏོད་མཛད། བཙན་བྱོལ་དུ་ཆིབས་བསྒྱུར་བསྐྱངས་རྗེས། མགོན་པོ་གང་ཉིད་མཆོག་གིས་ཕྱི་ལོ་ ༡༩༧༤ ལོར་བོད་མདོ་དབུས་ཁམས་གསུམ་གྱི་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་སུ་དམིགས་ཏེ་དབུ་མའི་ལམ་གྱི་སྲིད་བྱུས་གསར་གཏོད་མཛད་པ་དང་། ཕྱི་ལོ་ ༡༩༧༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ལྷན་འབྲེལ་བ་སླར་ཡང་དབུ་བཙུགས་མཛད། དབུ་མའི་ལམ་གྱི་སྲིད་བྱུས་བརྒྱུད་རྒྱ་ནག་དང་མཉམ་གང་མགྱོགས་གྲོས་མོལ་ཡོང་སླད་༸གོང་ས་མཆོག་གིས་ཕྱི་ལོ་༡༩༨༧ ཟླ་ ༩ ཚེས་ ༢༡ ཉིན་ཨ་རིའི་རྒྱལ་ས་ཝ་ཤིན་ཊོན་དུ་འགྲོ་བ་མིའི་ཐོབ་ཐང་ལྷན་ཚོགས་སུ་ལོ་རྒྱུས་རང་བཞིན་ལྡན་པའི་ཞི་བའི་གྲོས་འཆར་དོན་ཚན་ལྔ་དང་། ཕྱི་ལོ་ ༡༩༨༨ ཟླ་ ༦ ཚེས་༡༥ ཉིན་ཕ་རན་སིའི་སི་ཏྲས་སི་བྷག་ཏུ་ཡུ་རོབ་གྲོས་ཚོགས་སུ་ཞི་བའི་དོན་ཚན་ལྔའི་ནང་དོན་རྣམས་རྒྱས་བཤད་ཀྱི་གསལ་བསྒྲགས་བསྐྱངས།
མགོན་པོ་གང་ཉིད་མཆོག་གིས་འཚེ་མེད་ཞི་བ་དང་གཉིས་ཕན་གྱི་ཐབས་ལམ་བརྒྱུད་བོད་ཀྱི་བདེན་མཐའ་གསལ་ཐབས་མཛད་བཞིན་ཡོད་པར་བརྟེན། ༸གོང་ས་མཆོག་ལ་ཕྱི་ལོ་ ༡༩༨༩ ཟླ་ ༡༢ ཚེས་ ༡༠ ཉིན་ནོ་བེལ་ཞི་བདེའི་གཟེངས་རྟགས་ཚོགས་ཆུང་གིས་ནོར་ཝེའི་རྒྱལ་ས་ཨོ་སི་ལོར་འཛམ་གླིང་ནང་ཆེས་སྙན་གྲགས་ཆེ་བའི་ནོ་བེལ་ཞི་བདེའི་གཟེངས་རྟགས་ཕུལ། གཟེངས་རྟགས་དེས་༸གོང་ས་མཆོག་གི་མཚན་སྙན་གྲགས་དང་མཛད་འཕྲིན་སྔར་ལས་ལྷག་རྒྱས་བཅུག་ཡོད་ལ། བོད་ཀྱི་བདེན་དོན་དེ་ཡང་རྒྱལ་སྤྱིའི་སྟེང་ས་གྲགས་གནམ་གྲགས་སུ་ཆགས་བཅུག་ཡོད། མགོན་པོ་གང་ཉིད་མཆོག་གིས་འགྲོ་བ་མིའི་བཟང་སྤྱོད་གོང་མཐོར་དང་། འཛམ་གླིང་སྤྱིའི་ཆོས་ལུགས་ནང་ཁུལ་མཐུན་སྒྲིལ་ཡོང་སླད་ཕྱག་ལས་གནང་བ། འཚེ་མེད་ཞི་བ་དང་གཉིས་ཕན་གྱི་ཐབས་ལམ་བརྒྱུད་བོད་ཀྱི་བདེན་མཐའ་གསལ་ཐབས་མཛད་བཞིན་ཡོད་པ་སོགས་ངོས་འཛིན་དུ། ཕྱི་ལོ་ ༢༠༠༧ ཟླ་ ༡༠ ཚེས་ ༡༧ ཉིན་ཨ་རིའི་གྲོས་ཚོགས་ནས་གསེར་གྱི་གཟེངས་རྟགས་འབུལ་ལམ་ཞུས། གཟེངས་རྟགས་དེ་དག་སོགས་ལ་བརྟེན་ནས་གཞིས་བྱེས་བོད་མིའི་མཐུན་སྒྲིལ་གྱི་སྟོབས་ཤུགས་དང་སྙིང་སྟོབས་ཡར་ངོའི་ཟླ་ལྟར་འཕེལ།
ཕྱི་ལོ་ ༢༠༠༡ ལོར་བཙན་བྱོལ་བོད་མིའི་མང་གཙོའི་ལམ་ལུགས་འདི་བཞིན་ཚད་ལྡན་ཞིག་ཡོང་སླད་༸གོང་ས་མཆོག་གིས་བཀའ་བློན་ཁྲི་པ་ཐད་ཀར་མི་མང་གིས་འོས་འདེམས་བྱེད་ཆོག་པའི་ལམ་སྲོལ་གསར་གཏོད་མཛད་པ་དང་། དེ་བཞིན་ཕྱི་ལོ་༢༠༡༡ ལོར་༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་མཛད། འདི་ནི་མགོན་པོ་གང་ཉིད་མཆོག་གིས་བོད་ཀྱི་ལོ་རྒྱུས་ནང་སྔར་བྱུང་མ་མྱོང་བའི་བོད་གངས་ཅན་པ་ཡོངས་ལ་བསྩལ་བའི་མང་གཙོའི་གསོལ་རས་ཆེས་བླ་ན་མེད་པ་དེ་ཡིན། རྒྱལ་ཁབ་གཞན་གྱི་མི་སེར་ཚོས་མང་གཙོ་དང་རང་དབང་གི་ཆེད་དུ་ཐ་ན་ལུས་སྲོག་ལོངས་སྤྱོད་དང་བཅས་པ་ཡང་བློས་གཏོང་གནང་གི་ཡོད།
འཛམ་གླིང་ཞི་བདེ་དང་འགྲོ་བ་མིའི་རིགས་ཀྱི་སེམས་ཁམས་བག་ཕེབས་ལྷིང་འཇགས་ཤིག་བསྐྲུན་སླད་མགོན་པོ་གང་ཉིད་མཆོག་གིས་ཐུགས་བསྐྱེད་དམ་བཅའ་བཞིའི་མཛད་འཕྲིན་སྐྱོང་བཞིན་ཡོད། དེ་ཡང་རྒྱལ་བ་དོན་གྱི་བདག་པོས་རང་ཉིད་འགྲོ་བ་མི་ཞིག་ཡིན་པའི་ཆ་ནས་འགྲོ་བ་མིའི་རྒྱུད་ཀྱི་བཟང་པོའི་རིན་ཐང་གོང་མཐོར་གཏོང་རྒྱུ་དང་། ཆོས་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་དབར་མཐུན་སྒྲིལ་གོང་མཐོར་གཏོང་རྒྱུ། བོད་མི་ཞིག་ཡིན་པ་དང་ལྷག་པར་ཏཱ་ལའི་བླ་མའི་མཚན་གནས་ཡོད་པའི་ཆ་ནས་བོད་དོན་བདེན་མཐའ་གསལ་ཐབས་དང་བོད་ཀྱི་ཁོར་ཡུག་སྲུང་སྐྱོབ་ཀྱི་ཕྱག་ལས་གནང་རྒྱུ། དེ་བཞིན་རྒྱ་གར་དཔལ་ནཱ་ལེནྡྲའི་རིག་གཞུང་སེམས་ཁམས་རིག་པ་དང་ཚད་མ་རིག་པ་སོགས་དེང་