༢༠༢༠ ཟླ་ ༥ ཚེས་ ༢ རེས་གཟའ་སྤེན་པ།༄༅། ། ། ཕྱི་ལོ་ ༢༠༢༠ ཟླ་༤ ཚེས་༣༠ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་COVID-19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ལྔ་པ་སྤེལ་བའི་ནང་འཁོད་དོན།

འཛམ་གླིང་སྤྱི་ཡོངས་ཀྱི་ད་ལྟའི་གནས་སྟངས།

འཛམ་གླིང་ཁྱོན་དུ་ད་བར་ཁྱོན་ཏོག་དབྱིནས་གཉན་རིམ་ནད་པ་གྲངས།  ས་ཡ་གསུམ་དང་ཉི་འབུམ་ཁྲི་མེད་བཞི་སྟོང་བདུན་བརྒྱ་ལྔ་ 3204705 དང་།  ཁྱོན་ནད་པ་འདས་གྲོངས་སོང་བའི་གྲངས་འབོད། ཉི་འབུམ་ཉི་ཁྲི་བདུན་སྟོང་བརྒྱད་བརྒྱ་བཞི་བཅུ་ཞེ་བདུན། 227847

ནད་ཡམས་དེ་ཁྱབ་པའི་འཛམ་གླིང་ནང་ཁྱོན་རྒྱལ་ཁབ་ 213 ནང་ཁྱབ་ཟིན། 

༢། རྒྱ་གར་དང་བལ་ཡུལ་ནང་ཏོག་དབྱིབས་གཉན་རིམ་གྱི་ད་ལྟའི་གནས་སྟངས།

རྒྱ་གར་ནང་ཁྱོན་ནད་པ་གྲངས། 23651 ༼ ཉི་ཁྲི་སུམ་སྟོང་དྲུག་བརྒྱ་ལྔ་བཅུ་ང་གཅིག ༽

(Source: Ministry of Health and Family Welfare)

ནད་པ་འདས་གྲོངས་སོང་བའི་གྲངས། 1074

དྲག་བསྐྱེད་བྱུང་བ་མི་གྲངས། 8324

མངའ་སྡེ་ཇི་ཙམ་ལ་ཁྱབ་གདལ་སོང་བ།

ཛ་དྲག་ཉེན་ཚབས་ཆེ་བ་དང་བོད་མི་གཞིས་སྡོད་མངའ་ཁུལ་གྱི་གྲངས་ཚད།

ཧི་མཱ་ཅལ། ༤༠ ལྡི་ལི།༣༤༣༩ ལྷོ་ཕྱོགས་ཀར་ཎ་ཊ་ཀ ༥༣༥ ལ་དྭགས།༢༢ བཅས་རྒྱ་གར་ནང་ཚབས་ཆེ་ཤོས་

Maharastra, Gujrat ཆགས་ཀྱི་ཡོད།

བལ་ཡུལ་ནང་ཁྱོན་ནད་པ་གྲངས། ༥༧ དྲག་བསྐྱེད་བྱུང་བ། ༡༦ འདས་གྲོངས་སོང་བ། ༠ བཅས་ཀྱི་གནས་སྟངས།

༣། ལས་དོན་ཚོགས་ཆུང་གི་གྲུབ་ཐོན།

ཁང་ཁྱིམ་ཟུར་བཀག་གི་ལམ་སྟོན་དང་ད་ལྟའི་གནས་སྟངས།

ད་ལྟའི་ཆར་རྒྱ་གར་དང་བལ་ཡུལ་ནང་དུ་ཁང་ཁྱིམ་ཟུར་བཀག་ནང་བཞུགས་བོད་མི། ༤༦ ༼ ཚང་མ་གཞིས་མི། ༽

དབུས་དང་ས་གནས་སུ་ནད་རྟགས་ཡོད་མེད་བརྟག་ཞིབ་ལས་རིམ།

བདུན་ཕྲག་འདིའི་ནང་གངས་སྐྱིད་ཁུལ་གྱི་ལས་ཤག་ནང་སྡོད་ལས་བྱེད་དང་ནང་མི་ཁྱོན་མི་གྲངས་༡༦༡ ལ་ཚ་བ་འཕར་གྱི་ཡོད་མེད་སོགས་བརྟག་ཞིབ་བྱས་པས་ནད་རྟགས་མངོན་ཚུལ་བྱུང་བ་གཅིག་ཀྱང་ཐོན་མིན་འདུག ད་བར་ཁྱོན་རྡ་ས་གངས་སྐྱིད་ཁུལ་དུ་མི་གྲངས་༡༢༡༦ ལ་འཕྲོད་བསྟེན་ལས་ཁུངས་ཀྱི་སྨན་ཞབས་པས་སྒོ་ཁར་ཚ་བ་ཡོད་མེད་བརྟག་ཞིབ་བྱས་ཟིན་པ་དང་རྒྱ་གར་ནང་གི་ས་གནས་བསྡོམས་གྲངས་༣༢ དང་བལ་ཡུལ་ནང་ས་གནས་གྲངས་༥ བཅས་ས་གནས་དེ་དག་ལ་ཁྱོན་མི་གྲངས་༢༨༧༨༧ ལ་ཚ་བ་ཡོད་མེད་སོགས་ནད་རྟགས་བརྟག་ཞིབ་བྱས་ཟིན་འདུག

