ཕྱི་ལོ་ ༢༠༢༠ ཟླ་ ༥ ཚེས་ ༡༩ རེས་གཟའ་མིག་དམར། 

༄༅། །རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ལ་བརྟེན་ནས་རྒྱ་གར་ནང་ཐེམ་སྤང་བཀའ་རྒྱ་བསྡམས་པར་བརྟེན་རྒྱ་གར་ནུབ་ཕྱོགས་གུ་ཇི་ར་ཏའི་གྲོང་ཁྱེར་ཝ་དོ་ད་རའི་མཐོ་སློབ་ཏུ་སློབ་གཉེར་གནང་བཞིན་པའི་བོད་མིའི་སློབ་མ་གྲངས་ ༨༣ མཐོ་སློབ་ཁང་གི་སྡོད་ཁང་དུ་གནས་སྡོད་བྱེད་བཞིན་ཡོད་ཀྱང་། ཉེ་ཆར་མཐོ་སློབ་ཀྱི་འཛིན་སྐྱོང་ནས་མཐོ་སློབ་དེ་འགོག་དབྱེ་ཟུར་འཇོག་ཁང་དུ་བེད་སྤྱོད་བྱེད་རྒྱུ་ཡིན་སྟབས། སློབ་མ་རྣམས་སྡོད་ཁང་ནས་ཐོན་དགོས་པའི་བཀའ་བཏང་བར་བརྟེན། བོད་མིའི་སྒྲིག་འཛུགས་ནས་སློབ་མ་རྣམས་རང་གནས་སུ་བདེ་འབྱོར་ཆེད་འབྲེལ་ཡོད་མངའ་སྡེ་ཁག་དང་འབྲེལ་བ་གནང་སྟེ། དེ་སྔ་སློབ་མ་གྲངས་ ༢༩ སྤྱི་སྤྱོད་རླངས་འཁོར་བརྒྱུད་རྒྱ་གར་བྱང་ཕྱོགས་ལྡེ་ར་ལྡུན་དུ་བདེ་འཇགས་ངང་འབྱོར་ཐུབ་ཡོད།  སློབ་མ་རྣམས་ཀྱི་འགྲིམ་འགྲུལ་འགྲོ་སོང་ཚང་མ་བོད་མིའི་སྒྲིག་འཛུགས་ཀྱིས་གནང་ཡོད་པ་མ་ཟད། སློབ་མ་རེར་ཉིན་རེའི་ལྟོ་དོད་ཧིན་སྒོར་ ༡༠༠༠ རེ་ཡང་གནང་ཡོད། ཕྱོགས་མཚུངས་ལ་དྭགས་ནས་ཡིན་པའི་བོད་པའི་སློབ་མ་གྲངས་ ༡༠ ལ་རང་གནས་སུ་བསྐྱོད་ཆེད་ཧིན་སྒོར་ ༥༠༠༠ རེ་གནང་ཡོད།

དེ་རིང་སྟེ་ཕྱི་ལོ་ ༢༠༢༠ ཟླ་ ༥ ཚེས་ ༡༩ ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་རྒྱ་གར་ནུབ་ཕྱོགས་གུ་ཇི་ར་ཏའི་གྲོང་ཁྱེར་ཝ་དོ་ད་རའི་ནང་རྟེན་གཞི་བྱས་པའི་བྷ་རོ་ཌ་མཐོ་སློབ་ཁང་གི་སློབ་མ་གྲངས་ ༡༥ བཞུགས་སྒར་རྡ་སའི་ཉེ་འགྲམ་དུ་འགོག་དབྱེ་ཟུར་འཇོག་ཁང་དུ་བདེ་ལེགས་ངང་འབྱོར་ཡོད་པ་དང་། འགོག་དབྱེ་ཟུར་འཇོག་ཁང་དུ་འབྱོར་བའི་ཁྲོད་ནས་སློབ་མ་གྲངས་ ༩ བུ་མོ་ཡིན་པ་དང་ ༦ བུ་རེད། སྐབས་དེར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས། ཤེས་རིག་དྲུང་ཆེ་ཀརྨ་སེང་གེ་ལགས་སོགས་འགོག་དབྱེ་ཟུར་འཇོག་ཁང་དུ་ཆེད་ཕེབས་ཀྱིས་སློབ་མ་རྣམས་ལ་ཏོག་དབྱིབས་གཉན་རིམས་དང་འབྲེལ་བའི་ལམ་སྟོན་གནང་ཡོད།  

