༢༠༢༠ ཟླ་ ༦ ཚེས་ ༡༢ རེས་གཟའ་པ་སངས།
༄༅། །ཉེ་ལམ་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གཅིག་ནང་ཏོག་དབྱིབས་གཉན་རིམས་ཀྱི་ནད་པ་འགའ་ཤས་ཐོན་པའི་ཛ་དྲག་གི་གནས་སྟངས་ལ་གཞིགས་ཏེ་སྦེལ་ཀོབ་ལུགས་བསམ་གཞིས་ཆགས་ས་གནས་འགོ་འཛིན་ལས་ཁུངས་ཀྱིས་ཛ་དྲག་གི་ཚོགས་འདུ་ཞིག་སྐོང་ཚོགས་གནང་འདུག སྐབས་དེར་འཚོ་བྱེད་སྨན་ཁང་གི་སྨན་པ་དང་སྨན་ཞབས་པ། འཕྲོད་ལས་པ་བཅས་ལྷན་འཛོམས་ཀྱིས།
རྒྱ་གར་རྒྱལ་ས་ལྡི་ལི་ནས་བོད་མི་སུ་འདྲ་ཞིག་སྦེལ་ཀོབ་ལུགས་བསམ་གཞིས་ཆགས་སུ་འབྱོར་ཚེ་གཞིས་ཆགས་ལས་ཁུངས་ཀྱིས་གོ་སྒྲིག་ཞུས་པའི་འགོག་དབྱེ་ཟུར་འཇོག་ཁང་དུ་བདུན་ཕྲག་གཅིག་བཞུགས་དགོས་པ་དང་། དེ་རྗེས་འཚོ་བྱེད་སྨན་ཁང་དུ་ནད་རྟགས་གང་ཡང་མ་ཐོན་ནའང་རང་ཁྱིམ་དུ་འགོག་དབྱེ་ཟུར་འཇོག་ཉིན་གྲངས་ ༡༤ རིང་བཞུགས་དགོས་པའི་སྒྲིག་ཁྲིམས་གཏན་འབེབ་ཆེད་གོ་བསྡུར་སྦྱང་བཤད་གནང་འདུག ཚོགས་འདུ་གྲོལ་མཚམས་འཚོ་བྱེད་སྨན་ཁང་དུ་གསར་འཛུགས་གནང་བའི་ཆམ་ཚད་བརྟག་དཔྱད་ཁང་གསར་འཛུགས་བྱས་པ་དེར་རྟོག་ཞིབ་གནང་འདུག
སྤྱིར་ད་ལྟའི་ཆར་ས་གནས་ཡུལ་ཁྲིམས་ལྟར་ན་མ་ཧཱ་རཱཤཀྲ་ Maharashtra མངའ་སྡེ་ནས་ཡོང་བ་ཡིན་ན་གཞུང་གི་འགོག་དབྱེ་ཟུར་འཇོག་ཁང་དུ་བདུན་ཕྲག་གཅིག་བཞུགས་དགོས་པ་དང་། ས་གནས་སྨན་ཁང་དུ་ནད་རྟགས་གང་ཡང་མ་ཐོན་ཚེ་རང་ཁྱིམ་དུ་བསློགས་ནས་ཉིན་གྲངས་ ༡༤ རིང་འགོག་དབྱེ་ཟུར་འཇོག་ཏུ་གནས་དགོས་པ་བཅས།།
