ཕྱི་ལོ་ ༢༠༢༠ ཟླ་ ༦ ཚེས་ ༡༢ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ན་མཉམ་རྒྱུས་སྟོན་ Peer Mentoring Program ཞེས་པའི་ལས་གཞི་ཞིག་གསལ་བསྒྲགས་གནང་འདུག ལས་གཞི་གསར་པ་འདིའི་འོག་ཤེས་རིག་ལས་ཁུངས་ནས་མཐོ་སློབ་གཅིག་པར་སློབ་གཉེར་གནང་བཞིན་པའི་བོད་པའི་སློབ་ཕྲུག་རྒན་པ་ཞིག་དང་། སློབ་འཇུག་གསར་པ་བྱས་པའི་བོད་པའི་སློབ་ཕྲུག་དབར་འབྲེལ་ལམ་བཟོས་ནས། སློབ་ཕྲུག་གསར་པ་དེར་མཐོ་སློབ་ནང་གི་འགྲོ་ལུགས་འགྲོ་སྟངས་སྐོར་ལམ་སྟོན་དང་རྒྱུས་མངའ་ཡོང་བའི་ཆེད་དུ་མཐུན་འགྱུར་རོགས་རམ་བྱ་རྒྱུ་རེད་འདུག
དེ་ཡང་ལོ་ལྟར་འཛིན་གྲྭ་བཅུ་གཉིས་ཐོན་མཁན་བོད་པའི་སློབ་ཕྲུག་ ༡༢༠༠ ཙམ་ཡོང་གི་ཡོད་པ་མ་ཟད། ད་ལྟ་རྒྱ་གར་ནང་མཐོ་སློབ་འགྲིམ་བཞིན་པ་བོད་པའི་སློབ་ཕྲུག་ ༣༠༠༠ ལྷག་དང་། ཕྱི་རྒྱལ་ལ་སློབ་ཕྲུག་ ༤༠ ལྷག་ཡོད་མུས་ཡིན་པ་རེད། ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པ་གཙོ་བོར་གྱུར་བའི་ཁྱབ་ཁོངས་སློབ་གྲྭ་སོ་སོའི་རྒྱུས་སྟོན་པས་འཛིན་རིམ་བཅུ་གཉིས་ཐོན་མཁན་ཚོར་མཐོ་སློབ་དང་སློབ་ཚན་འདེམས་སྒྲུག་བྱེད་ཕྱོགས་སྐོར་སློབ་སྟོན་གནང་བཞིན་པ་རེད།
དེའི་སྟེང་ད་རེས་ཤེས་རིག་ལས་ཁུངས་ནས་ན་མཉམ་རྒྱུས་སྟོན་ཞེས་པའི་ལས་གཞི་གསར་པ་འགོ་འཛུགས་གནང་སྟེ། མཐོ་སློབ་སློབ་ཕྲུག་གསར་པ་ཚོ་ལ་སློབ་ཕྲུག་རྒན་པས་མཐོ་སློབ་ནང་གི་འགྲོ་སྟངས་སོགས་ཀྱི་སྐོར་མཐུན་འགྱུར་རོགས་རམ་བྱ་རྒྱུ་ཡིན་འདུག་པ་བཅས། །
