ཕྱི་ལོ་ ༢༠༢༠ ཟླ་ ༥ ཚེས་ ༡༨ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་དྲུག་ལ་ཕེབས་སྐབས་ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་༸ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གནང་ནས་ཉིན་གསུམ་གྱི་རྗེས་ལ་ཁོང་དང་ཁོང་གི་ནང་མི་ལྷན་རྒྱས་དང་བྱ་བྲལ་རིན་པོ་ཆེ་བཅས་རྒྱ་གཞུང་གིས་བཙན་འཁྲིད་བྱས་ཏེ་ད་བར་གར་སོང་ཆ་མེད་དུ་གྱུར་ནས་ལོ་ངོ་ ༢༥ འཁོར་བའི་དུས་མཚམས་འདིར་ཐེ་སྡོད་བོད་རིགས་ཚོགས་པའི་གོ་སྒྲིག་འོག་བོད་དོན་རྒྱབ་སྐྱོར་གནང་མཁན་ཁག་གཅིག་གིས་ཐེ་ཝན་རང་དབང་ཐང་ཆེན་མདུན་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གློད་འགྲོལ་དགོས་པའི་ལས་འགུལ་སྤེལ་བ་རེད།
ཕྱི་ཟླ་ ༥ ཚེས་ ༡༧ དགོང་དྲོ་ཆུ་ཚོད་ ༧ པའི་ཐོག་ཐེ་ཝན་རང་དབང་ཐང་ཆེན་མདུན་བོད་མི་དང་། བོད་དོན་རྒྱབ་སྐྱོར་གནང་མཁན་ཐེ་ཝན་ཡུལ་མི་ཁག་གཅིག་མཉམ་འཛོམས་ཐོག་༸ཀུན་གཟིགས་པཎ་ཆེན་རིན་པོ་ཆེའི་སྐུ་པར་དང་། པཎ་ཆེན་རིན་པོ་ཆེ་གློད་འགྲོལ་དགོས་པའི་ཕྲེད་དར་འཕྱར་ཏེ་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གློད་འགྲོལ་དགོས་པའི་སྐད་འབོད་གནང་རྗེས། བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་འདུ་འཛོམས་ཞུ་དགོས་དོན་ངོ་སྤྲོད་སྙིང་བསྡུས་གནང་སྟེ་ཚང་མར་ཐུགས་རྗེ་ཆེ་ཞུས་གནང་།
འཛམ་གླིང་ཡུལ་གྲུ་ཀུན་ལ་རྒྱ་ནག་ཝུ་ཧན་གྱི་ནད་ཡམས་ཀྱིས་རྐྱེན་པས། བོད་རིགས་ཚོགས་པའི་ངོས་ནས་རང་གཞུང་དབུས་བོད་མིའི་སྒྲིག་འཛུགས་ཀྱི་ལམ་སྟོན་ལྟར་བོད་མི་རྣམས་རང་རང་གི་ཁྱིམ་ཚང་ནང་ནས་མར་མེ་བསྒྲོན་ཏེ་དུས་དྲན་སྲུང་བརྩི་ཞུ་དགོས་པའི་འབོད་སྐུལ་ཞུས་དོན་ལྟར། བོད་མི་དང་ཐེ་ཝན་བོད་དོན་རྒྱབ་སྐྱོར་གནང་མཁན་ཁག་གཅིག་ནས་རང་རང་གི་ཁྱིམ་ཚང་ནས་དུས་དྲན་སྲུང་བརྩི་གནང་ཡོད་པ་རེད།
