༢༠༢༠ ཟླ་ ༥ ཚེས་ ༡༡ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༥ ཚེས་༧ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ COVID-19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་དྲུག་པ་སྤེལ་བ་དང་། སྐབས་དེར་ཚོགས་ཆུང་གི་གསར་འགོད་འབྲེལ་མཐུད་པ་བོད་ལུགས་སྨན་པ་ཚེ་རིང་མཚམས་གཅོད་ལགས་དང་། ལས་དོན་ཚོགས་ཆུང་གི་ཚོགས་མི་ཕྱི་ལུགས་སྨན་པ་བསྟན་འཛིན་རྣམ་གྲོལ་གཉིས་ཀྱིས་དོན་ཚན་ལྔའི་ཐོག་གསར་འགོད་གསལ་བསྒྲགས་སྤེལ་བ་གཤམ་གསལ།
༡། འཛམ་གླིང་སྤྱི་ཡོངས་ལ་ད་ལྟའི་ཏོག་དབྱིབས་གཉན་རིམས་ COVID-19 གྲངས་ཐོའི་གནས་སྟངས་འདི་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འཕྲོད་བསྟེན་ལྷན་ཁང་གི་སྙན་ཐོར་གཞི་བཅོལ་ཞིང་། དུས་ཚིགས་ནི་ ༢༠༢༠ ཟླ་ ༥ ཚེས་ ༧ ཕྱེད་ཡོལ་ཆུ་ཚོད་ ༤ ནང་ཚུད་བར་གྱི་གནས་སྟངས་མཚོན།
འཛམ་གླིང་ཁྱོན་དུ་ཏོག་དབྱིབས་གཉན་རིམས་ཕོག་པའི་ནད་པ་གྲངས། ༣༦༣༤༡༧༢ (ས་ཡ་གསུམ་དང་དྲུག་འབུམ་སུམ་ཁྲི་བཞི་སྟོང་བརྒྱ་དང་བདུན་ཅུ་དོན་གཉིས།) ནད་པ་འདས་གྲོངས་སོང་བ་གྲངས། ༢༥༡༤༤༦ (ཉི་འབུམ་ལྔ་ཁྲི་ཆིག་སྟོང་བཞི་བརྒྱ་ཞེ་དྲུག)
ཏོག་དབྱིབས་གཉན་རིམས་ཁྱབ་བརྡལ་བྱུང་བའི་རྒྱལ་ཁབ་གྲངས། ༢༡༥ ཡོད་འདུག
༢། རྒྱ་གར་ནང་། གནས་ཚུལ་ཡོངས་ཁུངས། རྒྱ་གར་དབུས་གཞུང་འཕྲོད་བསྟེན་དང་ཁྱིམ་ཚང་བདེ་དོན་ལྷན་ཁང་ཡིན། དུས་ཚིགས་ནི་ ༢༠༢༠ ཟླ་ ༥ ཚེས་ ༧ ཕྱེད་ཡོལ་ཆུ་ཚོད་ ༤ ནང་ཚུད་བར་གྱི་གནས་སྟངས་མཚོན།
རྒྱ་གར་ནང་ཏོག་དབྱིབས་གཉན་རིམས་ཕོག་པའི་ནད་པ་གྲངས། ༣༥༩༠༢
ནད་པ་འདས་གྲོངས་སོང་བའི་གྲངས། ༡༧༨༣
ནད་པ་དྲག་བསྐྱེད་བྱུང་བ་གྲངས། ༡༥༢༦༧