དེ་ཡང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་སློབ་མ་རྣམས་ལ་འཚམས་འདྲི་དང་འབྲེལ་གསུང་དོན།  རྣམ་པ་ཚོ་ཚང་མ་ཤེས་བྱ་ཡོན་ཏན་ཡོད་མཁན་ཤ་སྟག་རེད། གསར་འགྱུར་བརྒྱུད་ལམ་ཁག་ཏུ་ཏོག་དབྱིབས་གཉན་རིམས་དང་འབྲེལ་བའི་གནས་ཚུལ་སྐོར་གཟིགས་ཀྱི་ཡོད།  གནས་ཡུལ་རྒྱལ་ཁབ་ཀྱི་སློབ་ཕྲུག་དང་ལས་ཀ་བྱེད་མཁན་གྱི་མི་སྣ། དེ་བཞིན་མངའ་སྡེ་གཅིག་ནས་མངའ་སྡེ་གཞན་ལ་སླེབས་པའི་མི་སྣ་ཡིན་ནའང་རེད། གནས་སྟངས་ཞིག་གི་འོག་ནས་འགྲོ་དགོས་པ་ཆགས་ཀྱི་ཡོད་པས་དེ་དག་ཚང་མ་རྣམ་པ་ཚོས་གཟིགས་ཡོད། ང་ཚོའི་སྒྲིག་འཛུགས་འདི་བཙན་བྱོལ་གྱི་སྒྲིག་འཛུགས་ཤིག་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་མི་རབས་རྒན་པ་རྣམས་ཀྱིས་སྐུ་ལས་བསྐྱོན་པའི་བཀའ་དྲིན་ལ་བརྟེན་ནས་བོད་པའི་སྤྱི་ཚོགས་ནང་ཕན་ཚུན་ལྟ་སྐྱོང་དང་། གཅིག་ཕན་གཅིག་གྲོགས་གནང་དང་གནང་མུས་ཡིན་པ་དེ་དག་མིག་དཔེ་འོས་པ་ཞིག་རེད་དྲན་གྱི་འདུག

དེར་བརྟེན་དེ་འདྲའི་གནས་སྟངས་ཤིག་དང་འགྲོ་སྟངས་ཤིག་གི་འོག་ནས་རྣམ་པ་ཚོ་འདིར་ཕེབས་པ་ཆགས་ཀྱི་ཡོད། རྣམ་པ་ཚོའི་ནང་ནས་སུ་གཅིག་ལ་ནད་རྟགས་ཐོན་མེད། ང་ཚོའི་དབར་ཁྱད་པར་གང་ཡང་མེད་པའི་གཅིག་མཚུངས་རེད། རྣམ་པ་ཚོ་བཞུགས་སའི་སྐོར་ཕྲན་བུ་མཁྱེན་པ་ཡིན་ན་ཡག་པོ་ཡོད་རེད་དྲན་གྱི་འདུག བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་དང་སཾ་བྷོ་ཌ་བོད་སློབ་ཚོགས་པ་ནས་རྣམ་པ་ཚོའི་བཞུགས་གནས་གོ་སྒྲིག་ཆེད་སྐུ་ལས་ཧ་ཅང་བསྐྱོན་ཡོད། དེ་སྔ་འཕྲོད་བསྟེན་ལས་ཁུངས་དང་ཤེས་རིག་ལས་ཁུངས་ཀྱི་འབྲེལ་ཡོད་རྣམས་འདིར་ཡོང་སྟེ་འཆར་གཞི་ཞིག་བསྒྲིགས་པ་རེད། དེ་རྗེས་དཔལ་ལྡན་སྲིད་སྐྱོང་མཆོག་ཆེད་གཉེར་འདིར་ཕེབས་ཡོད། 

སྤྱིར་ཏོག་དབྱིབས་གཉན་རིམས་སྐོར་གང་ཙམ་མཁྱེན་རྟོགས་ཡོད་ནའང་སེམས་ནང་རྣམ་རྟོག་གི་རྐྱེན་པས་འཛིན་སྐྱོང་ལ་གདོང་ལེན་བྱེད་དགོས་པའི་གནས་སྟངས་ཕྲན་བུ་ཆགས་ཡོད། འོན་ཀྱང་གནས་སྟངས་དེ་དག་ལ་འཛེམས་ཟོན་མེད་པའི་ཐོག་ནས་རྣམ་པ་ཚོ་ལྷོད་ལྷོད་ངང་བཞུགས་ས་སོགས་མདོར་ན་ཟས་གོས་གནས་མལ་གོ་སྒྲིག་ཞུ་ཐུབ་པ་བྱུང་ཡོད།  ཅེས་སོགས་ཀྱི་གསུང་བཤད་གནང་།།