ཕྱི་ལོ་ ༢༠༢༠ ཟླ་ ༥ ཚེས་ ༢༨ རེས་གཟའ་ཕུར་བུ།
༄༅། །བོད་ཀྱི་བརྙན་འཕྲིན་ཚན་པའི་གསར་འགོད་པ་བསྟན་འཛིན་དབང་ཕྱུག་ལགས་ཀྱིས་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་དང་། འབྲེལ་ཡོད་ཏོག་དབྱིབས་གཉན་རིམས་སྔོན་འགོག་ཚན་པའི་ལས་བྱེད་ཁག་གཅིག་ལ་ཏོག་དབྱིབས་གཉན་རིམས་དང་འབྲེལ་བའི་ཡོངས་གྲགས་དྲི་བ་ཁག་གཅིག་ཕུལ་བར་ལན་འདེབས་གནང་འདུག
གསར་འགོད་པས། ནད་ཡམས་འདི་དང་འབྲེལ་བའི་ཁྱེད་ཀྱི་ལས་འགན་གཙོ་བོ་གང་ཡིན་ནམ།
དྲུང་འཕར་བྱམས་པ་ཕུན་ཚོགས་ལགས། ཛ་དྲག་སྔོན་འགོག་ལས་གཞིའི་ཆེད་ཚོགས་ཆུང་ཟུར་འཛུགས་ཡོད། ད་ལྟའི་ཆར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ངོས་ནས་ལས་དོན་གཞན་རྣམས་ལས་ཏོག་དབྱིབས་གཉན་རིམས་སྔོན་འགོག་དང་ངལ་སེལ་ལས་གཞི་སོགས་ལ་དམིགས་སུ་བཀར་ནས་ཤུགས་སྐྱོན་བཞིན་ཡོད། ལས་དོན་དེ་དག་ལག་བསྟར་ཚགས་ཚུད་ཡོང་སླད་ལས་ཁུངས་ནང་ཚོགས་ཆུང་མང་པོ་ཆ་བགོས་བྱས་ནས་ལས་དོན་སྤེལ་མུས་ཡིན། ང་རང་འཕྲོད་བསྟེན་ལས་ཁུངས་ཀྱི་དྲུང་འཕར་ཞིག་གི་ཐོག་ནས་ལས་དོན་སྔ་ཕྱིར་རང་ནུས་གང་ཡོད་ཀྱིས་འབད་བརྩོན་ལྷོད་མེད་ཞུ་བཞིན་ཡོད། ངས་ལས་དོན་ཁག་གཉིས་ཐོག་འབད་བརྩོན་ཞུ་མུས་ཡིན་ཞིང་། ངས་ཚོགས་ཆུང་ཁག་གཉིས་བརྒྱུད་ནས་ལས་དོན་སྤེལ་བཞིན་ཡོད། ཚོགས་ཆུང་དང་པོ་དེར་ལམ་སྟོན་ཚོགས་ཆུང་ཞུ་བ་དང་། དེའི་ནང་གཙོ་ཆེར་འཕྲོད་བསྟེན་དྲུང་ཆེ་དང་དྲུང་འཕར། ཟུང་དྲུང་བཅས་མི་གསུམ་ལས་གྲུབ་པའི་ཚོགས་ཆུང་དེས་ད་ལྟ་འཕྲོད་བསྟེན་ལས་ཁུངས་ནས་ཏོག་དབྱིབས་གཉན་རིམས་ཀྱི་ལས་དོན་མཇུག་སྐྱོང་ཡོང་ཐབས་གནང་མུས་ཁར། ཚོགས་ཆུང་གཞན་དེ་ལུས་ཟུངས་གསོ་བྱེད་ཀྱི་སྨན་དེ་དག་བོད་མི་གནས་སྡོད་ཀྱི་ས་ཁུལ་ཁག་ཏུ་དུས་ཐོག་ཆད་ལྷག་མེད་པར་མཁོ་སྤྲོད་ཞུ་ཐབས་བྱེད་བཞིན་ཡོད། དེར་ལས་བྱེད་དྲུག་ཆེད་མངགས་བསྐོ་གཞག་གནང་ཡོད།
