ཕྱི་ལོ་ ༢༠༢༠ ཟླ་ ༥ ཚེས་ ༡༡ རེས་གཟའ་ཟླ་བ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱིས་འཛམ་གླིང་ཡུལ་གྲུ་སྤྱིའི་རྒྱུན་ལྡན་ལས་དོན་མཐའ་དག་གི་འགྲོ་རྒྱུག་ལ་འགོག་རྐྱེན་ཆེན་པོ་འབྱུང་ཞིང་། ལྷག་པར་དུ་རྒྱ་གར་གྱི་ཤེས་ཡོན་ལྟེ་གནས་ཁང་ཡོངས་རྫོགས་ཀྱང་མུ་མཐུད་འཛིན་སྐྱོང་དཀའ་བར་བརྟེན། གནས་སྟངས་འདིའི་སྔོན་འགོག་གི་ཚུལ་དུ་བོད་པའི་སློབ་གྲྭ་ཁག་ཀྱང་འདི་ལོའི་ཕྱི་ཟླ་༣ པའི་ཟླ་དཀྱིལ་ཙམ་ནས་དུས་ཚོད་ངེས་མེད་བར་སློབ་མཚམས་བཞག་དགོས་བྱུང་། ད་ལྟའི་དུས་སྐབས་འདིར་སློབ་གྲྭ་ཁག་གི་འགན་འཛིན་རྣམས་ནས་སློབ་ཕྲུག་ཚོས་སོ་སོའི་ནང་ནས་མུ་མཐུད་སློབ་སྦྱོང་ལ་ཞུགས་པ་དང་། ཕ་མས་སོ་སོའི་ཕྲུ་གུ་དང་ལྷན་དུ་དོན་སྙིང་ལྡན་པའི་དུས་ཚོད་གཏོང་ཐབས། དེ་བཞིན་དགེ་རྒན་རྣམས་ཀྱིས་རྒྱུན་ལྡན་སློབ་ཁྲིད་ཀྱི་ལམ་སྲོལ་ལས་དྲ་ཐོག་སློབ་ཁྲིད་ལ་འཕོ་འགྱུར་སླད་འཕྲུལ་ཆས་ཀྱི་མཐུན་རྐྱེན་གང་ཐུབ་བེད་སྤྱོད་གཏོང་ཕྱོགས་ཐད་གནད་འགག་ཆེ་བའི་འགན་འཁུར་དང་རོགས་སྐྱོར་བྱེད་ཐུབ་པ་ཡིན། དེས་ན་སློབ་གྲྭའི་འགན་འཛིན་རྣམས་ལ་འཕྲུལ་ཆས་བཀོལ་སྤྱོད་ནི་སོ་སོའི་ཆེད་ལས་ཡར་རྒྱས་ཀྱི་ཆ་ཤས་སུ་བསྒྱུར་རྒྱུ་ནི་དུས་ཀྱི་དགོས་མཁོ་ཡང་ཡིན།
གོང་གསལ་གནད་དོན་ཁག་ལ་ལམ་སྟོན་དང་རང་རེའི་སློབ་གྲྭ་ཁག་གི་འགན་འཛིན་རྣམས་ཀྱིས་གནང་འོས་པའི་འགན་འཁུར་དག་ལ་གཞིགས་ཏེ་བོད་མིའི་སྒྲིག་འཛུགས་ཤེས་རིག་ལས་ཁུངས་དང་ཨལོཀཱིཏ་ཞེས་པའི་ཚོགས་པ་གཉིས་མཉམ་སྦྲེལ་ཐོག་ཕྱི་ཟླ་༤ པའི་ཟླ་མཇུག་ནས་ཟླ་གྲངས་གཅིག་རིང་ Project Light