ཕྱི་ལོ་ ༢༠༢༠ ཟླ་ ༥ ཚེས་ ༡༩ རེས་གཟའ་མིག་དམར།

༄༅། །ཨོ་སི་ཊི་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་བརྙན་ཐུང་བརྒྱུད་རྒྱ་ནག་གཞུང་ལ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་གནང་ཡོད།

དེ་ཡང་ཨོ་སི་ཊི་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབས་ཝ་རན་ཨིན་ཆི་ Warren Entsch མཆོག་གིས་གསུང་དོན། རྒྱ་ནག་གཞུང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་ཁྲིད་གསང་ཉར་བྱས་ཏེ་ལོ་ངོ་ ༢༥ འཁོར་བའི་ཉིན་མོ་དང་བསྟུན། ངས་རྒྱ་ནག་གཞུང་ལ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་གཏོང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསུངས།

ཕྱོགས་མཚུངས་གྲོས་ཚོགས་འཐུས་མི་ལྕམ་སུ་སན་ཊེམ་པོལ་མན་མཆོག་ Susan Templeman མཆོག་གིས། འཛམ་གླིང་མི་མང་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐོར་གོ་རྟོགས་ཆེན་པོ་ཡོད་ཀྱང་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་སྐོར་ཤེས་རྟོགས་ཆེན་པོ་མེད། རྒྱུ་མཚན་ནི་རྒྱ་ནག་གཞུང་གིས་༸ཀུན་གཟིགས་པཎ་ཆེན་རིན་པོ་ཆེ་མཆོག་ད་བར་ལོ་ངོ་ ༢༥ རིང་བཙོན་འཇུག་བྱས་པ་རེད། ངས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོད་ཡོང་ཆེད་རྒྱབ་སྐྱོར་ཞུ་རྒྱུ་ཡིན། ཞེས་གསུངས།
གཞན་ཡང་གྲོས་ཚོགས་གོང་མའི་གྲོས་ཚོགས་འཐུས་མི་ནི་ཁི་མེག་ཀིམ་ Nick Mckim མཆོག་གིས། རྒྱ་ནག་གཞུང་གིས་ད་བར་མུ་མཐུད་བོད་ཀྱི་རིག་གཞུང་དང་བོད་མཐོ་སྒང་གི་ཁོར་ཡུག་གཏོར་བཤིག་གཏོང་བཞིན་ཡོད་པས། ང་ཚོས་བོད་དོན་དང་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་ཡོང་བར་རྒྱབ་སྐྱོར་ཞུ་དགོས་པ་དང་། ཨོ་སི་ཊི་ལི་ཡའི་ལྗང་ཁུ་ཚོགས་པའི་ངོས་ནས་ཨོ་སི་ཊི་ལི་ཡའི་གཞུང་ལ་བོད་དོན་དང་༸ཀུན་གཟིགས་པཎ་ཆེན་རིན་པོ་ཆེ་མཆོག་གི་གནད་དོན་ཐད་མི་མང་ལ་བསྒྲགས་གཏམ་སྤེལ་དགོས་པ་དང་། དེ་བཞིན་བོད་དོན་དང་༸ཀུན་གཟིགས་པཎ་ཆེན་རིན་པོ་ཆེ་མཆོག་གི་གནད་དོན་ཐད་རྒྱ་ནག་གཞུང་དང་ལྷན་ཐད་ཀར་གླེང་སློང་གནང་དགོས་པའི་འབོད་སྐུལ་ཞུ་རྒྱུ་ཡིན། ཞེས་གསུངས།།