གསོ་རིག་ལུས་སེམས་ནུས་གསོའི་སྨན་འགྲེམས་སྤེལ་ཞུས་སྐོར།

༢༠༢༠ ཟླ་༣ ཚེས་༣༡ ཉིན་འདི་ནས་ས་གནས་གཞིས་འགོ་ཁག་ལ་ཡོངས་ཁྱབ་གསལ་བསྒྲགས་བཏང་བ་བཞིན་ད་བར་ཁྱོན་རྒྱ་གར་ནང་གི་ས་གནས་ཁག་༡༨ ནང་གི་བོད་མི་གྲངས་༣༥༢ ལ་ལུས་སེམས་ནུས་གསོའི་སྨན་རིན་མེད་ཐོག་བགོ་འགྲེམས་གནང་ཟིན་འདུག

བལ་ཡུལ་དང་ཕྱི་རྒྱལ་གནས་སྡོད་བོད་མི་ཁག་ཅིག་གིས་སྐུ་ཚབ་དོན་གཅོད་རྒྱུད་ལུས་སེམས་ནུས་གསོའི་སྨན་ཐོ་བཏང་འབྱོར་བྱུང་སོང་ཡང་ད་ལྟའི་རྒྱ་གར་ནས་ཕྱི་རྒྱལ་ལ་གནམ་གྲུའི་འགྲུལ་ལམ་སྒོ་རྒྱབ་པའི་རྐྱེན་གྱིས་ཕྱི་རྒྱལ་ལ་སྦྲག་ཡིག་སོགས་གང་ཡང་ད་བར་གཏང་ཐུབ་མེད། ང་ཚོའི་རེ་བར་ཟླ་༥ ཚེས་༣ རྗེས་རྒྱ་གར་ནས་ཕྱིའི་རྒྱལ་ཁབ་ལ་གནམ་གྲུའི་འགྲུལ་ལམ་སྒོ་ཕྱེ་མཚམས་སྦྲག་ཁང་ཡང་སྒོ་ཕྱེ་རྒྱུར་རྟེན་འདི་ནས་ལུས་སེམས་ནུས་གསོའི་སྨན་རྣམས་གཏོང་འཆར་གྲ་སྒྲིག་ཡོད་པ་ཡིན།

ཚོགས་ཆུང་ནས་ལུས་སེམས་ནུས་གསོའི་སྨན་གྱིས་ཕན་བསྐྱེད་ཇི་བྱུང་གི་འགེངས་ཤོག་(Feedback form)ཞིག་དབུས་སའི་འབྲེལ་ཡོད་འགོ་འཛིན་རྣམས་ལ་གཏོང་བཞིན་ཡོད་པས་འབྲེལ་ཡོད་ཁང་ཁྱིམ་ཟུར་བཀག་ནང་བཞུགས་པའི་གང་ཟག་སྨན་བསྟེན་པ་རྣམས་ནས་འགེངས་ཤོག་དེ་ངེས་པར་བཀང་རོགས་ཅེས་ཞུ་རྒྱུ།

དངས་བླང་ཞབས་ཞུའི་ལས་མི།

གསལ་བསྒྲགས་སྔོན་སོང་བཞིན་རྒྱ་གར་དང་བལ་ཡུལ་ཁུལ་གྱི་ས་གནས་གྲངས་༡༥ ནས་ཁྱོན་ཁ་ལོ་པ་གྲངས་༡༦ དང་སྨན་ཞབས་༥༣ བཅས་ཁྱོན་དངས་བླངས་མི་གྲངས་༦༩ བྱུང་འདུག་པས་དངས་ཞབས་པ་ཚང་མར་སྔགས་བརྗོད་ཡི་རངས་ཞུ་རྒྱུ་ཡིན།

