ཕྱི་ལོ་ ༢༠༢༠ ཟླ་ ༦ ཚེས་ ༩ རེས་གཟའ་མིག་དམར།
༄༅། །ལོ་ན་བཅུ་ལ་མ་སོན་པའི་བྱིས་པ་དང་ལོ་དྲུག་ཅུ་རེ་ལྔའི་ཡན་སོན་པའི་བགྲེས་སོང་རྣམས་ལ་ཏོག་དབྱིབས་གཉན་རིམས་ཀྱི་ཉེན་ཁ་ཆེ་བ་ཡོད་སྟབས། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་ཏོག་དབྱིབས་གཉན་རིམས་སྔོན་འགོག་དང་ལུས་ཟུངས་གསོ་སླད་བཙན་བྱོལ་བོད་མི་ལོ་ན་ ༦༥ ཡན་སོན་པ་རྣམས་ལ་བོད་ཀྱི་ཐུན་མོང་མ་ཡིན་པའི་གསོ་བ་རིག་པ་ལས་ཐོན་པའི་རིན་ཆེན་མང་སྦྱོར་ཆེན་མོ་དང་རིན་ཆེན་གྲང་སྦྱོར་ཆེན་མོ་སོགས་རིན་ཆེན་རིལ་བུ་ཁག་གཅིག་རིན་མེད་སྨན་སྦྱིན་གནང་ཡོད།
དེ་ཡང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་ཀྱིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་བོད་མིའི་སྒྲིག་འཛུགས་ཀྱི་འབད་བརྩོན་ལ་བརྟེན་ནས་འཕྲོད་བསྟེན་ལས་ཁུངས་ཀྱི་ངོས་ནས་བཙན་བྱོལ་བོད་མིའི་སྤྱི་ཚོགས་ཁྲོད་དགོས་ངེས་ཅན་རིགས་ལ་རིན་ཆེན་རིལ་བུ་སྨན་སྦྱིན་གནང་དང་གནང་བཞིན་ཡོད། རིན་ཆེན་རིལ་བུ་སྨན་སྦྱིན་འདིས་ཅི་ཙམ་ཕན་ཐོགས་འབྱུང་གི་ཡོད་མེད་ང་ཚོའི་ངོས་ནས་མང་ཚོགས་ཀྱི་བསམ་ཚུལ་ལ་སྒུག་བཞིན་ཡོད། ཅེས་གསུངས།
ད་བར་འཕྲོད་བསྟེན་ལས་ཁུངས་ནས་རྒྱ་གར་ནང་བཙན་བྱོལ་བོད་མིའི་གཞིས་ཆགས་ཁག་ ༢༥ ཙམ་ནང་ཡོད་པའི་ལོ་ན་ ༦༥ ཡན་སོན་པའི་རྒན་འཁོགས་དང་འགོག་དབྱེ་ཟུར་འཇོག་ཁང་དུ་ཡོད་པའི་བོད་མི་ཚོར་རིན་ཆེན་རིལ་བུ་ཤོག་བཏུམས་ ༩༧༣ སྨན་སྦྱིན་གནང་ཡོད་པ་མ་ཟད། རིམ་པས་བལ་ཡུལ་དང་འབྲུག་ནང་ཡོད་པའི་བོད་མི་ཚོ་ལའང་གཅིག་མཚུངས་སུ་སྨན་སྦྱིན་གནང་རྒྱུ་ཡིན་པ་བཅས།།