རྒྱ་གར་ནང་ཏོག་དབྱིབས་གཉན་རིམས་ཁྱབ་གདལ་ལ་བརྟེན་ནས་ཉེན་ཚབས་ཆེ་བའི་མངའ་སྡེ་རྣམས་ནི། (Maharastra, Gujrat, Delhi, Tamil Nadu, Rajasthan) བཅས་ཡིན་ཞིང་། ལྡི་ལིར་མཚོན་ན་ཏོག་དབྱིབས་གཉན་རིམས་ཕོག་པའི་ནད་པ་གྲངས་ ༥༥༣༢ དང་། རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ནང་ཏོག་དབྱིབས་གཉན་རིམས་ཕོག་པའི་ནད་པ་ ༦༩༣ ཧི་མཱ་ཅལ་མངའ་སྡེའི་ནང་ཏོག་དབྱིབས་གཉན་རིམས་ཕོག་པའི་ནད་པ་གྲངས་ ༤༥ དང་། ལ་དྭགས་སུ་ཏོག་དབྱིནས་གཉན་རིམ་ནད་མནར་གྲངས་ ༤༡ དང་། ཨུཏྟར་ཁཎྜ་མངའ་སྡེའི་ནང་ཏོག་དབྱིབས་གཉན་རིམས་ཕོག་པའི་ནད་པ་གྲངས་ ༦༡ དང་། ཨོ་ཌི་ཤ་མངའ་སྡེའི་ནང་དུ་ཏོག་དབྱིབས་གཉན་རིམས་ཕོག་མཁན་གྲངས་ ༡༨༥ ཡོད་འདུག
བལ་ཡུལ་ནང་གི་གནས་སྟངས། གནས་ཚུལ་ཁུངས་བཅོལ་ཡུལ་ covidnepal.com ཞེས་པའི་དྲ་རྒྱ།
བལ་ཡུལ་ནང་ཏོག་དབྱིབས་ནད་པ་གྲངས། ༩༩
ནད་པ་འདས་གྲོངས་སོང་བའི་གྲངས། ༠
ནད་པ་དྲག་བསྐྱེད་བྱུང་བའི་གྲངས། ༢༢
དོན་ཚན་གཉིས་པ། ལས་དོན་ཚོགས་ཆུང་གི་སྙན་ཐོ།
༢།༡ ཁང་ཁྱིམ་ཟུར་བཀག་གི་གནས་སྟངས།
ཕྱི་ཟླ་ ༥ ཚེས་ ༣ གོང་ནས་ཁང་ཁྱིམ་ཟུར་བཀག་ཏུ་གནས་བཞིན་པའི་བོད་མི་གྲངས་ ༢༧ ཡོད། ཕྱི་ཟླ་ ༥ ཚེས་ ༣ རྗེས་བོད་མི་གྲངས་ ༡༡༣ ཁང་ཁྱིམ་ཟུར་བཀག་ཏུ་གནས་ཡོད། བོད་མི་དེ་དག་རྒྱ་གར་ནང་གི་ས་གནས་ ༡༣ ནང་ཡོད། བལ་ཡུལ་ས་གནས་ ༥ བཅས་ནས་ཁྱོན་མི་གྲངས་ ༡༤༠ ད་ལྟའི་ཆར་ཁང་ཁྱིམ་ཟུར་བཀག་འོག་བཞུགས་ཡོད།
༢།༢ བཞུགས་སྒར་ཁུལ་གྱི་བོད་མི་ཚོར་ཏོག་དབྱིབས་གཉན་རིམས་བརྟག་དཔྱད་གནང་བ།
འདས་པའི་བདུན་ཕྲག་གཅིག་ནང་རྡ་ས་གངས་སྐྱིད་ཁུལ་དུ་ཁྱོན་མི་གྲངས་༩༠ ལ་ནད་རྟགས་ཡོད་མེད་བརྟག་དཔྱད་གནང་བ་ནས་གློ་རྒྱག་མཁན་ཁག་གཅིག་མ་གཏོགས་ཏོག་དབྱིབས་གཉན་རིམས་གྱི་ནད་རྟགས་མངོན་པ་བྱུང་མེད། འདས་པའི་བདུན་ཕྲག་བཞིའི་ནང་ཁྱོན་བསྡོམས་མི་གྲངས་ ༡༣༢༢ ལ་ནད་རྟགས་ཡོད་མེད་བརྟག་དཔྱད་གནང་ཐུབ་པ་བྱུང་།
