ཕྱི་ལོ་ ༢༠༢༠ ཟླ་ ༦ ཚེས་ ༢ རེས་གཟའ་མིག་དམར།
༄༅། །ཉེ་ལམ་རྒྱ་གར་བྱང་ཕྱོགས་ལ་དྭགས་ཕྱོགས་སུ་རྒྱ་དཀར་ནག་གཉིས་ཀྱི་ས་མཚམས་ཟེར་བའི་ས་ཁུལ་དུ་རྒྱ་མིས་སླར་ཡང་དཔུང་འཇུག་བྱེད་རྐྱེན་རྒྱ་གར་དམག་མིས་གདོང་ལེན་བྱས་ཡོད། གནད་དོན་དེ་ལ་བརྟེན་ནས་སྤྱི་ཚོགས་ནང་གླེང་སློང་ཆེན་པོ་བྱུང་ཞིང་། ལྷག་པར་རྒྱ་གར་གསར་ལས་ཚན་པ་ India Today ཞེས་པའི་གསར་འགོད་པ་ལྕམ་སྐུ་གཱི་ཏ་མོ་ཧན་Geeta Mohan ལགས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་བཅར་འདྲི་ཞུས་འདུག
སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་ཀྱི་གནད་དོན་གསལ་བ་ཡིན་ན། རྒྱ་དཀར་ནག་གཉིས་ཀྱི་ས་མཚམས་ཀྱི་དཀའ་ངལ་རང་བཞིན་གྱིས་སེལ་ཐུབ་པ་དང་། དེའི་རྒྱུ་མཚན་ནི་འཕགས་བོད་ས་མཚམས་ནི་ལོ་ངོ་ཉིས་སྟོང་གསུམ་སྟོང་གི་ལོ་རྒྱུས་ཡོད་པ་དང་། ད་ལྟའི་རྒྱ་དཀར་ནག་གཉིས་ས་མཚམས་ཐོག་རྩོད་གཞི་ཆགས་པ་དེ་ནི་རྒྱ་ནག་གཞུང་གིས་བོད་ས་བཙན་བཟུང་བྱས་པའི་ཉེར་ལེན་ལས་བྱུང་ཚུལ་དང་། རྒྱུ་མཚན་དེ་ལ་བརྟེན་ནས་རྒྱ་དཀར་ནག་གཉིས་ཀྱི་འབྲེལ་ལམ་ཐོག་བོད་དེ་བཞིན་ཧ་ཅང་གནད་འགག་ཆེན་པོ་ཆགས་ཚུལ། དེ་སྔ་བོད་དེ་བཞིན་རང་བཙན་གཙང་མའི་རྒྱལ་ཁབ་ཡིན་སྐབས་འཕགས་བོད་ས་མཚམས་སྲུང་སྐྱོབ་ཆེད་ད་ལྟ་ནང་བཞིན་ལོ་རེར་རྒྱ་གར་གྱི་ས་མཚམས་སྲུང་སྐྱོབ་ཆེད་ཨ་སྒོར་ཐེར་འབུམ་ ༦༠ འགྲོ་སོང་གཏོང་བཞིན་པའི་གནས་སྟངས་དེ་འདྲ་ཞིག་རྩ་བ་ནས་དགོས་མཁོ་ཆགས་མི་སྲིད་པ་དང་། འབྱུང་འགྱུར་བོད་དེ་བཞིན་ཞི་བའི་བསྟི་གནས་ཤིག་ཏུ་བསྒྱུར་ཐུབ་ཚེ་ཨེ་ཤི་ཡའི་སྟོབས་ཆེན་རྒྱལ་ཁབ་གཉིས་དབར་རྒྱུན་གནས་ཐུབ་པའི་འཆམ་མཐུན་གྱི་ཁོར་ཡུག་བསྐྲུན་ཐུབ་ངེས་ཡིན། ཞེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་ལན་འདེབས་གནང་སྐབས་བོད་རིགས་ཚོས་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་རྩོད་བཞིན་ཡོད་པའི་སྐོར་ལ་གསུང་དོན། ང་ཚོས་བོད་རང་བཙན་དགོས་ཟེར་གྱི་མེད། ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་མཛད་པའི་དབུ་མའི་ལམ་གྱི་སྲིད་བྱུས་གཞིར་བཟུང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་རྩོད་ཀྱི་ཡོད། དེར་བརྟེན་བོད་མིའི་སྒྲིག་འཛུགས་ཀྱི་ལངས་ཕྱོགས་ནི་དབུ་མའི་ལམ་གྱི་སྲིད་བྱུས་ཡིན། སྲིད་བྱུས་དེའི་འོག་བོད་རིགས་གནས་སྡོད་ཀྱི་ས་ཁུལ་ཡོངས་རྫོགས་ཆོས་དང་རིག་གཞུང་། སྐད་ཡིག