ཕྱི་ལོ་ ༢༠༢༠ ཟླ་ ༦ ཚེས་ ༢༢ རེས་གཟའ་ཟླ་བ།

༄༅ ། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༢༠ ཟླ་ ༦ ཚེས་ ༡༨ ཉིན་རྒྱ་གར་གྱི་གསར་འགྱུར་ཚན་པ་འདྲ་མིན་གྱི་གསར་འགོད་པའི་དྲི་བར་ལན་འདེབས་གནང་ཡོད།

དེ་ཡང་གོང་ཚེས་ཉིན་ Zee News ཞེས་པའི་གསར་འགོད་པ་ཨ་ཏི་ཐི་ཏྱ་གྷི་ Aditi Tyagi ལགས་ཀྱི་དྲི་བར་དཔལ་ལྡན་སྲིད་སྐྱོང་མཆོག་གིས་ལན་འདེབས་གནང་དོན། གལ་ཏེ་རྒྱ་ནག་གཞུང་གི་སེམས་ཁམས་དང་བསམ་བློ་འཁྱེར་སོ་སྐོར་ཤེས་འདོད་ན། ང་ཚོས་ངེས་པར་དུ་ཀྲུང་གོ་ཞེས་པའི་ཐ་སྙད་ལ་རྒྱུས་མངའ་བྱེད་དགོས། ཀྲུང་གོ་ཞེས་པའི་གོ་དོན་ནི། དབུས་སམ་དཀྱིལ་ཞེས་པའི་རྒྱལ་ཁབ་མཚོན་གྱི་ཡོད། རྒྱ་ནག་གཞུང་གིས་རྒྱ་ནག་ནི་འཛམ་གླིང་རྒྱལ་ཁབ་གཞན་ལས་ཁྱད་དུ་འཕགས་པ་ཞིག་ཡིན་པ་བསམ་བཞིན་ཡོད། དེར་བརྟེན་རྒྱ་ནག་གིས་ཁྱིམ་མཚེས་རྒྱལ་ཁབ་ཁག་ལ་ལྟ་རྟོག་དགོས་པའི་འགན་ཡོད་སྙམ་བཞིན་ཡོད་པ་མ་ཟད། བསམ་བློ་གཏོང་ཕྱོགས་འདི་འདྲ་བཟུང་བའི་ཐོག་ནས་བོད་ས་བཙན་བཟུང་བྱས་པ་རེད།

ལ་དྭགས་དང་རྒྱ་གར་ནི་རྒྱ་ནག་གི་མཐའ་འཁོབ་ཏུ་ཡོད་སྟབས། རྒྱ་ནག་གཞུང་གིས་མཐའ་མཚམས་ས་ཁུལ་དེ་དག་ལ་བདག་དབང་ཡོད་སྙམ་བཞིན་ཡོད། རྒྱ་ནག་གཞུང་གིས་བོད་ས་བཙན་བཟུང་བྱས་ཏེ་བོད་ཀྱི་ཁོར་ཡུག་གཏོར་བཤིག་དང་འགྲོ་བ་མིའི་ཐོབ་ཐང་ལ་རྩིས་མེད་རྡོལ་རོལ་བཏང་དང་གཏོང་བཞིན་ཡོད། རྒྱ་ནག་གཞུང་གི་བསམ་བློ་འཁྱེར་སོ་འདི་ལྟར་ཡིན།

རྒྱ་ནག་གཞུང་གི་དམག་བྱུས་དེ་ཤེས་དགོས་རྒྱུ་ཧ་ཅང་གལ་ཆེན་པོ་ཡིན། རྒྱ་ནག་བཅིངས་བཀྲོལ་དམག་གིས་འདས་པའི་ལོ་ངོ་བདུན་རིང་རྒྱ་གར་གྱི་ས་མཚམས་སུ་འཛུན་སྐྲུན་བྱས་དང་བྱེད་བཞིན་ཡོད།  འོན་ཀྱང་རྒྱ་གར་གྱིས་འཛུགས་སྐྲུན་བྱས་པ་ཁག་ལ་རྒྱ་ནག་གཞུང་གིས་ངོ་རྒོལ་བྱེད་བཞིན་ཡོད་པར་བརྟེན་ད་ལྟའི་རྙོག་གླེང་འདི་ཡོང་བཞིན་ཡོད།  

