ཕྱི་ལོ་ ༢༠༢༠ ཟླ་ ༥ ཚེས་ ༡༥ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༥ ཚེས་ ༡༥ རེས་གཟའ་པ་སངས་ཉིན་བོད་མིའི་སྒྲིག་འཛུགས་བཀའ་ཤག་གི་ཚོགས་ཁང་དུ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དབུ་བཞུགས་ཐོག འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས། འཕྲོད་བསྟེན་དྲུང་འཕར་གྱིས་གཙོས་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གི་ཚོགས་མི་རྣམས་ཚང་འཛོམས་ཀྱིས་བཙན་བྱོལ་བོད་མིའི་གཞིས་ཆགས་ཁག་དང་། གནས་སྡོད་བོད་མི་ས་གནས་བཅས་སུ་ཏོག་དབྱིབས་གཉན་རིམས་དང་འབྲེལ་བའི་ལས་དོན་ཇི་སྤེལ་སྙན་སྒྲོན་གནང་ཡོད།
སྐབས་དེར་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་དྲུང་ལས་བསྟན་འཛིན་ཀུན་བཟང་ལགས་ཀྱིས། བོད་མིའི་སྒྲིག་འཛུགས་ངོས་ནས་ཏོག་དབྱིབས་གཉན་རིམས་ཀྱི་ Treatment Center ཞིག་འཛུགས་རྒྱུའི་འཆར་གཞི་ཡོད་སྐོར་དང་། དེ་ཡང་སྔོན་འགྲོའིི་འཆར་གཞི་ཐོག་མར་བོད་མིའི་གཞིས་ཆགས་སྦེལ་ཀོབ་དང་མོན་གྷོ། དེ་བཞིན་བཞུགས་སྒར་རྡ་ས་བཅས་སུ་འཛུགས་འཆར་ཡོད་སྐོར་དང་། དེར་སྨན་ཁང་གི་ཡོ་ཆས་ Oxygen Cylinder ལ་སོགས་གྲ་སྒྲིག་ཡོད་སྐོར་སོགས་སྙན་སེང་ཞུས།
དེ་ནས་འཕྲོད་བསྟེན་དྲུང་གཞོན་རྣམ་རྒྱལ་དགེ་འདུན་ལགས་ཀྱིས། ད་བར་ས་གནས་བོད་མིའི་གཞིས་ཆགས་ཁག་ཏུ་དང་བླངས་ཀྱི་སྨན་ཞབས་པ་ཁྱོན་མི་གྲངས་ ༦༤ དང་། ཁ་ལོ་བ་ ༡༦ བྱུང་ཡོད་པ་དང་། ཕྱོགས་མཚུངས་གཞིས་ཆགས་གཞན་ཁག་གཅིག་ཏུ་ཆོད་གན་གྱི་ལམ་ནས་སྨན་ཞབས་པའི་ས་མིག་གསལ་བསྒྲགས་ཡོད་སྐོར་སོགས་གསུངས།
སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་མིའི་ཆེད་ཕྱག་ལས་ཧུར་ཐག་གནང་མཁན་ལས་བྱེད་ཀྱིས་གཙོས་འཕྲོད་ལས་པ་སོགས་ལ་ཡི་རང་བསྔགས་བརྗོད་དང་སྦྲགས། བཙན་བྱོལ་བོད་མིའི་གཞིས་ཆགས་ཁག་གཅིག་ལ་སྨན་ཞབས་པ་གཅིག་ལས་མེད་པ་རྣམས་ལ་དང་ཞབས་བླང་ཕྱོགས་ཐད་ཤུགས་སྣོན་སྐྱོན་དགོས་སྐོར་གསུངས།
