ཕྱི་ལོ་ ༢༠༢༠ ཟླ་ ༦ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༦ ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་བོད་ཀྱི་བརྙན་འཕྲིན་བརྒྱུད་གསུང་དོན། དེ་རིང་འདིར་བཅར་དགོས་དོན་ནི། བཙན་བྱོལ་བོད་མིའི་གཞིས་ཆགས་ཁག་གི་ནང་དུའང་ཏོག་དབྱིབས་གཉན་རིམས་ཁྱབ་བརྡལ་འགྲོ་བཞིན་ཡོད་པར་བརྟེན་འདིའི་སྐོར་གཅིག་ཞུ་ན་དྲན་བྱུང་། སྤྱིར་འཛམ་གླིང་ནང་མི་གྲངས་ས་ཡ་བརྒྱད་ལྷག་ཙམ་ལ་ཏོག་དབྱིབས་གཉན་རིམས་འགོས་ཟིན་པ་རེད། དེ་བཞིན་མི་གྲངས་འབུམ་བཞི་ལྷག་ཙམ་འདས་གྲོངས་སུ་གྱུར་ཡོད་པ་མ་ཟད། འཛམ་གླིང་གི་དཔལ་འབྱོར་ལ་དོ་ཕོག་ཧ་ཅང་ཆེན་པོ་ཕྱིན་ཡོད། འཛམ་གླིང་འཕྲོད་བསྟེན་ལྷན་ཚོགས་ཀྱི་ཚོགས་མི་རྒྱལ་ཁབ་བརྒྱ་དང་སུམ་ཅུ་ལྷག་གིས་ནད་ཡམས་འདིའི་འབྱུང་ཁུངས་གང་ནས་ཡིན་པ་ཞིབ་འཇུག་བྱེད་དགོས་ཀྱི་འདུག་ཅེས་ཉེས་པ་གང་གཏོང་དགོས་མིན་བཀའ་བསྡུར་ཤུགས་ཆེ་གནང་བཞིན་ཡོད།
བོད་མིའི་སྒྲིག་འཛུགས་ནས་ཕྱི་ཟླ་ ༣ ཚེས་ ༡༧ ཉིན་རྒྱ་གར་རྒྱལ་ཡོངས་སུ་བདུན་ཕྲག་གཉིས་གསུམ་རིང་ཐེམ་སྤང་བཀའ་རྒྱ་གནང་སྲིད་པ་རེད། དེར་བརྟེན་སྔོན་ཚུད་ནས་བཟའ་བཅའི་རིགས་ཉོ་དགོས་པ་དང་། ལས་ཁུངས་ཁག་ལ་དུག་སེལ་དགོས་པའི་ལམ་སྟོན་གནང་ཡོད། དེ་བཞིན་ཕྱི་ཟླ་ ༥ ཚེས་ ༣ རྗེས་གནས་སྟངས་ཇེ་སྡུག་ཏུ་འགྲོ་བཞིན་ཡོད། འོན་ཀྱང་མང་ཚོགས་ཀྱི་འཚོ་རྟེན་སོགས་ཀྱི་སླད་རྒྱ་གར་རྒྱལ་ཡོངས་སྒོ་མ་ཕྱེ་དཀའ་མེད་ཡིན་སྟབས། མི་མང་པོ་ཞིག་ཕྱི་ལ་འཐོན་པའི་སྐབས་ནད་ཡམས་ཁྱབ་བརྡལ་ཤུགས་ཆེ་རུ་འགྲོ་ངེས་ལ་སོང་། བཙན་བྱོལ་བོད་མིའི་གཞིས་ཆགས་ཁག་གི་ནང་གནས་སྡོད་བོད་མི་སྤྱི་དང་། ལྷག་པར་ལྡི་ལི་དང་མུམ་བྷེའི་ནང་ཉེན་ཁ་ཆེ་ཤོས་ཡིན་པ། དེ་བཞིན་སྔོན་འགོག་སླད་ཐུགས་སྣང་དགོས་པ་སོགས་ཞིབ་ཕྲ་ཞུས་ཟིན་པ་ཡིན།
