ཕྱི་ལོ་ ༢༠༢༠ ཟླ་ ༥ ཚེས་ ༢༦ རེས་གཟའ་མིག་དམར།
ལ་དྭགས།
༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་ནས་བཏང་གནས་ནང་འཁོད་དོན། རྒྱ་གར་ནང་ད་ཆ་མངའ་སྡེ་ནང་ཁུལ་འགྲུལ་བཞུད་འགོ་འཛུགས་པས་བོད་མི་གནས་སྐོར་བ་དང་། སློབ་ཕྲུག དེ་བཞིན་ ལས་དོན་གཞན་གྱི་རྐྱེན་པས་རྒྱ་གར་གྱི་རྫོང་དང་མངའ་སྡེ་གཞན་ནང་ལྷག་་པ་རྣམས་ད་ཆ་སོ་སོའི་གཞིས་ཆགས་སུ་ཕྱིར་ལོག་གནང་བཞིན་ཡོད།
ལ་དྭགས།
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལམ་སྟོན་འོག་བོད་མིའི་གཞིས་ཆགས་སུ་ནད་ཡམས་ཁྱབ་གདལ་སྔོན་འགོག་ཆེད་ས་གནས་སུ་རྫོང་དང་མངའ་སྡེ་གཞན་ནས་ཕེབས་མཁན་རྣམས་ངེས་པར་དུ་འགོག་དབྱེ་ཟུར་འཇོག་ཁང་དུ་བཞུགས་དགོས་པ་དང་། དེ་བཞིན་ཕྱི་མི་ཕེབས་མཁན་རྣམས་ས་གནས་སུ་འབྱོར་མཚམས་ས་གནས་ཀྱི་འཕྲོད་བསྟེན་སྨན་ཞབས་པས་ཚ་བ་ལ་སོགས་པ་ད་ལྟའི་གཉན་རིམས་ Covid-19 དང་འབྲེལ་བའི་ནད་རྟགས་ཡོད་མེད་བརྟག་ཞིབ་གནང་བཞིན་ཡོད་པ་དང་། འགོག་དབྱེ་ཟུར་འཇོག་ཁང་དུ་བཞུགས་མཁན་རྣམས་ལ་ཟུར་བཞུགས་སྐབས་ལམ་སྟོན་དང་། དེ་བཞིན་འགོག་དབྱེ་ཟུར་བཀག་ཏུ་གནས་ཡུན་རིང་ལུས་ཁམས་མ་བདེ་བ་དང་ནད་རྟགས་མངོན་པ་འབྱུང་ཚེ་ངེས་པར་དུ་ཁ་པར་ཐོག་འབྲེལ་བ་གནང་དགོས་པའི་ལམ་སྟོན་ཡང་གནང་ཡོད།
ལ་དྭགས།
འདི་ཟླའི་ཚེས་ ༢༤ ཉིན་ལ་དྭགས་ས་གནས་སུ་བོད་མི་གྲངས་ ༣༧ འབྱོར་འདུག་པར་ཕྱི་མི་འབྱོར་མཁན་རྣམས་མངའ་སྡེ་གཞུང་གི་ལམ་སྟོན་ལྟར་ཉིན་གྲངས་ ༡༤ རིང་རང་ཁྱིམ་དུ་འགོག་དབྱེ་ཟུར་བཞུགས་གནང་བཞིན་པ་རྣམས་ཀྱི་སྒོ་ཁར་གསལ་བསྒྲགས་ཡེ་གེ་སྦྱར་བཞིན་ཡོད་པ་དང་། ས་གནས་འཕྲོད་བསྟེན་སྨན་ཞབས་པས་ཀྱང་འགོག་དབྱེ་ཟུར་འཇོག་ཁང་དུ་་གནས་བཞུགས་བོད་མི་རྣམས་ངོ་ཐུག་གིས་ནད་རྟགས་ཡོད་མེད་བརྟག་ཞིབ་གནང་ཡོད།
ལ་དྭགས།
སྤྱིར་ལ་དྭགས་གླེ་རུ་རྒྱ་ཤོག་གྲངས་ ༡༢ ཁོངས་རང་ཁྱིམ་དུ་ཁང་པའི་མཐུན་འགྱུར་མེད་པ་རྣམས་རྒྱ་ཤོག་སོ་སོར་སྤྱི་ཁང་ཡོད་པ་དེར་འགོག་དབྱེ་ཟུར་འཇོག་གནང་བཞིན་ཡོད་པ་དང་། ལ་དྭགས་བྱང་ཐང་ཁུལ་དུ་འགྲོ་བསྐྱོད་མ་ཐུབ་པ་རྣམས་ས་གནས་སུ་ནད་གསོ་ཁང་དང་བྱིས་གསོ་ཁང་། མངའ་རིས་ཚོགས་ཁང་གསུམ་གནས་སྐབས་འགོག་དབྱེ་ཟུར་འཇོག་ཁང་དུ་བསྒྱུར་ཡོད་པ་དེར་ཟུར་འཇོག་གནང་བཞིན་ཡོད་འདུག
བལ་ཡུལ།
ཕྱི་ཚེས་༢༥ ཉིན་བལ་ཡུལ་ནས་གནས་ཚུལ་འབྱོར་དོན། དེ་གའི་སྐུ་ཚབ་དོན་གཅོད་ཁང་དང་གངས་ཅན་བདེ་རྩ། ས་གནས་འགོ་འཛིན་གྱིས་གཙོས་ཛ་དྲག་འཕྲོད་བསྟེན་ཚོགས་ཆུང་ནས་ས་གནས་སུ་ཕྱི་ནས་བོད་མི་འབྱོར་མཁན་རྣམས་འགོག་དབྱེ་ཟུར་འཇོག་ཆེད་ཁང་པའི་མཐུན་རྐྱེན་སྦྱོར་ཡོད་པ་དང་། འགོག་དབྱེ་ཟུར་འཇོག་ཁང་གི་ཕྱི་ནང་དུག་སེལ་གཙང་བཟོ་གནང་ཡོད་ཅིང་ཁང་པའི་ནང་ཉལ་ཁྲི་དང་གདན། དེ་བཞིན་དྲ་རྒྱ་སོགས་ཀྱི་མཐུན་རྐྱེན་གང་ལེགས་སྦྱར་ཡོད་པའི་གནས་ཚུལ་དུ།།
བལ་ཡུལ།
