ཕྱི་ལོ་ ༢༠༢༠ ཟླ་ ༥ ཚེས་ ༢༤ རེས་གཟའ་ཉི་མ།
༄༅། །འདི་གར་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཤེས་རིག་ལས་ཁུངས་ནས་བོད་ཁྱིམ་དབུས་སྤྱི་ཁྱབ་ལས་ཁུངས་སུ་འབྲེལ་བ་གནང་ནས་རྡ་ཤོད་བོད་ཁྱིམ་སློབ་གྲྭ་དེ་བཞིན་ཟུར་བཀག་གི་ཁང་པའི་མཐུན་འགྱུར་སྦྱོར་རྒྱུའི་ཞལ་བཞེས་གནང་ཡོདཔ་ལྟར། ཕྱི་ཚེས་ ༢༢ ཉིན་རྒྱབ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གཙོས་དྲུང་ཆེ་དང་། ཤེས་རིག་དྲུང་ཆེ། རྡ་ས་ས་གནས་འགོ་འཛིན། ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་དང་འཕྲོད་བསྟེན་ལས་ཁུངས་ཀྱི་འགོག་དབྱེ་ཟུར་འཇོག་སྡེ་ཚན་གི་འབྲེལ་མཐུད་པ་དྲུང་གཞོན་བསྟན་འཛིན་ཀུན་བཟང་ལགས་བཅས་རྡ་ཤོད་བོད་ཁྱིམ་སློབ་གྲྭར་ཆེད་ཕེབས་གནང་།
ཕྱི་མི་རྡ་སར་ཕེབས་མཁན་ཁྲོད་བོད་མི་ཉིན་རེ་བཞིན་ཇེ་མང་དུ་འགྲོ་བཞིན་པའི་གནས་སྟངས་ལ་གཞིགས་ཏེ་བོད་མིའི་སྒྲིག་འཛུགས་ནས་འགོག་དབྱེ་ཟུར་འཇོག་ཆེད་ཁང་པ་དང་ཞལ་ལག དེ་བཞིན་གསོ་རིག་སྨན་དང་ཚ་བ་བརྟག་དཔྱད་ཡོ་བྱད་སོགས་མཐུན་འགྱུར་སྦྱོར་སྤྲོད་གནང་བཞིན་ཡོད་པ་དང་། རྡ་ཤོད་བོད་ཁྱིམ་སློབ་གྲྭ་དེ་འགོག་དབྱེ་ཟུར་འཇོག་ཁང་དུ་བསྒྱུར་ཆེད་ཁང་པ་དང་ཉལ་ཁང་། ཐབ་ཚང་སོགས་ཀྱི་མཐུན་འགྱུར་སྦྱོར་ཐད་གཟིགས་ཞིབ་གནང་ཡོད།
དེ་རྗེས་གོང་གསལ་ཚོགས་མི་རྣམས་དང་བདེ་ལེགས་སྨན་ཁང་གི་འགན་འཛིན་བཅས་རྡ་ས་དབུས་སྣེ་ལེན་ཁང་དུ་ Covid གཅེས་སྐྱོང་ཁང་འཛུགས་གཏན་འཁེལ་བ་བཞིན། དེར་བརྟག་དཔྱད་ཁང་དང་སྨན་གྱི་ཡོ་བྱད་སོགས་མཐུན་འགྱུར་འཕར་མ་གང་སྦྱར་དགོས་པ་སོགས་གཟིགས་རྟོག་སླད་ཆེད་ཕེབས་གནང་ཡོད། ཆབས་ཅིག་འབྲེལ་མཐུད་ལས་བྱེད་ནས་འགོག་དབྱེ་ཟུར་འཇོག་ཁང་དུ་གསར་དུ་འབྱོར་བ་རྣམས་ངོ་ཐུག་གིས་འགོག་དབྱེ་ཟུར་འཇོག་རིང་བྱེད་སྒོ་ལམ་སྟོན་ཁག་འགྲེལ་བརྗོད་གནང་ཡོད།