ནད་ཡམས་འདིར་ད་ཆ་སྨན་ཁབ་མེད་སྟབས་ཉེན་ཁ་ཆེན་པོ་རྩི་བཞིན་ཡོད་པ་དང་། ནད་ཡམས་འདི་ཕོག་པ་ཡིན་ན་དངངས་སྐྲག་བྱེད་མི་དགོས་སྐོར་ཞུས་པ་ཡིན། འོན་ཀྱང་ནད་པ་དང་དེའི་ནང་མི་བཅས་པར་ལྟ་སྟངས་ངན་པ་དང་། བཀའ་མོལ་རྩུབ་པོ། ཧ་ཅང་དོགས་ཟོན་རིགས་བྱེད་པ་ཡིན་ན། ང་ཚོའི་སྤྱི་ཚོགས་ནང་ཉེན་ཁ་གསར་པ་ཞིག་སླེབ་ས་རེད། གང་ཡིན་ཞེ་ན། གལ་ཏེ་མི་ཞིག་ལ་ནད་ཡམས་དེ་བྱུང་བ་ཡིན་ནའང་གཞན་ལ་གསང་ནས་གཞིས་ཆགས་སྤྱི་ཡོངས་ནང་ཁྱབ་བརྡལ་བྱུང་བའི་ཉེན་ཁ་འདུག
གསལ་བསྒྲགས་གནང་བ་ལྟར་ན་མུམ་བྷེ་དང་ལྡི་ལིའི་ནང་སྨན་ཁང་འདང་ངེས་མེད་པའི་དཀའ་ངལ་འཕྲད་བཞིན་ཡོད། ལྡི་ལིར་ཧ་ཅང་ཉེན་ཁ་ཡོད་པར་བརྟེན་བོད་མི་རྣམས་ངེས་པར་ཕེབས་དགོས་ན་མ་གཏོགས་མི་ཕེབས་རྒྱུ་གཙོ་འདོན་གནང་རོགས། ས་གནས་གང་དུ་ཡོད་ནའང་དེར་མུ་མཐུད་བཞུགས་ན་ཡག་ཤོས་རེད། གལ་ཏེ་ཛ་དྲག་ཕེབས་དགོས་བྱུང་ན་མ་གཏོགས་ལྡི་ལི་བརྒྱུད་ནས་མ་ཕེབས་རོགས།
ད་ལྟའི་ཆར་རྒྱ་གར་ནང་བོད་མི་ཏོག་དབྱིབས་གཉན་རིམས་ཕོག་པ་མི་གྲངས་ ༢༤ བྱུང་བའི་ཁྲོད་ནས་ད་ལྟ་ནད་པ་གྲངས་ ༩ དང་། དྲག་སྐྱེད་བྱུང་བ་ ༡༣ དང་། འདས་གྲོངས་ཕྱིན་པ་ ༢ བྱུང་ཡོད་པའི་ཁོངས་ནས་ཕལ་ཆེ་བ་ལྡི་ལི་བརྒྱུད་ནས་ཕར་འགྲོ་ཚུར་འོང་དང་། ལྡི་ལིར་བཞུགས་མཁན་བཅས་ཆགས་ཀྱི་འདུག དེར་བརྟེན་ལྡི་ལི་ཁུལ་གནས་སྡོད་བོད་མི་རྣམས་ནས་ངེས་པར་དུ་ཐུགས་གཟབ་གནང་རོགས། ལྡི་ལི་བོད་སྒར་བསམ་ཡས་གླིང་ཁུལ་གྱི་ཚོང་ཁང་རྣམས་སྒོ་ཕྱེ་དགོས་པའི་སྐོར་གོ་བསྡུར་འགྲོ་བཞིན་ཡོད་ས་རེད། བོད་མིའི་སྒྲིག་འཛུགས་ནས་ལམ་སྟོན་གང་ཡོད་ཅེ་ན། འཚོ་བ་སྐྱེལ་དགོས་ཀྱི་ཡོད་པ་དངོས་བདེན་རེད། འོན་ཀྱང་རྒྱུ་ནོར་ལས་སྲོག་རྩ་ཆེ་ཡི་རེད། ཅེས་ཞུ་རྒྱུ་ཡིན།
ད་རེས་བཀའ་ཤག་ནས་ལམ་སྟོན་གསར་པ་ཞིག་ཕེབས་ཡོད་པའི་ནང་། བཙན་བྱོལ་བོད་མིའི་གཞིས་ཆགས་ཁག་མུ་མཐུད་ཐེམ་སྤང་བཀའ་རྒྱ་བསྡམས་དགོས། བཙན་བྱོལ་བོད་མིའི་གཞིས་ཆགས་ཁག་དང་། དགོན་སྡེ་ཁག་གི་ནང་དགོས་ངེས་ཅན་གྱི་སྐམ་ཟས་ཚོང་ཁང་དང་། ཟ་ཁང་སོགས་སྒོ་ཕྱེ་པ་ཡིན་ནའང་མི་འགྲོ་གཉིས་ཀྱི་དབར་རྒྱང་ཐག་རིང་ཚད་གང་ཙམ་ངེས་པར་དུ་འཇོག་དགོས་པ་དང་། ཚོང་ཁང་དང་ཟ་ཁང་དེ་དག་གི་ནང་གཞིས་ཆགས་ནང་ཁུལ་གྱི་མི་མ་གཏོགས་ཕྱི་ནས་རྩ་བ་ཉིད་ནས་ཡོང་མི་ཆོག