ཕྱི་ལོ་ ༢༠༢༠ ཟླ་ ༦ ཚེས་ ༨ རེས་གཟའ་ཟླ་བ།
༄༅། །འདི་གར་ཐེ་ཝན་སྐུ་ཚབ་དོན་གཅོད་ཁང་གིས་བཏང་གནས་ནང་འཁོད་དོན། ལོ་ལྟར་དུས་ཚེས་ཁྱད་པར་ཅན་ས་ག་ཟླ་བའི་ཚེས་བཅོ་ལྔ་ཉིན་ཐེག་ཆེན་ཆོས་གླིང་གཙུག་ལག་ཁང་དུ་གསོ་སྦྱོང་གི་སྡོམ་པ་གནང་བཞིན་པ་ལྟར། ཕྱི་ལོ་ ༢༠༢༠ ཟླ་ ༦ ཚེས་ ༥ སྟེ་བོད་ལུགས་ས་ག་ཟླ་བའི་དུས་ཆེན་ཁྱད་པར་ཅན་གྱི་ཉིན་མོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་འཛམ་གླིང་ཡུལ་གྲུ་ཀུན་ཏུ་གནས་སྡོད་དད་ལྡན་པ་རྣམས་ལ་སེམས་བསྐྱེད་ཀྱི་ཆོས་འབྲེལ་བཀའ་དྲིན་བསྐྱངས་ཡོད་པ་དང་། སྐབས་དེར་ཐེ་ཝན་དད་ལྡན་ནང་པ་ཚོས་སྤྲོ་བ་དང་དད་གུས་ཆེན་པོས་མགོན་པོ་གང་ཉིད་མཆོག་གི་བཀའ་ཆོས་ཞུས་ཡོད།
དེ་ཡང་ཐེ་ཝན་བོད་ཀྱི་སྐུ་ཚབ་དོན་ཁང་གི་ནང་ཆོས་འཛིན་གྲྭའི་ཆོས་དགེ་དབུ་བཞུགས་ཐོག་སློབ་མ་རྣམས་དེ་ཉིན་སྔ་དྲོ་འཆར་ཅན་ཚེས་བཟང་དུས་བཟང་གི་ཚོགས་འདོན་ལྟར་བླ་མའི་རྣལ་འབྱོར་སྒོ་ནས་ཚོགས་དང་མཆོད་འབུལ། ༸རྒྱལ་བའི་ཞབས་བརྟན་གསོག་སྒྲུབ་བཅས་གྲུབ་རྗེས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་བྱང་སེམས་སྡོམ་པ་བཀའ་དྲིན་སྩལ་སྐབས་སློབ་མ་རྣམས་ཀྱིས་དད་གུས་སྤྲོ་གསུམ་ངང་ཆོས་འབྲེལ་ཞུས་ཡོད།
གཞན་ཡང་དེ་ཉིན་ཐེ་ཝན་ནང་ཡོད་པའི་བོད་བརྒྱུད་ནང་བསྟན་གྱི་ཆོས་ཚོགས་ཁག་དང་། དད་ལྡན་སློབ་མ་ཚོས་རང་རང་སྡོད་གནས་སུ་དད་གུས་སྤྲོ་གསུམ་ངང་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཆོས་འབྲེལ་ལེགས་པར་ཞུས་ཡོད་པ་བཅས།།
