ཕྱི་ལོ་ ༢༠༢༠ ཟླ་ ༥ ཚེས་ ༡༩ རེས་གཟའ་མིག་དམར།
༄། །ཀུན་གྱིས་དགོངས་གསལ་ལྟར་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་བོད་ཟླ་བཞི་པའི་ཚེས་བརྒྱད་དང་དགུ། ཕྱི་ལོ་ ༢༠༢༠ ལོའི་ཕྱི་ཟླ་ ༥ ཚེས་ ༣༠ དང་ ༣༡ བཅས་ཉིན་གཉིས་ཀྱི་རིང་ཐུགས་རྗེ་ཆེན་པོའི་དབང་ཆེན་བཀའ་དྲིན་བསྐྱང་རྒྱུའི་གསལ་བསྒྲགས་སྔོན་སོང་དེ་ལྟར་ཡང་ད་ལན་ཕྱི་ཚེས་ ༢༩ དང་ ༣༠ ། བོད་ཚེས་ ༧ དང་༨ ཉིན་སོ་སོར་སྟ་གོན་དང་དངོས་གཞི་གནང་གཏན་འཁེལ་བས་ཉིན་དེ་གཉིས་ཀྱི་སྔ་དྲོར་རྒྱ་གར་གྱི་ཆུ་ཚོད་ ༩ པ་ནས་དད་ལྡན་དོན་གཉེར་ཅན་རྣམས་ནས་དུས་ཐོག་ཏུ་༸གོང་ས་མཆོག་གི་བོད་དབྱིན་རྒྱ་སོགས་ཀྱི་སྐད་ཡིག་དུ་མའི་དྲ་ཚིགས་ནས་མཇལ་ཐུབ་པས་དེ་དོན་དགོངས་འཇགས་ཞུ། དགའ་ལྡན་ཕོ་བྲང་ནས། ཕྱི་ལོ་ ༢༠༢༠ ཕྱི་ཟླ་ ༥ པའི་ཕྱི་ཚེས་ ༡༩ ལ།
• དུས་ཚོད།
བོད་ཟླ་ ༤ ཚེས་ ༧ ཉིན་གྱི་སྔ་དྲོ་ཆུ་ཚོད་ ༩།༠༠ སྟ་གོན།
བོད་ཟླ་ ༤ ཚེས་ ༨ ཉིན་གྱི་སྔ་དྲོ་ཆུ་ཚོད་ ༩།༠༠ དངོས་གཞི།
ཕྱི་ཟླ་ ༥ ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༩།༠༠ སྟ་གོན།
ཕྱི་ཟླ་ ༥ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༩།༠༠ དངོས་གཞི།
༼སྤྱིར་ནད་ཡམས་གཏན་མེད་དུ་མ་ཞི་བར་དང་། ལྷག་པར་བཀའ་ཆོས་ཉིན་གཉིས་ཀྱི་རིང་ཚོགས་པ་དང་དགོན་སྡེ་ཆེ་ཆུང་སོགས་ཅི་འདྲ་ཞིག་ཡིན་རུང་། ཡོངས་གྲགས་ཀྱི་ནད་ཡམས་ཁྱབ་གདལ་སྔོན་འགོག་ལ་དམིགས་པའི་ལག་ལེན་སྤྱི་དང་། ཁྱད་པར་ཆོས་ཞུ་བ་རྣམས་ནས་ཕན་ཚུན་བར་ཐག་བཅད་དེ་འགྲོ་འདུག་གི་སྤྱོད་ལམ་བསྟེན་ཕྱོགས་སོགས་ས་གནས་སོ་སོར་བཅས་པའི་བཀའ་རྒྱ་ལས་ནམ་ཡང་མི་འདའ་བར་བཀའ་ཆོས་གསན་གཟིགས་གནང་རོགས་ཞེས་ཞུ་རྒྱུ་ཡིན། འདིའི་ཐད་ལས་ཀྱི་སྣེ་མོར་གཏོགས་པ་ཐམས་ཅད་ནས་བཀའ་ཆོས་ཀྱི་ཆེད་ཐོག་མར་ཡར་འཛོམས་པའི་སྐབས་དང་། དངོས་གཞི་བཀའ་ཆོས་འཚོགས་པའི་སྐབས། དེ་བཞིན་མར་འགྲོལ་བའི་སྐབས་བཅས། མདོར་ན་ཐོག་མཐའ་བར་གསུམ་དུ་དོ་གལ་ཆེན་པོས་བཏང་འཛིན་ཆེས་ཆེར་གནང་རོགས་ཞེས་ནན་ཏན་དུ་ཞུ་རྒྱུ་ཡིན། གནས་ཚུལ་གཉན་འཕྲང་ཅན་གྱི་སྐབས་འདིར་རང་གཞན་ཀུན་ནས་དོན་མེད་ཀྱི་གླེང་གཞི་མི་ཡོང་བ་དང་། ལྷག་པར་ནད་ཡམས་སྔོན་འགོག་གི་ལག་ལེན་རྣམས་ལ་ལྷོད་ཡངས་མི་ཡོང་བའི་ཐུགས་འགན་ཆེ་བཞེས་གནང་དགོས་ཞེས་ཀྱང་ཞུ་རྒྱུ་ཡིན།༽