དབུས་ས་ཁག་ལ་ནད་ཡམས་སྔོན་འགོག་ལས་དོན་ཇི་སྤེལ།

དབུས་སའི་ལས་ཁུངས་དང་ས་གནས་གཞིས་ཆགས་ཁག་ཏུ་འདི་ནས་ལམ་སྟོན་སོང་བ་ལྟར་ས་གནས་ཁག་མང་པོར་སོ་སོའི་ས་གནས་དང་ཉེ་འཁོར་ལ་དུག་སེལ་Sanitize བྱེད་ཡས། དེ་བཞིན་ཁང་ཁྱིམ་ཟུར་བཀག་ཆེད་ས་གནས་སོ་སོར་ཁང་པ་དང་དེའི་ནང་གི་ཡོ་བྱད་བཙལ་སྒྲུབ། དེ་བཞིན་ས་གནས་ཁག་ལ་ནད་རྟགས་ཡོད་མེད་བརྟག་ཞིབ་སོགས་སྔོན་འགོག་གི་ལས་དོན་ཆེད་ཧུར་བསྐྱེད་གང་ལེགས་གནང་བཞིན་འདུག་པའི་ལས་བསྡོམས་དང་པར་རིས་བཅས་ཚོགས་ཆུང་ལ་འབྱོར་བཞིན་འདུག་པས་ཚང་མར་ཐུགས་རྗེ་ཆེ་ཞུ་བ་དང་ད་དུང་ཡིན་ནས་རྒྱ་གར་ནང་ཟླ་༥་་༦་་༧ ནང་ཛ་དྲག་ཆགས་ཉེན་ཡོད་པས་ཚང་མས་ཧུར་བསྐྱེད་གནང་དགོས་པའི་རེ་སྐུལ་ཞུ་རྒྱུ་ཡིན།

༤། གསལ་བསྒྲགས་ཁག

འདི་ནས་གསལ་བསྒྲགས་སྔོན་སོང་བཞིན་ཟླ་༥ ཚེས་༣ རྗེས་རྒྱ་གར་ནང་གི་འགྲོ་འོང་བཀག་བསྡོམ་ལྷོད་དུ་འགྲོ་རྒྱུར་ངེས་པས་ས་གནས་ཁག་ནས་ཕྱི་མི་ཕེབས་མཁན་རྣམས་ཁང་ཁྱིམ་ཟུར་བཀག་གི་ལམ་སྟོན་སོང་བ་བཞིན་རྩི་སྲུང་གནང་དགོས་པ་དང་། ཁ་ཉིན་ཕྱི་ཟླ་༤ ཚེས་༢༨ ཉིན་ཛ་དྲག་ཚོགས་ཆུང་ནས་བོད་མིའི་སྒྲིག་འཛུགས་ཀྱི་ལས་ཁུངས་ཀྱི་དྲུང་ཆེ་དང་འགན་འཛིན་མཚན་ཐོག་གསལ་བསྒྲགས་བཏང་བ་བཞིིན་རྡ་རམ་སཱ་ལ་འདི་བོད་མིའི་སྒྲིག་འཛུགས་བསྟི་གནས་དང་གནད་ཡོད་བཞུགས་སའི་ས་གནས་གལ་ཆེ་ཞིག་ཡིན་པས་ཕྱོགས་མཐའ་ནས་རྡ་སར་ཕེབས་མཁན་ཡོད་ཚེ་ངེས་པར་ས་གནས་འགོ་འཛིན་ལ་འབྲེལ་བ་གནང་རོགས། དེ་བཞིན་ལས་བྱེད་ཡིན་ན་ལས་ཁུངས་སོ་སོའི་དྲུང་ཆེ་འགན་འཛིན་ལ་འབྲེལ་བ་གནང་ནས་སོ་སོའི་ནང་མི་བུ་ཕྲུག་རྣམས་རྡ་ས་སྣེ་ལེན་ཁང་དུ་ཉིན་གྲངས་༢༨ རིང་ཁང་ཁྱིམ་ཟུར་བཀག་བཞུགས་དགོས་ཀྱི་ཡོད། ཕྱོགས་མཐའ་ནས་རྡ་སར་ཕེབས་མཁན་རྣམས་ནས་སོ་སོའི་ས་གནས་ནས་གལ་ཆེ་དོན་ཆེན་གྱིས་འགྲུལ་བཞུད་བྱེད་ཀྱི་ཡོད་པའི་རྒྱབ་གཉེར་སོ་སོའི་ས་གནས་འགོ་འཛིན་ནས་ཞུས་པའི་ཐོག་རྡ་ས་ས་གནས་འགོ་འཛིན་ལ་ག་དུས་གང་དུ་གང་གི་ཆེད་འབྱོར་གྱི་ཡོད་པ་སྔོན་ཚུད་ནས་འབྲེལ་བ་གནང་དགོས་པ་ཡིན། གསལ་བསྒྲགས་འདི་བཞིན་དབུས་སའི་ལས་ཁུངས་ལ་བཏང་ཟིན་ཡང་མི་མང་རྣམ་པས་མཁྱེན་རྟོགས་སླད་ད་ལན་དྲ་རྒྱའི་རྒྱུད་སླར་ཡང་གསལ་བསྒྲགས་ཞུ་བཞིན་ཡོད།