དེ་བཞིན་རྒྱ་གར་ནང་ས་གནས་གཞན་གྲངས་ ༣༡ དང་བལ་ཡུལ་ས་གནས་ ༥ བཅས་ནང་ཁྱོན་མི་གྲངས་ ༣༠༡༡༧ ༼ སུམ་ཁྲི་སྟོང་མེད་བརྒྱ་དང་བཅུ་བདུན། ༽ལ་ས་གནས་འགོ་འཛིན་དང་འཕྲོད་བསྟེན་སྨན་ཞབས་མཉམ་འབྲེལ་གྱིས་ནད་རྟགས་ཡོད་མེད་བརྟག་དཔྱད་བྱས་ཟིན་འདུག
༢།༣ གསོ་རིག་ལུས་སེམས་ནུས་གསོའི་སྨན།
གསོ་རིག་སྨན་གཏན་འབེབས་ཞུས་པ་དེ་ད་བར་ཁྱོན་རྒྱ་གར་ནང་མི་གྲངས་ ༣༥༩ ལ་རིན་མེད་བགོས་འགྲེམས་ཞུས།
༢།༤ དབུས་དང་ས་གནས་ཁག་ལ་ཁང་ཁྱིམ་ཟུར་བཀག་ཆེད་ཁང་པ་གྲ་སྒྲིག་དང་ས་གནས་སུ་རྒྱ་གར་མངའ་གཞུང་གི་གནད་ཡོད་མི་སྣ་ཐུག་ཕྲད་ཞུས་སྐོར།
དེ་སྔ་ཁང་ཁྱིམ་ཟུར་བཀག་ཆེད་ཁང་པ་ཟུར་དུ་གོ་སྒྲིག་ཞུས་ཡོད་ཀྱང་ཟླ་ ༥ ཚེས་ ༣ རྗེས་རྒྱ་གར་ནང་འགྲུལ་བཞུད་ཆོག་པར་བརྟེན། འདི་ནས་བཀོད་ཁྱབ་བཏང་བ་བཞིན་རྒྱ་གར་ནང་བོད་མི་ཁེ་རྐྱང་ཡོད་པའི་ས་གནས་གྲངས་ ༢༣ སྟེང་རྡ་ས་བརྩིས་པས་ས་གནས་གྲངས་ ༢༤ དང་ཁ་ཐོར་ས་གནས་གྲངས་ ༡༡ བཅས་ས་གནས་ཚང་མར་ཕྱི་མི་གཞིས་ཆགས་སམ་ས་གནས་སུ་ཕྱིར་ལོག་བྱེད་མཁན་རྣམས་ཁང་ཁྱིམ་ཟུར་འཇོག་ཆེད་སྡོད་ཁང་གྲ་སྒྲིག་ཆ་ཚང་ཟིན་འདུག་ཅིང་། ས་གནས་མང་ཆེ་བར་ཁང་པའི་ནང་གི་མཐུན་རྐྱེན་དང་བཅས་གྲ་སྒྲིག་གནང་བ་མ་ཟད། ས་གནས་ཁག་ཅིག་ནང་གྲ་སྒྲིག་མུ་མཐུད་གནང་མུས་ཡིན་འདུག ཁང་ཁྱིམ་ཟུར་བཀག་གྱི་མཐུན་རྐྱེན་ཆེད་འགྲོ་གྲོན་བོད་མིའི་སྒྲིག་འཛུགས་ནས་གཏོང་རྒྱུ་ཡིན་འདུག
དེ་བཞིན་ས་གནས་ལ་ཛ་དྲག་གི་གནས་སྟངས་ཆགས་ཚེ་རྒྱ་གར་གི་འབྲེལ་ཡོད་མངའ་གཞུང་གི་མིག་འཛུགས་སྨན་ཁང་ COVID Dedicated Hospital ལ་འབྲེལ་བ་ཞུ་དགོས་ཀྱི་ཡོད་པས་ཛ་དྲག་མ་ཆགས་གོང་སྔོན་ཚུད་ནས་ས་གནས་སོ་སོའི་འགོ་འཛིན་དང་འབྲེལ་ཡོད་ནས་འབྲེལ་བ་གནང་དགོས་པའི་ལམ་སྟོན་ཞུས་པ་བཞིན། ས་གནས་གྲགས་ ༢༨ ནས་དངོས་སུ་མངའ་གཞུང་གི་ཆེད་ལས་དང་གནད་ཡོད་རྣམས་ཐུག་ཕྲད་ཞུས་འདུག་པ་དང་། ས་གནས་ཁག་ཅིག་ནང་འགྲུལ་བཞུད་བཀག་སྡོམ་ཆེ་བས་ཁ་པར་བརྒྱུད་ནས་འབྲེལ་བ་གནང་ཐུབ་པ་བྱུང་འདུག ལས་དོན་འདི་དང་འབྲེལ་རྒྱ་བལ་ས་གནས་སུ་འཕྲོད་བསྟེན་ཚོགས་ཆུང་དང་དེ་བཞིན་གཞིས་ཆགས་ཆེ་ཁག་ཏུ་ན་གཞོན་དང་བླངས་ཚོགས་ཆུང་འདུག་པ་ཚང་མས་ད་ཆ་འཁུར་མཉམ་ལེན་ཞུ་བཞིན་འདུག་པ་ཚོགས་ཆུང་ནས་ལེགས་གསོལ་ཞུ་རྒྱུ་ཡིན།
༢།༥ ནད་འགོག་སྲུང་སྐྱོབ་ཡོ་བྱད་ཀྱི་གནས་སྟངས།
རྒྱ་གར་ནང་གི་ས་གནས་གྲངས་༣༦ ནད་འགོག་སྲུང་སྐྱོབ་ཡོ་བྱད་དང་དེ་བཞིན་རྒྱུན་དུ་སྔོན་འགོག་ཆེད་ཁ་རས་དང་ལག་ཤུབས་སོགས་གདེང་ངེས་བཞིན་པ་མཁོ་སྒྲུབ་གནང་ཐུབ་པ་བྱུང་འདུག
༢།༦ མིའི་ནུས་པ་གོང་སྤེལ་ཚན་པ།
དེ་སྔ་གསལ་བསྒྲགས་སྔོན་སོང་ལྟར་ད་བར་ཁྱོན་སྨན་ཞབས་གྲངས་ ༦༡ དང་ཁ་ལོ་པ་ ༡༦ བཅས་ཁྱོན་མི་གྲངས་ ༧༧ ད་ལྟའི་ཛ་དྲག་གི་དུས་ཚོད་འདིར་རང་རིགས་སྤྱི་ཚོགས་ནང་ཞབས་ཞུའི་ཆེད་མདུན་བསྐྱོད་གནང་ཡོད། དེའི་ནང་ནས་སྨན་ཞབས་གྲངས་ ༤༩ དང་ཁ་ལོ་པ་གྲངས་ ༥ ད་ཆ་དངོས་སུ་ལས་བསྐོས་ཟིན་ནས་ཞབས་ཞུ་སྒྲུབ་བཞིན་ཡོད། གཞན་རྣམས་ད་ལྟའི་ཆར་ཛ་དྲག་དགོས་གལ་བྱུང་མཚམས་གཏོང་ཆོག་ཆོག་བཞུགས་ཡོད།
༢།༧ གསར་འགོད་དང་སྔོན་འགོག་གོ་རྟོགས་ཚན་པ།
འདས་པའི་བདུན་ཕྲག་ཅིག་གི་ནང་ཚན་པ་འདི་ནས་བོད་ཀྱི་བརྙན་འཕྲིན་བརྒྱུད་ལམ་ནས་མི་མང་ལ་ད་ལྟའི་ཐེམ་སྤང་བཀའ་རྒྱའི་འོག་གནས་པའི་སྐབས་ཁྱིམ་ཚང་འཆམ་མཐུན་ཐབས་ལམ་ཐོག་ཆེད་ལས་སློབ་སྟོན་གནང་ཡོད་པ་དང། དེ་བཞིན་དུས་སྐབས་འདིར་མྱོ་རྫས་ངན་གོམས་ཀྱི་དཀའ་ངལ་ཡོད་པ་རྣམས་ལ་གདོང་ལེན་བྱེད་ཕྱོགས་ཐོག་སེམས་ཁམས་འཕྲོད་བསྟེན་ཆེད་ལས་པས་སློབ་གསོ་ལམ་སྟོན་གནང་ཐུབ་པ་བྱུང་ཡོད། གཞན་ཡང་ནད་འབུ་ཁྱབ་གདལ་སྔོན་འགོག་དང་ COVID-19 ནད་རྟགས་མངོན་ཚུལ་ཇི་ལྟར་ཡིན་མིན་གྱང་སྦྱར་པར་རིས་དང་བརྙན་ཐུང་བཅས་བརྒྱུད་མང་ཚོགས་ལ་མཁྱེན་རྟོགས་སླད་འདོན་སྤེལ་ཞུས་ཟིན།