དེ་ནས་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བསྟན་འཛིན་སྒྲོལ་དཀར་ལགས་ཀྱིས། བཙན་བྱོལ་བོད་མིའི་གཞིས་ཆགས་ཁག་ཏུ་ཉིན་ལྟར་ཚ་བ་བརྟག་དཔྱད་བྱེད་བཞིན་ཡོད་སྐོར་དང་། བརྟག་དཔྱད་བྱེད་པའི་སྐབས་གློ་ནད་ཀྱི་ནད་རྟགས་ཡོད་པའི་མི་གཉིས་ཐོན་ཡོད་སྐོར། ཕྱོགས་མཚུངས་མང་ཚོགས་ངོས་ནས་ལས་དོན་ཐད་རྒྱབ་སྐྱོར་གནང་རོགས་ཞེས་འབོད་སྐུལ་ཡང་ཞུས་སོང་།
དེ་རྗེས་ངག་དབང་བསྟན་འཛིན་ལགས་ཀྱིས། རྡ་ས་གངས་སྐྱིད་དང་སྨན་རྩིས་ཁང་ཁུལ་ནས་ཁྱོན་མི་གྲངས་ ༡༣༧༤ ལ་ཚ་བ་བརྟག་དཔྱད་བྱས་པའི་ཁོངས་ནས་ནད་རྟགས་ཐོན་པ་གཅིག་ཀྱང་མེད། ཅེས་དང་། གཞན་ཡང་བོད་མིའི་སེམས་ཁམས་འཕྲོད་བསྟེན་ཐད་གསུང་དོན། ད་བར་བོད་མིའི་སེམས་ཁམས་ཐོག་དཀའ་ངལ་ཡོད་པ་རྣམས་ལ་ཁ་པར་བརྒྱུད་སེམས་ཁམས་སློབ་གསོ་གནང་བཞིན་ཡོད་པ་མ་ཟད། བོད་མི་འགོག་དབྱེ་ཟུར་འཇོག་ཏུ་ཡོད་པ་རྣམས་ལའང་འབྲེལ་བ་ཞུས་ཏེ་སློབ་གསོ་གནང་བཞིན་ཡོད་སྐོར་གསུངས།
དེ་ནས་བདེ་སྲུང་ཡན་ལག་ལས་ཁུངས་ཀྱི་འགན་འཛིན་སྐལ་བཟང་བསྟན་འཛིན་ལགས་ཀྱིས། དེ་སྔོན་གངས་སྐྱིད་རྒྱལ་སྒོ་སྲུང་ཕྱོགས་ཐད་གོ་བསྡུར་བྱུང་བ་ལྟར། བོད་མིའི་སྒྲིག་འཛུགས་བདེ་སྲུང་ལས་ཁུངས་ནས་ད་ཆ་གངས་སྐྱིད་རྒྱལ་སྒོ་ཚགས་ཚུད་ངང་སྲུང་བཞིན་ཡོད་སྐོར་སོགས་སྙན་སེང་ཞུས།
དེ་རྗེས་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས། ད་བར་ནང་སྲིད་ལས་ཁུངས་སུ་བོད་མི་དཀའ་ངལ་ཡོད་མཁན་ཁྱོན་མི་གྲངས་ ༡༥༠༠ ཙམ་གྱིས་འགེངས་ཤོག་བཀང་ཡོད་སྐོར་དང་། དེ་དག་གི་ཁྲོད་ནས་ཕལ་ཆེ་བ་རྡ་ས་ཁུལ་གནས་སྡོད་བོད་མི་ཡིན་ཞིང་། བོད་མིའི་སྒྲིག་འཛུགས་ནང་སྲིད་ལས་ཁུངས་ནས་དུས་རྒྱུན་དུ་བོད་མི་རྒན་འཁོགས་ཀྱིས་གཙོས་བོད་མི་དཀའ་ངལ་ཅན་རྣམས་ལ་རོགས་རམ་གནང་བཞིན་ཡོད་པ་དང་། ནང་སྲིད་ལས་ཁུངས་དང་ཐད་ཀར་འབྲེལ་བ་ཡོད་མཁན་སྦྱིན་བདག་རྣམས་ལ་དེ་སྔོན་སྔ་འདོན་གནང་རོགས་ཞེས་ཞུས་པ་ལྟར་རོམས་དངུལ་བྱུང་ཡོད་སྐོར་སོགས་གསུངས།
སྤྱིར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་བཙན་བྱོལ་བོད་མིའི་གཞིས་ཆགས་ཁག་གི་འཕྲོད་ལས་པ་རྣམས་ལ་ཏོག་དབྱིབས་གཉན་རིམས་དང་། སེམས་ཁམས་འཕྲོད་བསྟེན་སོགས་ཀྱི་ཐད་དྲ་ལམ་བརྒྱུད་ཟབ་སྦྱོང་གནང་འཆར་ཡོད་འདུག་པ་བཅས། །