ཡུལ་གོམས་གཤིས་ལུགས་གཅིག་གྱུར་ཡིན་སྟབས། ས་ཁུལ་དེ་དག་ཡོངས་རྫོགས་འཛིན་སྐྱོང་གཅིག་གི་འོག་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་རྩོད་བཞིན་ཡོད།
སྤྱིར་བོད་ཅེས་པ་ནི་ཆོལ་ཁ་གསུམ་ཚང་བའི་བོད་ལ་གོ་དགོས། དེང་སྐབས་རྒྱ་ནག་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བ་དེ་ལྟར་ན། དབུས་གཙང་མ་གཏོགས་ཁམས་དང་ཨ་མདོ་རྒྱ་ནག་གི་ས་ཁོངས་སུ་ཟླ་སྒྲིལ་བཏང་ཡོད། ཨ་མདོ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་ཡུལ་རེད། ང་རང་ལ་མཚོན་ནའང་ངའི་ཕ་མེས་ཡང་མེས་དེ་དག་སྐྱེ་ཡུལ་ཁམས་རེད། འོན་ཀྱང་བོད་རང་སྐྱོང་ལྗོངས་ཟེར་བའི་ནང་ས་ཁུལ་དེ་དག་ཚུད་མེད། དེར་བརྟེན་བོད་རིགས་གནས་སྡོད་ཀྱི་ས་ཁུལ་ཡོངས་རྫོགས་འཛིན་སྐྱོང་གཅིག་འོག་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་དགོས་རྒྱུ་དེ་ང་ཚོའི་དགོས་འདུན་ཡིན།
དེ་སྔ་མེག་མོ་ཧན་ས་ཐིག་ཅེས་པ་དེ་ལྟར་ན་གཙོ་ཆེར་རྒྱ་གར་བྱང་ཤར་ཨ་རུ་ནཱ་ཅལ་ས་ཁུལ་ཆགས་ཡོད། སྐབས་དེར་རྟ་དབང་དེ་རྒྱ་གར་གྱི་ས་ཆ་ཡིན་པ་བོད་གཞུང་གི་སྐུ་ཚབ་ཏུ་བློན་ཆེན་བཤད་སྒྲ་དཔལ་འབྱོར་རྡོ་རྗེས་ཁས་ལེན་མཚན་རྟགས་བཀོད་ཡོད། དེར་བརྟེན་རྒྱ་གར་གྱི་ས་ཐིག་དེར་མོས་མཐུན་གནང་བཞིན་ཡོད་པ་སྐུ་ཞབས་མེག་མོ་ཧན་གྱིས་བརྗོད་ཡོད། རྒྱ་ནག་གཞུང་ནས་ཀྱང་དེར་དགག་པ་བྱས་མེད། སྐབས་དེར་རྒྱ་ནག་གཞུང་གིས་དགག་པ་བྱེད་ས་ནི་བོད་དང་རྒྱ་ནག་གི་ས་མཚམས་ཡིན་པ་ལས་འཕགས་བོད་གཉིས་ཀྱི་ས་མཚམས་ཐོག་མིན།
ལ་དྭགས་དང་འབྲས་ལྗོངས་ཁུལ་གྱི་རྒྱ་གར་ས་མཚམས་ལ་མཚོན་ན་རྒྱ་དཀར་ནག་གཉིས་དབར་གཉིས་མོས་གན་ཡིག་བཞག་ནས་ས་མཚམས་ལ་བརྩི་བཀུར་ཞུ་རྒྱུའི་ཁས་ལེན་བྱས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་མཛད་པ་ལྟར་ས་ཁུལ་དེ་དག་དམག་འཐབ་སྤོང་ཞིང་འཚེ་མེད་ཞི་བའི་བསྟི་གནས་སུ་བསྒྱུར་ཐབས་བྱེད་དགོས། ད་ལྟའི་ཆར་འདེམས་ཀ་དེ་མ་གཏོགས་མེད། ཅེས་སོགས་ཀྱི་ལན་འདེབས་གནང་འདུག །