གསུམ་པ། གསལ་བསྒྲགས་ཁག
རྒྱ་གར་དབུས་གཞུང་ནས་རྒྱལ་ནང་གི་མངའ་སྡེ་གང་དང་གང་དུ་ཛ་དྲག་ཉེན་ཚབས་ཆེ་ཆུང་ལ་ལྟོས་པའི་ཚོན་མདོག་དམར་པོ་ཅན་དང་ལི་ཝང་ཅན། ལྗང་ཁུ་ཅན་བཅས་གསུམ་དུ་ཕྱེ་ནས་ལམ་སྟོན་ཁག་གསལ་བསྒྲགས་གནང་ཡོད་ན་བོད་མི་རྣམས་སོ་སོའི་ས་གནས་ཚོན་མདོག་གང་གི་ནང་དུ་ཚུད་ཀྱི་ཡོད་མེད་རྟོག་ཞིབ་ཀྱིས་དབུས་སའི་གཞུང་གིས་གཏན་འབེབས་ལམ་སྟོན་བཀོད་ཁྱབ་གནང་བ་ལྟར་ལག་བསྟར་གནང་དགོས་པའི་རེ་སྐུལ་ཞུ་རྒྱུ་ཡིན།
སེམས་ཁམས་འཕྲོད་བསྟེན་ཆེད་ལས་པའི་འབྲེལ་གཏུག་ཁ་བྱང་དེ་ tibet.net/ tibetanhealth.org དྲ་བའི་ཐོག་ཡོད་པས་ད་བར་མི་གྲངས་ ༡༦ ནས་སློབ་སྟོན་ཞུས་ཡོད་ཅིང་། ད་དུང་བོད་མི་སུ་ཞིག་ལའང་སེམས་ཁམས་དཀའ་ངལ་དང་འབྲེལ་བའི་སློབ་གསོ་ལམ་སྟོན་ཞུ་དགོས་མཆིས་རིགས་ཆེད་ལས་པ་ཁོང་རྣམས་ལ་ངེས་པར་འབྲེལ་བ་གནང་རོགས།
རྒྱ་བལ་གཞིས་ཆགས་ཁག་ནང་ཕྱི་མི་ཡོང་མཁན་མང་དུ་འགྲོ་བཞིན་པའི་གནས་སྟངས་ལ་འདི་ལས་ནས་ས་གནས་ཚང་མར་གཞིས་ཆགས་ཀྱི་སྨན་ཁང་གཙོས་འདུ་འཛོམས་ཆེ་སའི་ས་ཁུལ་དུ་ནད་འབུ་སེལ་ཆེད་དུག་སེལ་སྨན་ཆུ་གྲ་སྒྲིག་དགོས་པའི་ལམ་སྟོན་ཞུས་ཡོད་པ་དང་། འདི་ནས་ས་གནས་སོ་སོའི་གནས་སྟངས་ལ་གཞིགས་ཏེ་དུག་སེལ་སྨན་རྫས་དེ་དུས་ཚོད་ག་དུས་དང་། ས་གནས་གང་དུ་བརྒྱག་དགོས་ལམ་སྟོན་གནང་བ་བཞིན་ལག་བསྟར་ཚུལ་བཞིན་དགོས་པའི་གསལ་བསྒྲགས་ཞུས་ཡོད།
བཞི་པ། ཆེད་ལས་སྨན་པའི་ལམ་སྟོན།
ཕྱི་ལུགས་སྨན་གྱི་ཐོག་ནས་སྨན་པ་བསྟན་འཛིན་རྣམ་གྲོལ་ལགས་ནས་གཙོ་བོ་ནད་སྔོན་འགོག་དང་རྒྱ་གར་དབུས་སའི་ཁྲིམས་དང་ལམ་སྟོན་རྣམས་ལ་བརྩི་བཀུར་ཞུ་དགོས་པ་གསུངས།