གསར་འགོད་པས། ཁྱེད་ཀྱིས་ས་གནས་ཁག་ཏུ་ཏོག་དབྱིབས་གཉན་རིམས་ལ་གདོང་ལེན་ཆེད་མཐུན་རྐྱེན་སྦྱར་རྒྱུ་དེ་ཡིན་པ་འདྲ། ས་གནས་ཁག་ཏུ་འགོག་དབྱེ་ཟུར་འཇོག་གི་མཐུན་རྐྱེན་གང་འདྲ་ཡོད་དམ། གལ་ཏེ་ནད་པ་ཛ་དྲག་སྨན་གཏུག་གནང་དགོས་རིགས་བྱུང་ཚེ་ནད་པ་འོར་འདྲེན་གྱི་རླངས་འཁོར་སོགས་གྲ་སྒྲིག་ཇི་ཡོད། ལྷག་པར་ས་གནས་རྒྱ་གར་ལས་བྱེད་པ་ཚོར་འབྲེལ་བ་གནང་སྟངས་དང་ལས་དོན་ཐོག་བཀོད་འདོམས་ཇི་ལྟར་གནང་བཞིན་ཡོད་དམ།
དྲུང་གཞོན་ཉི་མ་རྒྱལ་མཚན་ལགས། ཕྱི་ཟླ་གསུམ་པའི་ཟླ་མཇུག་ཙམ་ནས་ང་ཚོས་ས་གནས་ཁག་ནང་འགོག་དབྱེ་ཟུར་འཇོག་ཁང་གྲ་སྒྲིག་ཇི་ལྟར་གནང་དགོས་པའི་ལམ་སྟོན་ཕུལ་ཟིན། ཕྱི་ཟླ་ ༤ ཚེས་ ༧ ཉིན་ས་གནས་སོ་སོར་ཞལ་པར་ཐོག་འབྲེལ་ཡོད་རྣམས་ལ་གྲ་སྒྲིག་ཇི་ལྟར་ཟིན་མིན་ཐད་གོ་བསྡུར་ཙམ་མ་ཟད། དཔར་དང་བཅས་པ་བསྡུ་རུབ་བྱས་ཡོད། ཁ་ཐོར་གཞིས་ཆགས་གཅིག་ལས་གཞན་ས་གནས་ཁག་ཚང་མའི་ནང་འགོག་དབྱེ་ཟུར་འཇོག་ཆེད་ཁང་པ་གྲ་སྒྲིག་ཞུས་ཟིན།
ད་ལྟའི་ཆར་འགོག་དབྱེ་ཟུར་འཇོག་ཁང་ ༨༣ ཡོད་པ་དང་། ཁང་མིག་ཁྱོན་ ༥༡༩ དང་ཉལ་ཁྲི་གྲངས་ ༡༥༥༦ ཡོད། སྤྱིར་མཐུན་རྐྱེན་དེ་དག་ས་གནས་ནས་གོ་སྒྲིག་གནང་ཡོད་ཀྱང་། གོ་སྒྲིག་གནང་མ་ཐུབ་པའི་རིགས་ལ་དབུས་ནས་མཐུན་རྐྱེན་སྦྱར་ཡོད། ཟུར་འཇོག་བཞུགས་མཁན་ཚོར་དབུས་ནས་ཞལ་ལག་བཟོ་མཁན་མ་བྱན་དང་ཞལ་ལག་མཐུན་རྐྱེན་སྦྱར་ཡོད། ས་གནས་རང་ལ་ལས་བྱེད་ཚོར་འགོག་སྲུང་ཡོ་བྱད་ PPE ༨༦༥ ཙམ་འགྲེམས་སྤེལ་ཞུས་ཡོད། ཁ་རས་སྤུས་ཀ་ལེགས་པ་ N95 དང་ལག་ཤུབས་བཅས་གྲ་སྒྲིག་ཞུས་ཡོད། ནད་པ་འོར་འདྲེན་གྱི་རླངས་འཁོར་རེད། ཁྱབ་ཁོངས་ས་གནས་ཁག་ ༡༦ ལ་དེ་སྔ་ནས་ནད་པ་འོར་འདྲེན་རླངས་འཁོར་ཡོད། གཞིས་ཆགས་ཁག་ ༧ ལ་རྒྱ་གར་སྨན་ཁང་དང་ཆོད་གན་བཞག་ནས་ང་ཚོས་གླ་གཡར་ཐོག་ནད་པ་འོར་འདྲེན་རླངས་འཁོར་གོ་སྒྲིག་ཞུས་ཡོད། གཞིས་ཆགས་ ༡༣ ཙམ་ནང་ལ་ང་ཚོས་ནད་པ་འོར་འདྲེན་རླངས་འཁོར་གྲ་སྒྲིག་ཞུས་ཡོད།
