ཕྱི་ལོ་ ༢༠༢༠ ཟླ་ ༦ ཚེས་ ༤ རེས་གཟའ་ཕུར་བུ། 

༄༅། །འདི་གར་ཧོན་སུར་རབ་རྒྱས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༥ ཚེས་ ༢༦  ནས་ཟླ་ ༦ ཚེས་ ༣ བར་གྱི་ནད་ཡམས་སྔོན་འགོག་དང་འབྲེལ་བའི་ལས་བསྡོམས་གཤམ་གསལ། 

༡༽   ཕྱི་ལོ་ ༢༠༢༠ ཟླ་ ༦ ཚེས་ ༡ ཉིན་ཧོན་སུར་ས་གནས་ཁྱབ་ཁོངས་གཞིས་མི་གྲངས་བདུན་ལ་ཏོག་དབྱིབས་གཉན་རིམས་རྐྱེན་པས་ཐེངས་གཅིག་ངལ་སེལ་གུན་སྐྱོབ་ཆེད་བོད་མའི་སྒྲིག་འཛུགས་ནས་གཞིས་མི་རེར་སྒོར་ ༥༠༠༠ ཐམ་པ་གནང་གཏན་འཁེལ་བ་ལྟར་དོ་བདག་ལ་བགོ་འགྲེམས་ཞུས་ཟིན།

༢༽ བོད་མིའི་སྒྲིག་འཛུགས་ནང་སྲིད་ལས་ཁུངས་ནས་རྒས་གསོ་ཁང་གི་རྒས་འཁོགས་རྣམས་ལ་དུག་སེལ་སྨན་ཆུ་དང་ལུས་གསོ་ཟས་སྤྱོད་སོགས་བགོ་སྤྲོད་སླད་ཛ་དྲག་མ་དངུལ་བཀའ་འཁྲོལ་ཕེབས་དོན་བཞིན། འདི་ནས་དེ་དོན་འདི་གའི་རྒས་གསོ་ཁང་དུ་རྒས་འཁོགས་གྲངས་ ༢༠ ཡོད་པ་ཚང་མར་ཧིན་སྒོར་ ༣༠༠༠༠ ཙམ་གྱི་དགོས་མཁོའ་ཅ་དངོས་མཁོ་སྒྲུབ་ཀྱིས་བགོ་འགྲེམས་ཟིན་པ་དང༌། འཕྲོས་རྣམས་རིམ་པས་དུས་བཀག་ནང་ཚུད་མཁོ་སྒྲུབ་ཀྱིས་བགོ་སྤྲོད་བྱ་འཆར་ཡོད།

༣༽ ས་གནས་ནས་གོ་སྒྲིག་ཡོད་པའི་ཟུར་བཀའ་ཁང་དུ་ཟླ་ ༥ ཚེས་ ༢༧ ཉིན་སྦེང་ལོར་ནས་སློབ་ཕྲུག་གཅིག་ཕེབས་པ་ཟུར་བཀག་བྱེད་མུས་དང༌། དེ་སྔོན་ནས་ཝ་ན་གཙུག་ལག་ཁང་ནས་ཕེབས་པའི་སློབ་ཕྲུག་གསུམ་དང་སྦེང་ལོར་ནས་ཕེབས་མཁན་གཅིག་བཅས་འདི་ཟླའི་ཚེས་ ༢ ཉིན་ཡན་ལག་འཕྲོད་བསྟེན་སྨན་ཁང་གི་འགན་ཁུར་འོག་ཧོན་སུར་གྲོང་སྡེར་  Swab test གནང་ཟིན་པ་དང༌། གྲུབ་འབྲས་ཇི་ཡིན་སྒུག་བཞིན་ཡོད།

༤༽ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཟླ་ ༥ ཚེས་ ༢༩ དང་ ༣༠ སོ་སོར་བཀའ་དབང་གནང་བའི་སྐབས་འདི་གའི་རྒས་གསོ་ཁང་གི་རྒས་འཁོགས་རྣམས་ལ་ཐད་གཏོང་ཀྱིས་བཀའ་དབང་ཞུ་ཐུབ་པ་བྱུང་ཡོད།

༥༽ ཕྱི་ཚེས་ ༢ ཉིན་ས་གནས་ནད་ཡམས་སྔོན་འགོག་ཚོགས་ཆུང་དང་སྤྱི་མི་བརྒྱ་དཔོན་བཅས་རྒྱས་འཛོམས་ཐོག་བོད་མིའི་སྒྲིག་འཛུགས་ཀྱི་ལམ་སྟོན་དང་རྒྱ་གར་རྒྱལ་ཡོངས་ཀྱི་བཀའ་རྒྱ་ཨང་ལྔ་པ་གཞིར་བཟུང་ཐོག་སྔ་འཕྲོས་ཟླ་གཅིག་རིང་འདི་གཞིས་སུ་ནད་ཡམས་སྔོན་འགོག་དང་འབྲེལ་བའི་ལས་དོན་བྱ་ཕྱོགས་ཐད་གྲོས་བསྡུར་ཐག་གཅོད་ཞུས་དེ་མི་མང་རྣམས་ལའང་གསལ་བསྒྲགས་ཞུས་ཟིན་པ་བཅས། །