༥། སྔོག་འགོག་རེ་སྐུལ།

• བོད་མི་འགའ་ཞིག་ནད་རྟགས་སོགས་མངོན་ཡང་སྦ་གསང་བྱེད་ནས་སྨན་ཁང་ལ་བསྟེན་གཏུག་མ་བྱེད་པ་སོགས་ཀྱི་གནས་ཚུལ་དེ་འདྲ་ཡོང་མ་སྲིད་པ་མིན་པས་ཚང་མས་ནད་རྟགས་མངོན་ཚུལ་ཐོན་མ་ཐག་སྨན་པ་དང་སྨན་ཁང་ལ་འབྲེལ་བ་གནང་དགོས་ཧ་ཅང་གལ་ཆེ།
• ཚོགས་ཆུང་ནས་དྲ་རྒྱའི་ཐོག་རྒྱ་གར་དབུས་སའི་གཞུང་གི་གལ་ཆེའི་ལམ་སྟོན་ཁག་ཅིག་སྤེལ་ཡོད་པ་དང་། དེ་བཞིན་ཁ་རས་བེད་སྤྱོད་བྱེད་སྟངས། ནད་ཡམས་འགོག་སྲུང་ཆེད་གཞུང་སྒེར་ཚོགས་པ་ཁག་ནས་ཚོགས་འདུ་དང་ལས་དོན་སྤེལ་སྐབས་ནད་ཡམས་སྔོན་འགོག་གི་ལམ་སྟོན་ཞིག་ཀྱང་འགྲེམ་སྤེལ་ཞུས་ཞུ་མུས་ལ་ཚང་མས་གཟིགས་ཀློག་གནང་རོགས་ཞུ།
• སྔོན་འགོག་ཐད་གསོ་བ་རིག་པའི་གཞུང་ནས་རིམས་སྲུང་ནག་པོ་དགུ་སྦྱོར་དང་། དེ་བཞིན་སྲུང་འཁོར་ཁག་ཡོད་པ་རྣམས་ལུས་ལ་བཅང་རྒྱུ། དེ་བཞིན་ཆུ་འཁོལ་འཐུང་རྒྱུ། ལུས་འཁྱག་མ་བཅུག་ཡས་དང་གནམ་གཤིས་འགྱུར་ལྡོག་གི་དུས་སུ་ཆམ་རིམས་མ་ཕོག་ཡས། གཞན་ཡང་བཅུད་ལྡན་གྱི་ཟ་བཏུང་བསྟེན་དགོས་ཡས། སེམས་གུ་ཡངས་སྐྱིད་པོ་སྡོད་རྒྱུ་དང་མཚན་མོ་གཉིད་དུས་ཐོག་འཁུག་རྒྱུ་བཅས་ནི་ནད་ཡམས་འདིར་སྔོན་འགོག་བྱ་རྒྱུར་ཕན་ངེས་ཡིན་པས་ཚང་མས་མཁྱེན་པའི་ཐོག་ཕྱག་ལེན་གནང་རོགས་ཅེས་ཞུ།

མཐའ་དོན། རྒྱ་བལ་འབྲུག་གསུམ་ནང་གི་བོད་པའི་སྤྱི་ཚོགས་ནང་ད་ལྟའི་ཆར་རྩ་བའི་བླ་མའི་ཐུགས་རྗེའི་བྱིན་མཐུ་དང་འབྲེལ་ཡོད་འགོ་འཛིན་དང་འཕྲོད་ལས་པ་རྣམས་ནས་སོ་སོའི་ས་གནས་ལ་སྔོན་འགོག་ལས་དོན་གང་ཐུབ་སྤེལ་བ་ལས་ད་བར་ནད་པ་གཅིག་ཀྱང་ཐོན་མེད་ལ་ད་དུང་ཡིན་ནས་ཚོད་དཔག་བྱེད་ན་རྒྱ་གར་ནང་ཕྱི་ཟླ་༥ ཟླ་དཀྱིལ་ནས་བཟུང་ཕྱི་ཟླ་༧ བར་ཉེན་ཁ་དང་ཛ་དྲག་ཆེན་པོ་ཆགས་རྒྱུའི་ཚོད་དཔག་བྱེད་བཞིན་ཡོད་པས་ང་ཚོ་ཚོང་མས་མཉམ་དུ་ནད་ཡམས་འདི་ལ་གདོང་ལེན་དང་ཁ་གཏད་གཅོག་རྒྱུར་འབད་སྤུངས་བྱ་དགོས་པའི་རེ་སྐུལ་ཞུ་བ་དང་སྦྲགས་གསར་འགོད་ཐེངས་ལྔ་པ་འདི་མཇུག་སྒྲིལ་རྒྱུ་ཡིན། ལྷན་རྒྱས་ཚང་མ་སྐུ་གཟུགས་ཐུགས་ལྕག་གནང་། ཐུགས་རྗེ་ཆེ།།

*****************