བོད་ལུགས་གསོ་བ་རིག་པའི་ཐོག་ནས་ནད་འདིའི་སྔོན་འགོག་ལ་ཕན་པའི་ཟས་སྤྱོད་ལམ་སྟོན་དང་ལུས་སེམས་ནུས་གསོའི་སྨན་གྱི་ཕན་ནུས་ཐོག་ཚོགས་ཆུང་གི་སློབ་སྟོན་པ་༸སྐུའི་བླ་སྨན་པ་ཨེམ་ཆི་ཚེ་དབང་རྟ་མགྲིན་མཆོག་ནས་སློབ་སྟོན་བརྙན་ཐུང་ཞིག་བཟོས་ཟིན་པ་དེ་སང་ཉིན་བོད་ཀྱི་བརྙན་འཕྲིན་བརྒྱུད་འདོན་སྤེལ་ཞུ་རྒྱུ་ཡིན།
ལྔ་པ། རེ་སྐུལ།
ནད་ཡམས་འདི་ཁྱབ་གདལ་སྔོན་འགོག་ཆེད་ང་ཚོའི་སྤྱི་ཚོགས་ནང་མི་དང་མིའི་དབར་གྱི་རྒྱང་ཐག་ཉུང་མཐར་མི་ཊར་༡་་་༢ བར་གཞག་དགོས་པ་ད་ལན་སླར་ཡང་རེ་སྐུལ་ནན་ཏན་ཞུ་བཞིན་ཡོད།
རྡ་སས་གཙོས་ས་གནས་ཁག་ཏུ་རང་ཁྱིམ་མམ་གཞིས་ཆགས་སུ་ཚུར་ལོག་པའམ་ཕྱི་མི་གཞན་གཞིས་ཆགས་དང་ས་གནས་ནང་དུ་འཛུལ་སྐབས་ཁ་ཁུ་སིམ་སིམ་སོ་སོའི་ནང་དུ་མ་འཛུལ་བར་ངེས་པར་དུ་ཉིན་གྲངས་ ༢༨ རིང་ཁང་ཁྱིམ་ཟུར་བཀག་ཐོག་བཞུགས་དགོས། དེ་དོན་ཁྱབ་ཁོངས་སོ་སོའི་ས་གནས་འགོ་འཛིན་ལ་འབྲེལ་བ་ཞུ་དགོས་པ་དང་རྡ་རམ་ས་ལ་ཁུལ་གྱི་ལས་བྱེད་རྣམས་རྡ་ས་དབུས་སྣེ་ལེན་འབྲེལ་མཐུད་ཁང་གི་འགན་འཛིན་དང་འཕྲོད་བསྟེན་འབྲེལ་ཡོད་ལས་བྱེད་དྲུང་གཞོན་བསྟན་འཛིན་ཀུན་བཟང་ལགས་སུ་འབྲེལ་བ་གནང་དགོས་པའི་འབོད་སྐུལ་ཞུ།
ཕྱི་ཟླ་ ༥ ཚེས་ ༣ ནས་རྒྱ་གར་ནང་འགྲུལ་བཞུད་གང་འཚམ་འགོ་བཙུགས་ཟིན་པས་མི་མང་པོ་ཞིག་འགྲུལ་བཞུད་བྱེད་བཞིན་ཡོད་སྟབས་རང་རིགས་རྣམས་ཀྱིས་ནད་མནར་ཛ་དྲག་བྱུང་ན་མ་གཏོགས། དེ་མིན་ཕྱི་ལ་འགྲུལ་བཞུད་མ་གནང་བར་གང་ཐུབ་སོ་སོའི་ནང་དུ་བཞུགས་རོགས།
མཐའ་དོན། རང་རིགས་བོད་མི་རྣམས་གཙོ་ཆེར་ནང་པ་སངས་རྒྱས་པ་ཡིན་སྟབས། བསམ་བློ་གཏོང་ཕྱོགས་དང་ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ཡིད་ལ་བཅངས་ནས། གནས་ཡུལ་རྒྱ་གར་གཞུང་གི་ལམ་སྟོན་བཀོད་ཁྱབ་ཙམ་མ་ཟད། བོད་མིའི་སྒྲིག་འཛུགས་ཀྱི་ལམ་སྟོན་བཀོད་ཁྱབ་དང་ནད་འགོག་ཤེས་བྱ་དང་སློབ་གསོའི་ལམ་སྟོན་གནང་བ་རྣམས་ལ་དམ་འཛིན་ཕྱག་བསྟར་གནང་རོགས་ཞེས་འབོད་སྐུལ་ཞུ་རྒྱུ་ཡིན། །
