ཕྱི་ལོ་ ༢༠༢༠ ཟླ་ ༦ ཚེས་ ༢ རེས་གཟའ་མིག་དམར།
༄༅། །རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ ཁྱབ་གདལ་མ་འགྲོ་བའི་སྔོན་འགོག་གི་ཚུལ་དུ་འདི་ལོའི་ཕྱི་ཟླ་ ༣ པའི་ཟླ་དཀྱིལ་ཙམ་ནས་རྒྱལ་ཡོངས་སུ་སྒོ་རྒྱ་བསྡམས་པའི་རྐྱེན་གྱིས། རྒྱ་གར་ནང་གི་བོད་པའི་གཏན་སློབ་ཁག་ ༡༩ ནང་སློབ་ཕྲུག་གྲངས་ ༩༢༤ རང་གནས་སུ་ལོག་མ་ཐུབ་པར་སློབ་གྲྭར་ལུས་ཡོད་པ་རྣམས་ལ་རོགས་སྐྱོར་སླད་ཤེས་རིག་ལས་ཁུངས་ཀྱིས་ཧིན་སྒོར་༡,༨༤༨,༠༠༠ ཐམ་པ་བགོ་འགྲེམས་ཞུས། སློབ་ཕྲུག་འདི་དག་སློབ་གྲྭ་སྡེ་ཁག་མི་འདྲ་བ་བཞིའི་གཏན་སློབ་ཁག་གི་ནང་དུ་ཡོད་ཅིང་། དེ་ཡང་དྷ་ས་བོད་ཁྱིམ་ཁྱབ་ཁོངས་སློབ་གྲྭ་༧ དང་། སཾ་བྷོ་ཊའི་ཁྱབ་ཁོངས་སློབ་གྲྭ་༤ ། མ་སུ་རི་བོད་ཁྱིམ་ཁྱབ་ཁོངས་སློབ་གྲྭ་༣ ། བོད་སློབ་འཛིན་ཚོགས་ཁྱབ་ཁོངས་སློབ་ཁག་༥ བཅས་ཡིན།
རྒྱ་གར་ནང་སྒོ་རྒྱ་བསྡམས་པའི་བཀའ་རྒྱ་གསལ་བསྒྲགས་གནང་སྐབས་འཛིན་རིམ་བཅུ་གཉིས་ཀྱི་རྒྱལ་ཡོངས་ཡིག་རྒྱུགས་འགྲོ་མུས་ཡིན་སྟབས། གོང་གསལ་སློབ་ཕྲུག་གི་ཁྲོད་ནས་མང་ཆེ་བ་འཛིན་རིམ་བཅུ་གཉིས་ཀྱི་སློབ་ཕྲུག་ཡིན་པ་མ་ཟད། སྐབས་དེར་འགྲིམ་འགྲུལ་བཀག་སྡོམ་གྱི་རྐྱེན་གྱིས་སློབ་ཕྲུག་རྣམས་རང་ཁྱིམ་དུ་ལོག་ཐུབ་མེད། དེས་ན་སློབ་ཕྲུག་དེ་དག་ཡིག་རྒྱུགས་ཀྱི་དུས་ཚོད་གསར་པ་དང་འབྲེལ་བའི་གསལ་བསྒྲགས་ངང་སྒུག་བྱེད་ནས་སྡོད་དགོས་བྱུང་ཞིང་། སྒོ་རྒྱ་བསྡམས་པའི་བཀའ་རྒྱ་མུ་མཐུད་ཕར་འགྱངས་སོང་བ་བཞིན། ཤེས་རིག་ལས་ཁུངས་ལའང་སློབ་ཕྲུག་འདི་དག་ལ་སེམས་ཁམས་སློབ་གསོ་དང་ཤེས་ཡོན་ཐོག་རྒྱབ་སྐྱོར་དང་ཆབས་ཅིག ཉིན་རེའི་དགོས་མཁོ་ཆེ་བའི་འཁྲུད་རྫས་དང་ཡིག་ཆས་སོགས་ཀྱི་ཅ་དངོས་ཉོ་སྒྲུབ་སླད་དངུལ་གྱི་རོགས་སྐྱོར་ཡང་དགོས་གལ་ཆེ་བའི་མྱོང་ཚོར་བྱུང་། དེས་ན་གོང་གསལ་གཏན་སློབ་ཁག་༡༩ ནས་སློབ་ཕྲུག་གི་ཐོ་གཞུང་ཕུལ་འབྱོར་བྱུང་བ་བཞིན། སློབ་ཕྲུག་རེར་ཧིན་སྒོར་༢༠༠༠ ཐམ་པའི་རོགས་དངུལ་བགོ་འགྲེམས་ཞུས་ཡོད། ངལ་སེལ་རོགས་དངུལ་གྱི་དངུལ་འབོར་རྣམས་ཁེ་ན་ཌའི་རོགས་ཚོགས་ནས་རོགས་སྐྱོར་གནང་བ་ཞིག་ཡིན།
