ཕྱི་ལོ་ ༢༠༢༠ ཟླ་ ༦ ཚེས་ ༡ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་ནས་ཟླ་ ༦ ཚེས་ ༡ ཉིན་བཏང་གནས་ནང་འཁོད་དོན། རྒྱ་གར་རྒྱལ་ཡོངས་གནམ་གྲུ་དང་མེ་འཁོར་རླངས་འཁོར་བཅས་འགྲུལ་བཞུད་འགོ་འཛུགས་གནང་ཡོད། དེར་བརྟེན་རྡ་སར་ཕྱི་ནས་བོད་མི་ཡོང་མཁན་ཇེ་མང་དུ་འགྲོ་རྒྱུར་དམིགས་ནས་བོད་མིའི་སྒྲིག་འཛུགས་ཀྱིས་ཕྱི་ནས་ཕེབས་མཁན་བོད་མི་དེ་དག་འགོག་དབྱེ་ཟུར་འཇོག་ཆེད་དབུས་སྣེ་ལེན་ཁང་དང་། ཤུག་གསེབ། ཤེས་རབ་དགའ་ཚལ་སློབ་གླིང་བཅས་སུ་ཁང་པའི་མཐུན་འགྱུར་སྦྱར་ཡོད། ད་བར་ཟུར་བཞུགས་བོད་མི་གྲངས་ ༥༡ ལ་རྒྱ་གར་གཞུང་གིས་ Covid-19 ནད་གཞི་ཡོད་མེད་བརྟག་དཔྱད་གནང་བས་བོད་མི་ ༥༡ ཚང་མར་ནད་གཞི་ཕོག་མེད་པའི་བརྟག་དཔྱད་གྲུབ་འབྲས་ཐོན་ཡོད།
ནད་ཡམས་ཁྱབ་བརྡལ་སྔོན་འགོག་ཆེད་ཕྱི་ནས་བོད་མི་འབྱོར་མཁན་རྡ་སར་འབྱོར་ཉིན་ནད་རྟགས་ཡོད་མེད་བརྟག་དཔྱད་བྱས་རྗེས་ཉིན་གྲངས་ ༡༤ རིང་སྒྲིག་འཛུགས་ཀྱི་འགོག་དབྱེ་ཟུར་འཇོག་ཁང་དང་དེ་ནས་ཉིན་གྲངས་ ༡༤ རང་ ཁྱིམ་དུ་ཟུར་བཞུགས་ཀྱིས་ནད་རྟགས་ཡོད་མེད་རྟོག་ཞིབ་གནང་བཞིན་ཡོད། ད་ལྟའི་ཆར་ཁྱོན་བོད་མི་གྲངས་ ༨༣ སྒྲིག་འཛུགས་ནས་མཐུན་འགྱུར་སྦྱོར་བའི་འགོག་དབྱེ་ཟུར་འཇོག་ཁང་དུ་གནས་བཞུགས་གནང་བཞིན་ཡོད།
བོད་མིའི་སྒྲིག་འཛུགས་ཀྱི་ལམ་སྟོན་འོག་ས་གནས་སུ་འཕྲོད་བསྟེན་ཚོགས་ཆུང་གི་ཚོགས་གཙོ་སྟེ་ས་གནས་འགོ་འཛིན་གཙོས་བརྒྱ་དཔོན་དང་དང་བླངས་ལས་མི་བཅས་ནས་འགོག་དབྱེ་ཟུར་འཇོག་ཁང་དུ་ཉལ་ཁྲི་དང་གདན། དེ་བཞིན་ཟ་བཅའ་དང་མཐུན་འགྱུར་ཅ་དངོས་རྣམས་མཐུན་འགྱུར་སྦྱོར་བཞིན་ཡོད་ལ་འདི་ག་རྡ་ས་ཁུལ་དུ་ས་གནས་འགོ་འཛིན་ཀུན་དགའ་ཚེ་རིང་ལགས་ཀྱིས་གཙོ་འགན་བཞེས་ནས་དང་བླངས་དང་འབྲེལ་ཡོད་ལས་བྱེད་བཅས་ཚང་མས་མཉམ་རུབ་ཀྱིས་ནད་ཡམས་ཁྱབ་བརྡལ་སྔོན་འགོག་གི་ལས་དོན་ཚགས་ཚུད་གནང་བཞིན་ཡོད།
འགོག་དབྱེ་ཟུར་འཇོག་དང་འབྲེལ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ནས། “ད་ལྟའི་ཆར་ནད་ཡམས་འདི་ལ་སྨན་བཅོས་གང་ཡང་མེད་སྟབས། རང་ཉིད་ཁང་ཁྱིམ་དུ་འགོག་དབྱེ་ཟུར་བཞུགས་གནང་རྒྱུ་དེ་ད་ཆ་སྨན་བཅོས་ཡག་ཤོས་དེ་ཡིན་”ཞེས་གསུངས།
ཕྱི་མི་གང་ཞིག་རྒྱ་གར་ནང་གི་ས་གནས་དམར་རྟགས་ཅན་ནས་ཕེབས་པ་རྣམས་མངའ་གཞུང་གིས་ཀངྒ་རར་གོ་སྒྲིག་བྱས་པའི་ཚོགས་སྡེའི་ཟུར་འཇོག་ཁང་དུ་ཤར་བསྐྱོད་གནང་དགོས་ཀྱི་ཡོད་པ་དང་། ས་གནས་ལྗང་ཁུ་དང་ལི་ཝང་ནས་ཡིན་པ་རྣམས་བོད་མིའི་སྒྲིག་འཛུགས་ནས་གོ་སྒྲིག་ཞུས་པའི་འགོག་དབྱེ་ཟུར་འཇོག་ཁང་དུ་ཕེབས་དགོས་པ་ཡིན། དེར་ཉིན་ལྟར་ནད་རྟགས་ཡོད་མེད་རྟོག་ཞིབ་དང་དགོས་མཁོ་ཡོད་མཁན་རྣམས་ལ་གསོ་རིག་ལུས་སེམས་ནུས་གསོའི་སྨན་རིན་མེད་ཐོག་འབུལ་བཞིན་ཡོད། ད་ལྟའི་ཛ་དྲག་གི་གནས་སྟངས་འདིར་མི་རྣམས་ལ་སེམས་ཁམས་ཀྱི་དཀའ་ངལ་ཆེན་པོ་ཡོང་གི་ཡོད་སྟབས། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་ཚན་པའི་ཆེད་ལས་པས་ཟུར་བཞུགས་བོད་མི་རྣམས་ལ་ཁ་པར་ཐོག་འབྲེལ་འདྲིས་གནང་ནས་སློབ་གསོ་དགོས་མཁོའི་རིགས་ལ་འབྲེལ་ཡོད་ལས་བྱེད་ནས་སློབ་གསོ་ལམ་སྟོན་གནང་བཞིན་ཡོད་པ་བཅས། །