རབས་རྒྱ་གར་འཕགས་པའི་ཡུལ་དུ་བསྐྱར་གསོ་གནང་རྒྱུའི་མཛད་འགན་བཞེས་བཞིན་ཡོད་པ་རེད། ད་ལྟའི་དུས་སྐབས་འདིར་འཛམ་གླིང་གི་སྐྱེ་བོ་མང་པོར་ཕྱི་དངོས་པོ་ཡར་རྒྱས་ཕྱིན་པ་དང་མཉམ་ནང་སེམས་ཁམས་ལ་དཀའ་ངལ་མང་དག་ཅིག་འཕྲད་བཞིན་ཡོད་པས། དཔལ་ནཱ་ལེནྡྲའི་རིག་གཞུང་དེ་དག་དེང་རབས་འགྲོ་བ་མིའི་སྤྱི་ཚོགས་ནང་ཧ་ཅང་དགོས་མཁོ་ཆེན་པོ་ཡོད་པ་ཞིག་ཆགས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙུན་མ་ཚོས་ཀྱང་ནང་པའི་གཞུང་ལ་བསླབ་པ་སློབ་གཉེར་གནང་དགོས་པའི་བཀའ་སློབ་རིམ་ཕེབས་ལྟར། བཙན་བྱོལ་དུ་རྟེན་གཞི་བྱས་པའི་བཙུན་དགོན་ཁག་གི་བཙུན་མ་ཚོས་ཀྱང་གཞུང་ཆེན་བཀའ་པོད་ལྔ་ལ་ཧུར་བརྩོན་ལྷོད་མེད་བྱས་ཏེ་མཐར་བསླབ་པ་མཐར་སོན་ལེགས་པར་བྱུང་ཡོད་པ་མ་ཟད། ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་འབྲས་སྤུངས་བླ་སྤྱི་རུ་དགེ་བཤེས་མ་ཐོན་དང་པོའི་གྲས་ ༢༠ ལ་ལོ་རྒྱུས་རང་བཞིན་ལྡན་པའི་དགེ་བཤེས་མའི་ཕྱག་འཁྱེར་བསྩལ། འདི་ནི་བོད་ཀྱི་ཕོ་མོ་འདྲ་མཉམ་ཐོབ་ཐང་གི་ལོ་རྒྱུས་དཀྱོགས་མཚམས་གལ་འགངས་ཧ་ཅང་ཆེན་པོ་ཞིག་ཆགས་ཡོད།
མགོན་པོ་གང་ཉིད་མཆོག་གིས་འདས་པའི་ལོ་ངོ་ ༤༠ ལྷག་རིང་ནུབ་ཕྱོགས་པའི་ཚན་རིག་པ་གྲགས་ཅན་འདྲ་མིན་དང་ལྷན་ནུབ་ཕྱོགས་པའི་ཚད་རྡུལ་དངོས་ཁམས་རིག་པའི་རྣམ་གཞག་ QuantumPhysics དང་། ནང་པའི་ལྟ་གྲུབ། སེམས་ཁམས་རིག་པ་སོགས་ཀྱི་སྐོར་བགྲོ་གླེང་གནང་ཞིང་། སྔ་མོ་ནུབ་ཕྱོགས་པ་ཚོས་བོད་བརྒྱུད་ནང་བསྟན་དེ་བླ་མའི་ཆོས་ལུགས་རེད། ཅེས་འཕྱ་སྨོད་བྱེད་ཀྱི་ཡོད། འོན་ཀྱང་བགྲོ་གླེང་དེ་དག་བརྒྱུད་ཚན་རིག་པ་བློ་གཟུ་བོར་གནས་པ་ཚོར་བློ་སྐྱེད་ཐོབ་པ་མ་ཟད། བོད་བརྒྱུད་ནང་བསྟན་དེ་ཉིད་དཔལ་ནཱ་ལེནྡྲ་ནས་དར་བའི་རིག་གཞུང་དངོས་ཡིན་པ་ར་འཕྲོད་དང་། ཚན་རིག་པ་ཚོའི་ཁྲོད་བོད་བརྒྱུད་ནང་བསྟན་ལ་ཡིད་སྨོན་བྱེད་མཁན་ཉིན་རེ་ནས་ཇེ་མང་དུ་འགྲོ་བཞིན་ཡོད།
