ཕྱི་ལོ་ ༢༠༢༠ ཟླ་ ༥ ཚེས་ ༡༢ རེས་གཟའ་མིག་དམར། 

༄༅། །འདི་གར་སྦེལ་ཀོབ་ལུགས་བསམ་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། དེ་ཡང་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་གདལ་བྱུང་སྟེ་འཛམ་གླིང་ཁྱོན་དུ་མི་གྲངས་འབུམ་ ༤༡ ཙམ་ནད་མནར་བྱུང་ཞིང་། དེའི་ཁྲོད་ནས་མི་གྲངས་ ༣ འབུམ་ཙམ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ལམ་དཀའ་ངལ་ཤུགས་ཆེ་འབྱུང་བཞིན་པའི་སྐབས་འདིར། གནས་ཡུལ་དབུས་སའི་གཞུང་ནས་ནད་རིམས་དེ་ཉིད་རྒྱ་གར་ཡུལ་དུ་ཁྱབ་གདལ་མི་འགྲོ་བའི་སྔོན་འགོག་ཆེད་ཕྱི་ལོ་ ༢༠༢༠ ཟླ་ ༣ ཚེས་ ༢༤ ནས་བཟུང་འགྲུལ་བསྐྱོད་བཀག་འགོག་གནང་སྟེ་ད་བར་ཉིན་གྲངས་ ༤༨ ཙམ་ཕྱིན་ཡོད།

ཛ་དྲག་བཀའ་འགོག་དུས་ཡུན་དེའི་རིང་མཉམ་འབྲེལ་དང་དགོན་སྡེ་ཁག་གིས་གཙོས་གཞུང་འབྲེལ་དང་གཞུང་འབྲེལ་མིན་པའི་ཁྱབ་ཁོངས་ཚོགས་སྡེ་ཁག་ནས་གཙོ་བོར་དབུས་བོད་མིའི་སྒྲིག་འཛུགས་དང་། ཡང་སྒོས་འབྲེལ་ཐོགས་ས་གནས་འགོ་འཛིན་ལས་ཁུངས་ལ་ཕྱར་གྲུ་མཉམ་འདེགས་ཀུན་ནས་བླངས་ཏེ་ཡུལ་མིར་མཐུན་འབྲེལ་ལ་དམིགས་པའི་ཉེ་ཁོར་རྒྱ་གར་གྲོང་གསེབ་ཁག་ལ་བཟའ་ཆས་མཁོ་སྦྱིན་དང་། གཞིས་ཆགས་རང་གི་ཉམ་ཐག་ཨང་ཐོབ་ཅན་དང་དེ་མིན་དཀའ་ངལ་འཕྲད་པའི་རང་རིགས་རྣམས་ལ་བཟའ་ཆས་དང་འཚོ་སྣོན་རོགས་རམ། གྲོང་སྡེ་སོ་སོར་ཚ་བ་དང་སྲོག་འཛིན་རླུང་བརྟག་དཔྱད་བྱ་རྒྱུའི་འཕྲུལ་ཆས་དང་དུག་སེལ་སྨན་རྫས་མཁོ་སྤྲོད། སེར་སྐྱ་མི་མང་ཡོངས་ལ་བགོ་འགྲེམས་བྱ་རྒྱུའི་ཁ་རས་དྭང་བླངས་ཐོག་འཚེམ་རྒྱུ་སོགས་གང་ལ་གང་འོས་ཀྱི་མཐུན་འགྱུར་རམ་འདེགས་གནང་ཡོད་པར་མ་ཟད། ཕྱི་ལོ་ ༢༠༢༠ ཟླ་ ༥ ཚེས་ ༩ ཉིན་སེ་ར་བྱེས་སྨད་གཉིས་ཀྱི་ཕྱག་མཛོད་ཁྲི་པ་རྣམ་གཉིས་ལུགས་བདེ་གཞིས་ཆགས་སོ་སོའི་མཉམ་འབྲེལ་ཚོགས་ཁང་ནང་དུ་ཆེད་ཕེབས་ཐོག་ས་གནས་འགོ་འཛིན་ལས་ཁུངས་ཀྱི་སྟངས་འཛིན་འོག་ཉམ་ཐག་ཨང་ཐོབ་ཅན་དང་གནས་སྐབས་དཀའ་ངལ་ནང་དུ་ལྷུང་པའི་མི་མང་ཞལ་གྲངས་ ༧༠ ཙམ་ལ་ཧིན་སྒོར་ ༣༠༠༠ རེའི་འཚོ་སྣོན་གནང་ཞིང་། དེའི་ནང་ནས་རྒས་ཁོག་ནད་མནར་ཅན་རྣམས་ལ་སོ་སོའི་སྡོད་ཁྱིམ་དུ་ཆེད་བསྐྱོད་ཀྱིས་ཕུལ་ཡོད།

