ཕྱི་ལོ་ ༢༠༢༠ ཟླ་ ༦ ཚེས་ ༢༢ རེས་གཟའ་ཟླ་བ།
༄༅། །སུད་སི་གྲོང་ཁྱེར་ཇི་ནི་བར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྷན་ཁང་དུ་ལྷན་ཚོགས་ཐེངས་ ༤༤ འཚོགས་ལ་ཉེ་བར་བརྟེན། ཕྱི་ལོ་ ༢༠༢༠ ཟླ་ ༦ ཚེས་ ༡༩ རེས་གཟའ་པ་སངས་ཉིན་སུད་སི་དང་ལེག་ཊིན་སི་ཊེན་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་རྒྱལ་ཚོགས་ཀྱི་མདུན་ཐང་དུ་རྒྱ་ནག་གཞུང་གིས་བོད་ནང་མུ་མཐུད་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་དང་གཏོང་བཞིན་པར་མཚམས་འཇོག་དགོས་པའི་ཞི་བའི་ངོ་རྒོལ་གྱིས་སྐད་འབོད་གནང་ཡོད།
དེ་ཡང་ལྷན་ཚོགས་ཐེངས་ ༤༣ དེ་བཞིན་རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཀྱི་རྐྱེན་པས་དུས་ཐོག་ཚོགས་མ་ཐུབ་པར། འདི་ཟླའི་ཚེས་ ༡༥ ནས་ ༢༢ བར་བསྐོང་ཚོགས་གནང་ཡོད། ཕྱོགས་མཚུངས་ལྷན་ཚོགས་ཐེངས་ ༤༤ དེ་བཞིན་ཕྱི་ཚེས་ ༣༠ ནས་ཟླ་ ༧ ཚེས་ ༢༡ བར་འཚོགས་གཏན་འཁེལ་འདུག
དེ་ཡང་གོང་ཚེས་ཉིན་གྱི་འདུ་འཛོམས་སུ་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ད་ཆ་བོད་ནང་གི་འགྲོ་བ་མིའི་ཐོབ་ཐང་ཉིན་རེ་བཞིན་ཇེ་སྡུག་ཏུ་འགྲོ་བཞིན་ཡོད་སྐོར་སོགས་ངོ་སྤྲོད་དང་འབྲེལ་བོད་མི་རྣམས་ནས་མུ་མཐུད་བོད་དོན་ཞུ་གཏུག་གི་ལས་འགུལ་རྒྱ་ཆེ་སྤེལ་དགོས་སྐོར་སོགས་དང་། གཞན་ཡང་ཁོང་གིས་དེང་སྐབས་རྒྱ་ནག་གཞུང་གིས་ཏོག་དབྱིབས་གཉན་རིམས་སྔོན་འགོག་བྱེད་རྒྱུའི་ཚབ་ཏུ་ནད་ཡམས་དེ་རྒྱལ་ཁབ་གཞན་ནས་ཁྱབ་ཡོད་སྐོར་སོགས་རྫུན་གཏམ་བཤད་བཞིན་ཡོད། ནད་ཡམས་དེ་བརྒྱུད་ནས་འཛམ་གླིང་མི་མང་གིས་རྒྱ་ནག་གི་སྲིད་བྱུས་ངན་པ་མངོན་གསལ་དོད་པོའི་ངང་མཐོང་ཐུབ་པ་བྱུང་ཡོད་སྐོར་དང་། མཐར་བོད་དོན་བདེན་མཐའ་མྱུར་དུ་གསལ་བའི་སྨོན་ལམ་ཡོད་སྐོར་སོགས་གསུངས།
དེ་ནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ལགས་ཀྱིས་ཏོག་དབྱིབས་གཉན་རིམས་ཀྱི་རྐྱེན་པས་རྒྱ་གཞུང་གིས་གཞིས་བཞུགས་བོད་མི་རྣམས་ལ་དམ་བསྒྲགས་དང་དཀའ་ངལ་ཇེ་ཆེར་སྤྲོད་བཞིན་ཡོད་སྐོར་སོགས་ཀྱི་གསུང་བཤད་གནང་།
དེ་ཡང་སུད་སི་སྐུ་ཚབ་དོན་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་དང་ནོར་བུ་ལགས་རྣམ་གཉིས་ཀྱིས་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྤྱི་ཁྱབ་འགན་འཛིན་ལྕམ་ Michelle Bachelet མཆོག་ལ་དོན་ཚན་ལྔ་ཅན་གྱི་བོད་དོན་ཞུ་སྙན་ཞིག་ཕུལ་བའི་ནང་།
༡ ༽ ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ཡབ་ཡུམ། བྱ་བྲལ་རིན་པོ་ཆེ། བོད་མི་ཆབ་སྲིད་བཙོན་པ་རྣམས་མགྱོགས་མྱུར་གློད་བཀྲོལ་དགོས་པ།
༢ ༽ རྒྱ་ནག་གི་དབང་སྒྱུར་འོག་ཡོད་པའི་བོད་མི་རྣམས་ཀྱི་ཆོས་ཕྱོགས་ཀྱི་བྱེད་སྒོར་ཐེ་བྱུས་མི་ཆོག་པ།
༣ ༽ བོད་ནང་རང་དབང་ཐོག་དངོས་ཡོད་གནས་སྟངས་རྟོག་ཞིབ་སླད་མི་སྣ་ཕེབས་འཇུག་དགོས་པ།
༤ ༽ བོད་མིར་རང་དབང་དང་དྲང་བདེན་གྱི་ཐོག་ནས་ཁྲིམས་གཏུག་གནང་རྒྱུའི་ཐོབ་ཐང་དགོས་པ།
༥ ༽ བོད་ནང་གཞི་རྩའི་འགྲོ་བ་མིའི་ཐོང་ཐང་གིས་གཙོས་ཆོས་དད་རང་དབང་དང་། སྐད་ཡིག་རང་དབང་། སྨྲ་བརྗོད་དང་འགྲོ་བསྐྱོད། འདུ་འཛོམས་རང་དབང་བཅས་ལ་དམ་བསྒྲགས་བྱེད་མི་ཆོག་སྐོར་འཁོད་འདུག
སྐབས་དེར་སྤྱི་འཐུས་ཟམ་མདོ་བྱམས་པ་ཚེ་རིང་ལགས་དང་ས་གནས་ཀྱི་བུད་མེད་དང་གཞོན་ནུ་ལྷན་ཚོགས། དེ་བཞིན་སུད་བོད་མཐུན་ཚོགས་བཅས་ཀྱི་ཚོགས་གཙོ་དང་སྐུ་ཚབ་འཐུས་མི་སོགས་ནས་ལས་འགུལ་ཐོག་གཏམ་བཤད་གནང་ཡོད་པ་བཅས། །