ས་གནས་འགྲིམ་འགྲུལ་ལས་བྱེད་ NODAL Office དང་འབྲེལ་བ་ཞུས་ནས་མ་འོངས་པར་དཀའ་ངལ་ཇི་ལྟར་འཕྲད་ཀྱང་སྐབས་ཐོག་རྒྱབ་སྐྱོར་གནང་དགོས་པའི་རེ་འདུན་ཞུས་ཡོད་པ་མ་ཟད། མི་མང་ཚོས་ཀྱང་འབྲེལ་བ་ཞུ་བདེའི་སླད་འབྲེལ་གཏུག་ཁ་བྱང་བོད་ཀྱི་དྲ་བརྙན་ཚན་པ་དང་གཞུང་འབྲེལ་བོད་ཨིན་དྲ་རྒྱ་སོགས་ནང་བཞག་ཡོད།
གསར་འགོད་པས། ཁྱེད་རང་སྔོན་འགོག་དང་སློབ་གསོའི་ལས་རིམ་དང་འབྲེལ་བ་འདུག ཏོག་དབྱིབས་གཉན་རིམས་སྔོན་འགོག་སླད་ཐོག་མ་རང་ནས་བོད་ལུགས་དང་ཕྱི་ལུགས་གཉིས་ཀྱི་སྒོ་ནས་ལས་འགུལ་སྤེལ་ཐུབ་པ་ལྟར་སྣང་། ལས་གཞི་ཐོག་མར་ཇི་ལྟར་སྤེལ་ཡོད་དམ།
དྲུང་ལས་ཚེ་དབང་དབྱངས་མཚོ་ལགས། ང་ཚོས་ཕྱི་ཟླ་ ༡ ཚེས་ ༢༤ ཙམ་ནས་འཛམ་གླིང་འཕྲོད་བསྟེན་ལྷན་ཁང་གིས་གཏན་འབེབས་གནང་བའི་སྔོན་འགོག་གི་ལམ་སྟོན་མང་དག་ཅིག་དཔར་རིས་ཐོག་ཡོད་པའི་ཡིག་ཆ་སོགས་བོད་བསྒྱུར་ཞུས་ནས་ས་གནས་ཁག་གི་སྨན་ཁང་དང་། དགོན་སྡེ་ཁག མང་ཚོགས་བཅས་ལ་འཕྲོད་བསྟེན་སྔོན་འགོག་གི་སློབ་གསོའི་ལས་འགུལ་ཆ་ཤས་སུ་འགྲེམས་སྤེལ་རྒྱ་ཆེ་ཞུས་ཡོད། འཛམ་གླིང་འཕྲོད་བསྟེན་ལྷན་ཁང་གིས་ནད་ཡམས་དང་འབྲེལ་བའི་ལམ་སྟོན་དུས་བསྟུན་འགྱུར་ལྡོག་རིགས་ཇི་བྱུང་ཚེ་སྐབས་མཚམས་ས་གནས་སོ་སོར་ང་ཚོས་ལམ་སྟོན་ཕུལ་ཡོད། བོད་སྨན་དང་ཕྱི་ལུགས་སྨན་གྱི་ཐོག་ནས་སྔོན་འགོག་གི་ཐབས་ལམ་སྐོར་ལ་བོད་ཀྱི་བརྙན་འཕྲིན་བརྒྱུད་ནས་གོ་སྒྲིག་ཞུས་ཡོད་ཅིང་། སྐབས་དེར་༸སྐུའི་བླ་སྨན་པ་ཚེ་དབང་རྟ་མགྲིན་མཆོག་དང་ཕྱི་ལུགས་སྨན་པ་བརྩོན་འགྲུས་ལགས་གཉིས་ཀྱང་གདན་ཞུ་ཐོག་ནད་ཡམས་སྔོན་འགོག་སོགས་འཕྲོད་བསྟེན་གྱི་ལམ་སྟོན་གཞི་རྒྱ་ཆེ་བ་ཞིག་ཕུལ་ཡོད།།