ཞེས་པའི་ལས་གཞི་ཞིག་འགོ་འཛུགས་ཞུས་ཏེ། ད་བར་ཨལོཀཱིཏ་ཚོགས་པའི་ཁྱད་སྟོན་པ་སྐུ་ཞབས་བཻདཱུརྱཱ་སེན་དང་། ཁྱད་སྟོན་པ་སྐུ་སྐྱེས་མ་མནབཱི་ཨརོརཱ་བཅས་ནས་དྲ་ཐོག་ཚོགས་ཐུན་གཉིས་སློབ་ཁྲིད་གནང་། ཚོགས་ཐུན་དང་པོ་དེ་གཉན་འཕྲང་གི་དུས་སྐབས་སུ་སློབ་གྲྭའི་འགོ་ཁྲིད་ཀྱི་འགན་འཁུར་ཞེས་པའི་བརྗོད་གཞི་ཐོག་ཕྱི་ཟླ་༤ ཚེས་༢༩ ཉིན་གུ་གལ་ཚོགས་འདུའི་དྲ་ཐག་བརྒྱུད་གོ་སྒྲིག་ཞུས་པ་དང་། ཚོགས་ཐུན་གཉིས་པར་འཕྲུལ་ཆས་ཕན་ནུས་ལྡན་པ་བེད་སྤྱོད་གཏོང་ཐབས་ཞེས་པའི་བརྗོད་གཞི་ཐོག་གོང་བཞིན་ཕྱི་ཟླ་༥ ཚེས་༦ ཉིན་དྲ་རྒྱའི་བརྒྱུད་སློབ་ཁྲིད་གནང་། གོང་གསལ་ཚོགས་ཐུན་གཉིས་ནང་སཾ་བྷོ་ཊའི་སློབ་ཁག་༡༥ དང་། སྦེལ་ཀོབ་བོད་ཁྱིམ། སེ་ར་བྱེས་སྨད་བཅས་ཀྱི་སློབ་གྲྭ་ཁག་གི་སློབ་སྤྱི་དང་དགེ་ཆེ་གྲངས་༢༠ ཡིས་མཉམ་ཞུགས་གནང་ཡོད།
ཤེས་རིག་ལས་ཁུངས་དང་ཨལོཀཱིཏ་ཚོགས་པ་གཉིས་ནས་ཟླ་བ་གཅིག་གི་མཚམས་སུ་སློབ་གྲྭའི་འགན་འཛིན་དག་གི་བྱེད་སྒོ་ཁག་ལ་བསྐྱར་ཞིབ་ཀྱིས་འབྱུང་འགྱུར་ཟླ་བ་གཉིས་ཀྱི་ལས་འཆར་བཀོད་སྒྲིག་ཞུ་རྒྱུ་དང་། དེའི་ནང་སློབ་གྲྭ་གཞན་དག་གི་སློབ་སྤྱི་དང་དགེ་ཆེ་ཚོར་ཡང་མཉམ་ཞུགས་ཀྱི་གོ་སྐབས་འབུལ་རྒྱུ་ཡིན། དུས་ཡུན་ཟླ་གྲངས་གསུམ་རིང་ལས་གཞི་འདི་འོག་གཤམ་གསལ་བརྗོད་གཞི་སྟེ། གཉན་འཕྲང་གི་དུས་སྐབས་སུ་སློབ་གྲྭའི་འགོ་ཁྲིད་ཀྱི་འགན་འཁུར་དང་། འཕྲུལ་ཆས་ཕན་ནུས་ལྡན་པ་བེད་སྤྱོད་གཏོང་ཐབས། དགེ་རྒན་གྱི་བྱེད་སྒོ། ཕ་མའི་བྱེད་སྒོ། སློབ་ཕྲུག་གི་སྦྱངས་འབྲས་ལ་བསྐྱར་ཞིབ། སྒོ་རྒྱ་བསྡམས་པའི་བཀའ་རྒྱ་རྗེས་ཀྱི་གྲ་སྒྲིག་བཅས་ཀྱི་སྐོར་སློབ་ཁྲིད་གནང་རྒྱུ་ཡིན།
སློབ་གྲྭའི་འགན་འཛིན་རྣམས་ལ་དྲ་ཐོག་སློབ་ཁྲིད་ཀྱི་ལས་གཞི་འདིའི་འགྲོ་གྲོན་ཆ་ཚང་ཁེ་ན་ཌའི་རོགས་ཚོགས་ནས་མཐུན་འགྱུར་གནང་ཡོད་པ་བཅས། །
