ཕྱི་ལོ་ ༢༠༢༠ ཟླ་ ༥ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༥ ཚེས་ ༡༡ རེས་གཟའ་ཟླ་བའི་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྡ་སའི་ཉེ་འདབས་སུ་ཡོད་པའི་སྣེ་ལེན་ཁང་དུ་ཏོག་དབྱིབས་གཉན་རིམས་སྔོན་འགོག་ཆེད་ཕྱོགས་མཐའ་ནས་ཕེབས་པའི་བོད་མི་ཟུར་འཇོག་བྱེད་ཡུལ་སྡོད་ཁང་དུ་གཟིགས་ཞིབ་གནང་འདུག
དེ་ཡང་ཏོག་དབྱིབས་གཉན་རིམས་སྔོན་འགོག་སླད་བོད་མིའི་སྒྲིག་འཛུགས་ཀྱི་སྲི་ཞུ་བ་དང་ཉེ་འབྲེལ་ནང་མི་སྤུན་མཆེད་སུ་ཞིག་ཕྱོགས་མཐའ་ནས་རྡ་སར་ཕེབས་མཁན་ཡོད་མཆིས། གནས་སྐབས་ཏོག་དབྱིབས་གཉན་རིམས་ཉེན་གཡོལ་ཆེད་དབུས་སྣེ་ལེན་ཁང་དུ་ཉིན་གྲངས་ ༢༨ རིང་འགོག་དབྱེ་ཟུར་འཇོག་བྱེད་དགོས། ད་ལྟ་སྲི་ཞུ་བ་ཁག་ཅིག་དང་ཉེ་འབྲེལ་ནིང་མི་སྤུན་མཆེད་ཁག་གཅིག་འགོག་དབྱེ་ཟུར་འཇོག་ཏུ་གནས་མུས་ཡིན་འདུག
སྐབས་དེར་བདེ་ལེགས་སྨན་ཁང་གི་སྨན་པ་དང་བོད་མིའི་སྒྲིག་འཛུགས་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གི་ཚོགས་མི་བསྟན་འཛིན་བཙོན་འགྲུས་ལགས་ཀྱིས་འགོག་དབྱེ་ཟུར་འཇོག་ཇི་ལྟར་སྟངས་འཛིན་བྱེད་ཕྱོགས་སོགས་ཀྱི་སྐོར་གསལ་བཤད་གནང་འདུག
སྐབས་དེར་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གཙོས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས། ཤེས་རིག་དྲུང་ཆེ་ཀརྨ་སེངྒེ་ལགས་བཅས་ལྷན་བཅར་ཞུས་འདུག གོང་ཚེས་ཉིན་ཐོག་མར་དཔལ་ལྡན་སྲིད་སྐྱོང་མཆོག་གིས་སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་ཡིག་ཚང་དུ་སྐོར་སྐྱོད་དུ་ཕེབས་ཡོད་པ་བཅས། །
