ཕྱི་ལོ་ ༢༠༢༠ ཟླ་ ༦ ཚེས་ ༡༨ རེས་གཟའ་ཕུར་བུ།
༄༅། །ཕྱི་ལོ་ ༢༠༢༠ ཟླ་ ༦ ཚེས་ ༡༧ རེས་གཟའ་ཕུར་བུའི་ཉིན་གངས་སྐྱིད་དུ་རྟེན་གཞི་བྱས་པའི་བོད་ཀྱི་དཔེ་མཛོད་ཁང་ནས་དྲ་ལམ་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་པའི་བྱམས་བརྩེའི་ས་བོན་ཞེས་པའི་དཔེ་དེབ་དབུ་འབྱེད་ཀྱི་མཛད་སྒོ་ཚོགས་ཡོད་འདུག
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤ ཐོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་ཐོག་མར་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་མཇལ་དར་སྒྲོན་འབུལ་རྗེས་དཔེ་དེབ་དབུ་འབྱེད་གནང་འདུག
སྐབས་དེར་དགེ་བཤེས་ལྷག་རྡོར་ལགས་ཀྱིས་གསུང་དོན། དཔེ་དེབ་འདི་བཞིན་ཐོག་མར་ཨིན་སྐད་ཐོག་ཐོན་ཡོད། དེ་ནས་དེ་རིང་འདི་གར་བོད་ཀྱི་དཔེ་མཛོད་ཁང་གི་ལས་བྱེད་བྱམས་པ་བསྟན་འཛིན་ལགས་ཀྱིས་བོད་སྒྱུར་ཞུས་པ་འདི་དངོས་སུ་དབུ་འབྱེད་ཐུབ་པར་ཧ་ཅང་དགའ་པོ་བྱུང་།
དཔེ་དེབ་འདིའི་སྔོན་གླེང་དུ། ༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་གི་ས་ཕྱོགས་གང་སར་ཕེབས་སྐབས་ཕྲུ་གུ་ཆུང་ཆུང་ཚོར་ཐུགས་བརྩེའི་གཟིགས་པ་ཧ་ཅང་ཆེ་གནང་མཛད་བཞིན་ཡོད་ཀྱང་། ད་ཆ་འཛམ་གླིང་གང་སར་ཏོག་དབྱིབས་གཉན་རིམས་ཁྱབ་གདལ་ཕྱིན་པའི་རྐྱེན་གྱིས་ཕྱོགས་མཚམས་སུ་དངོས་སུ་༸ཞབས་ཀྱིས་བཅག་ནས་མཛད་འཕྲིན་སྐྱོང་ཐབས་བྲལ་བར་བརྟེན་ཕྲུ་གུ་ཚོར་ཡང་མགོན་པོ་མཆོག་གི་གསར་ཞལ་མཇལ་རྒྱུར་སྐལ་བས་དབེན། འོན་ཀྱང་ཐེངས་འདིར་ཕྲུ་གུ་ཚོའི་བསོད་ནམས་ཀྱི་བགོ་སྐལ་དུ་དཔེ་དེབ་འདི་འདྲ་ཞིག་དབུ་འབྱེད་ཞུས་པ་བརྒྱུད་ཕྲུ་གུ་ཚོ་དང་འབྲེལ་བ་མཐུད་ཐུབ་པར་དགའ་པོ་བྱུང་། ཞེས་འཁོད་ཡོད་སྐོར་གསུངས།
དེ་ཡང་དཔེ་དེབ་དེའི་ནང་དོན་སྙིང་པོར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆུང་བྱིས་པའི་དུས་ནས་༸རྒྱལ་ཡུམ་ཆེན་མོ་མཆོག་གིས་བྱམས་བརྩེའི་གཟིགས་སྐྱོང་འོག་ནས་འཚར་ལོངས་བྱུང་བའི་ཐུགས་མྱོང་གཞི་ལ་བཞག་ནས། ཕྲུ་གུ་སུ་འདྲ་ཞིག་ཡིན་ཡང་བྱམས་བརྩེའི་ཀུན་ནས་བླངས་ཏེ་ཤེས་ཡོན་སློབ་གསོ་སྤྲོད་དགོས་པ་གལ་འགངས་ཧ་ཅང་ཆེ་བར་གསུང་ཡོད།
གཞན་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྒྱུན་དུ་བྱམས་སྙིང་རྗེ་དེ་བཞིན་ཧ་ཅང་གལ་ཆེན་པོ་ཡིན་སྐོར་སོགས་ཀྱི་བཀའ་སློབ་རབ་དང་རིམ་པ་མང་པོ་ཕེབས་ཡོད་པ་དང་། ང་རང་ལྟ་བུར་མཚོན་ན་ལོ་ ༡༦ རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡིག་ཚང་དུ་ཞབས་ཞུ་བསྒྲུབ་རྒྱུའི་སྐལ་བཟང་གི་གོ་སྐབས་ཐོབ་མྱོང་ཡོད་སྐོར་སོགས་གསུངས། །
https://youtu.be/KyZVxUwz8tc