དེ་བཞིན་ཕྱི་ལོ་ ༢༠༢༠ ཟླ་ ༥ ཙེས་ ༡ ཉིན་ས་སྐྱ་བརྩེ་ཆེན་ཆོས་འཁོར་གླིང་དགོན་པས་རྒས་གསོ་ཁང་དུ་སྒྲིག་ཞུགས་རྒས་ཁོག་ ༣༧ དང་ལས་བྱེད་ ༦ ལ་གསོལ་ཞིབ་ཀི་ལོ་རེ་དང་གསོལ་མར་ཀི་ལོ་ཕྱེད་ཀ་རེ་བཟའ་ཆས་དོད་དུ་མཁོ་སྤྲོད་ཐོག་གཞིས་ལས་ཁང་གི་ཞུ་དོན་གཞིར་བཟུང་རྒས་གསོ་ཁང་ལ་ཚ་བ་དང་སྲོག་འཛིན་རླུང་བརྟག་དཔྱད་བྱ་རྒྱུའི་འཕྲུལ་ཆས་རེའང་ཞལ་འདེབས་གནང་ཡོད། དེ་ལྟར་ཁྱབ་ཁོངས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་ནས་ཛ་དྲག་གི་དུས་སྐབས་འདིར་ཕྱར་བ་གྲུ་འདེགས་གནང་བའི་མཐུ་ལ་བརྟེན་ནས་ད་བར་ས་གནས་ནང་དུ་མི་མང་བཟའ་ཆས་ཀྱིས་ཕོངས་པའི་དཀའ་ངལ་འཕྲད་པ་རིགས་བྱུང་མེད་ལ། ཡུལ་མིར་རོགས་ཕན་ཡང་རླབས་པོ་ཆེ་བསྒྲུབས་ཐུབ་པ་བྱུང་ཡོད། དེ་བཞིན་གྲོང་སྡེ་སོ་སོ་དང་རྒས་གསོ་ཁང་དུ་བདུན་རེའི་ཚ་བ་སོགས་བརྟག་དཔྱད་རིགས་དུས་ཐོག་ཚགས་ཚུད་གནང་ཐུབ་པའི་ཁེ་ཕན་ཡང་འབྱུང་བཞིན་པ་ཡིན། དེར་བརྟེན་གཞིས་ལས་ཁང་ནས་ཁྱབ་ཁོངས་ཉམ་ཐག་སོགས་ལ་ལྟ་རྟོག་དང་ནད་ཡམས་སྔོན་འགོག་གི་ལས་དོན་སྤེལ་ཆེད་མཐུན་འགྱུར་རམ་འདེགས་གནང་མཁན་ཚོགས་སྒེར་སྒྲིག་འཛུགས་ཡོངས་ལ་ཡི་རངས་བསྔགས་བརྗོད་དང་ཁ་ཞེ་གཉིས་མེད་ཐུགས་རྗེ་ཆེ་ཞེས་ཞུས་ཡོད་པ་བཅས། །