དེ་སྔ་རྒྱ་ནག་གཞུང་བོད་ཀྱི་ས་ཐོག་ཏུ་ཐོག་མར་འཛུལ་ཡོང་སྐབས་བོད་མི་རྣམས་ཀྱི་འཚོ་བ་ཡར་རྒྱས་གཏོང་རྒྱུ་དེ་ཁོ་པའི་འགན་གཙོ་བོ་ཡིན་ཁུལ་བྱས་ནས་གཞུང་ལམ་གསར་རྒྱག་བྱས་ཡོད། འོན་ཀྱང་མི་རིང་བར་གཞུང་ལམ་དེ་དག་ཐོག་རྒྱ་མིའི་དམག་མི་དང་དོས་འཁོར།  མེ་འདའ་སོགས་འོར་འདྲེན་བྱས་མཐར་བོད་ས་དབང་སྒྱུར་བྱས་ཏེ་བོད་ནང་ཡར་རྒྱས་ལས་གཞིའི་མིང་ཁྱེར་ནས་གཏེར་ཁ་རིགས་སྔོག་འདོན་བྱས་དང་བྱེད་བཞིན་ཡོད་པ་མ་ཟད། རྒྱ་ནག་གཞུང་གིས་བོད་ཀྱི་གཙང་པོ་ཁག་ལ་ཆུ་མཛོད་ཚད་མེད་བརྒྱབ་པ་དང་། གཙང་པོ་ཁ་སྒྱུར་བྱས་པ་སོགས་ལ་བརྟེན་ནས་བོད་ཀྱི་རང་བྱུང་ཁོར་ཡུག་ལ་དོ་ཕོག་ཚབས་ཆེན་བྱུང་དང་འབྱུང་བཞིན་ཡོད། དུས་ད་ལྟ་ཡིན་ནའང་རྒྱ་ནག་གཞུང་གིས་བོད་ནང་རྒྱ་ནག་སླེབས་པར་བརྟེན་བོད་ནང་ཡར་རྒྱས་ཕྱིན་ཡོད་པ་དང་བོད་མི་ཚོར་ཁེ་ཕན་བྱུང་ཡོད་སྐོར་སོགས་བརྗོད་བཞིན་ཡོད། 

རྒྱ་ནག་བཅིངས་བཀྲོལ་དམག་གིས་རྒྱ་གར་གྱི་ས་མཚམས་སུ་བཙན་འཛུལ་བྱས་པ་དེའི་རྒྱབ་ལོགས་ལ་རྒྱ་ནག་གི་སྲིད་འཛིན་ཞི་ཅིན་ཕིང་ཡོད་པ་མ་ཟད། ཁོང་གིས་རྒྱ་ནག་གཅིག་པུའི་འགོ་ཁྲིད་བྱེད་རྒྱུ་ཙམ་མ་ཡིན་པར་འཛམ་གླིང་ཡོངས་ཀྱི་འགོ་ཁྲིད་བྱེད་འདོད་ཡོད་པ་དང་། ཞི་ཅིན་ཕིང་གིས་རྒྱ་ནག་གི་ཁྱིམ་མཚེས་རྒྱལ་ཁབ་ཚང་མའི་བདག་དབང་རྩོད་ཀྱི་ཡོད་ཀྱང་ཏོག་དབྱིབས་གཉན་རིམས་འཛམ་གླིང་ས་ཕྱོགས་གང་སར་ཁྱབ་བརྡལ་དུ་འགྲོ་དང་འགྲོ་བཞིན་པའི་འགན་ལེན་འདོད་བྱེད་ཀྱི་ཡོད་པ་མ་རེད། འདི་ནི་རྒྱ་གར་གཞུང་མང་གཉིས་ནས་རྒྱ་ནག་སྐོར་མཁྱེན་དགོས་པའི་བསླབ་བྱ་ཞིག་ཡིན། ཞེས་གསུངས།།