མགོན་པོ་གང་ཉིད་མཆོག་རྒྱ་གར་ལ་བཙན་བྱོལ་དུ་ཆིབས་བསྒྱུར་བསྐྱངས་མ་ཐག་གི་སྐབས། ངོ་ཤེས་པ་ས་དང་གནམ་མ་གཏོགས་མེད་ནའང་། རིམ་པས་བོད་མིའི་སྒྲིག་འཛུགས་དང་། དགོན་སྡེ། སློབ་གྲྭ གཞིས་ཆགས་ཁག་སོགས་གསར་འཛུགས་མཛད་དེ་བཙན་བྱོལ་བོད་མི་རྣམས་བཙན་བྱོལ་བ་འདྲ་འདྲའི་ནང་ནས་མ་འདྲ་བ་བསྐྲུན་གནང་མཛད། ༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་དོན་དེ་ཡང་འཛམ་གླིང་ཡོངས་ལ་ཉི་མའི་འོད་ཟེར་འཕྲོས་པ་ལྟར་ཁྱབ་ཡོད།
༸གོང་ས་མཆོག་ནི། བོད་དང་བོད་མིའི་མགོན་སྐྱབས་དང་མཚོན་རྟགས་ཡིན་པ་ཙམ་དུ་མ་ཟད། བོད་པའི་མཐུན་སྒྲིལ་གྱི་སྟོབས་ཤུགས་ཀྱང་མཚོན་གྱི་ཡོད། བོད་སིལ་བུའི་དུས་རབས་ནས་བཟུང་བོད་ཁ་བ་ཅན་གྱི་མི་རྣམས་ལ་ཆོས་སྲིད་གཉིས་ཀྱི་ཐད་ནས་༸གོང་ས་མཆོག་ལས་ལྷག་བཀའ་དྲིན་ཆེ་བ་མེད། སྤྱིར་༸གོང་ས་མཆོག་གི་སྐུ་གསུང་ཐུགས་ཀྱི་ཡོན་ཏན་རྒྱ་མཚོ་ལས་གཏིང་ཟབ་པ་དང་ནམ་མཁའ་ལས་ཁོད་ཡངས་པ་ཡོད་པས། རེ་ཞིག་འབྲི་མཚམས་འདི་ནས་འཇོག་པར་བྱ། ང་ཚོ་བོད་གངས་ཅན་པ་ཡོངས་ནས་༸གོང་ས་མཆོག་གི་ཐུགས་རྗེ་བཀའ་དྲིན་རྗེས་དྲན་ཚེ་རབས་ནས་ཚེ་རབས་ཞུ་ངེས་ཡིན།
མཐའ་དོན། འགྲོ་བ་ལྷ་དང་བཅས་པའི་དཔུང་གཉེན་འཇིག་རྟེན་ཞི་བདེའི་དད་དཔོན་གངས་ཅན་བོད་ཀྱི་ལྷ་སྐལ་འཕགས་མཆོག་ཕྱག་ན་པདྨོ་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་གྱ་ལྔར་ཕེབས་པའི་༸སྐུའི་འཁྲུངས་སྐར་དགའ་བ་འབུམ་གྱིས་བསུ་བ་དང་འབྲེལ་མགོན་པོ་གང་ཉིད་མཆོག་སྐུ་ཚེ་མི་འཇིག་རྡོ་རྗེ་བྲག་ལྟར་བཞུགས་པ་དང་། བོད་ཀྱི་བདེན་མཐའ་མགྱོགས་མྱུར་གསལ་ཏེ་གཞིས་བྱེས་བོད་མི་ལྷན་འཛོམས་ཡོང་བའི་བཀྲ་ཤིས་སྨོན་འདུན་ཞུ།།