དེ་བཞིན་སྤྲོ་སྐྱིད་དང་རྩེད་རིགས་འདུ་འཛོམས་སོགས་སྔ་འཕྲོས་རིང་མི་གནང་བ་བྱ་དགོས། དགོན་སྡེ་ཁག་གི་དགེ་འདུན་པ་རྣམས་འདུ་ཚོགས་རིགས་མི་གནང་ཐབས་མེད་དང་། ངེས་པར་དུ་སློབ་ཁྲིད་དགོས་པའི་རིགས་ཡོད་ཚེ་དགེ་འདུན་པའི་གྲངས་འབོར་གྱི་བརྒྱ་ཆ་ ༣༠ འདུ་ཆོག་པའི་ལམ་སྟོན་ཞུས་ཡོད།
ད་ཆ་ལྡི་ལི་ཁུལ་དུ་ནད་ཡམས་ཁྱབ་བརྡལ་ཤུགས་ཆེ་འབྱུང་བཞིན་ཡོད་པར་བརྟེན། ལྡི་ལི་ནས་གཞིས་ཆགས་ཁག་ཏུ་ཡོང་མཁན་སུ་ཡིན་ནའང་བདུན་ཕྲག་གཅིག་ཙམ་གྱི་སྔོན་ནས་འབྲེལ་ཡོད་ས་གནས་འགོ་འཛིན་ལ་འབྲེལ་གཏུག་ངེས་པར་དུ་གནང་རོགས་ཞུ་རྒྱུ་དང་། ས་གནས་སུ་ཉིན་གུང་ལ་འབྱོར་ཐབས་གནང་རོགས། གལ་ཏེ་དགོང་མོར་འབྱོར་བ་ཡིན་ན་གྲ་སྒྲིག་ཞུ་རྒྱུར་ཧ་ཅང་ཁག་པོ་ཡོད་འདུག གཞིས་ཆགས་ཁག་གི་ནང་ཕྱི་ནས་ཕེབས་མི་རིགས་བྱུང་ཚེ་མངའ་གཞུང་སོ་སོའི་ལམ་སྟོན་བཀོད་ཁྱབ་ལྟར། ཉིན་གྲངས་བཅུ་བཞིའི་རིང་འགོག་དབྱེ་ཟུར་འཇོག་ཁང་དུ་གནས་དགོས་པ་དང་། Swab Test གནང་རྗེས་ནད་རྟགས་རིགས་མ་ཐོན་ན་ལྷག་འཕྲོས་ཉིན་གྲངས་ཇི་ཡོད་རང་ཁྱིམ་དུ་འགོག་དབྱེ་ཟུར་འཇོག་བྱ་དགོས། འདི་ནས་ཐེ་ཝན་སྐུ་ཚབ་དོན་གཅོད་ཁང་ལ་ལམ་སྟོན་གནང་དོན་ལྟར་ཁ་རས་འབུམ་གཅིག་འབྱོར་གྱི་ཡོད། ཁ་རས་དེ་དག་ཕྱི་ཟླ་ ༧ ནང་རྒྱ་བལ་འབྲུག་གསུམ་ནང་ཡོད་པའི་བཙན་བྱོལ་བོད་མི་རྣམས་ལ་བགོ་འགྲེམས་ཞུ་རྒྱུ་ཡིན། ཁ་རས་བགོ་འགྲེམས་ཞུ་དགོས་དོན་གཙོ་བོ་ནི། ཕྱི་ཟླ་ ༦ དང་ ༧ ནི་ཉེན་ཁ་ཆེ་ཤོས་རེད་ཅེས་དྲན་སྐུལ་ཆེད་ཡིན།
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་རྒྱ་བལ་འབྲུག་གསུམ་ནང་ཡོད་བོད་མི་ལོ་ན་ ༦༥ ཡན་སོན་པའི་རྒན་འཁོགས་དང་། འཕྲོད་ལས་པ། འགོག་དབྱེ་ཟུར་འཇོག་ཁང་དུ་ཡོད་པའི་བོད་མི་ཚོར་རིན་ཆེན་རིལ་བུ་སོགས་མི་གྲངས་ཁྲི་གཅིག་ལ་རིན་མེད་སྨན་སྦྱིན་གནང་རྒྱུ་ཡིན་པ་དེ་བཞིན་བགོ་འགྲེམས་ཞུ་མུས་ཡིན། ཞེས་སོགས་གསུངས།།
