ཕྱི་ལོ་ ༢༠༢༠ ཟླ་ ༥ ཚེས་ ༢༩ རེས་གཟའ་པ་སངས།
༄༅། །འདི་གར་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། སྦིར་སྡེ་དགེ་གཞིས་ཆགས་སུ་གནས་སྡོད་དབང་འདུས་རྡོ་རྗེ་ལགས་ནས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྦིར་ས་གནས་སྨན་ཁང་གི་སྨན་ལས་རྣམས་ལ་ཏོག་དབྱིབས་གཉན་རིམས་ ༡༩ ཁྱབ་གདལ་སྔོན་འགོག་ཆེད་གདོང་འགེབས་ཡོ་ཆས་གྲངས་ ༢༠༠ རིན་མེད་ཐོག་ཞལ་འདེབས་གནང་འདུག
དེ་ཡང་ཐོག་མར་ཁོང་གིས་གདོང་འགེབ་ཡོ་བྱད་རྒྱུ་ཆ་ཆུ་མངར་མོ་ལི་ཊར་གཉིས་ཤོང་ཚད་ཀྱི་འགྱིག་སྣོད་བྲེགས་ནས་བཟོས་པ་ཁག་ཅིག་ས་གནས་འཕྲོད་བསྟེན་སྨན་ཁང་། སྦིར། ཅོན་ཏ་ར་དང་ཀངྒ་ར་བཅས་ཀྱི་རྒྱ་གར་གཞུང་སྨན་ཁང་གི་སྨན་ལས་རྣམས་ཀྱི་ཆེད་རིན་མེད་བགོ་འགྲེམ་གནང་ཡོད་ཀྱང་། རྗེས་སུ་ཁོང་གིས་གདོང་འགེབ་ཡོ་ཆས་ཀྱི་རྒྱུ་ཆ་ཡག་ཏུ་བཏང་ནས་ Gatta ཉེན་རྟོག་ལས་ཁང་ལའང་བགོ་འགྲེམ་གནང་འདུག
ཁོང་གི་དེ་ལྟ་བུའི་དང་བླངས་ཀྱི་བྱ་བ་བཟང་པོ་དེར་ད་ཆ་སྦིར་བོད་ཁམས་བཟོ་གཞིས་ནས་མཉམ་རུབ་ཀྱིས་གདོང་འགེབ་ཡོ་ཆས་བཟོས་ཏེ་དྷ་རམ་ས་ལའི་ས་གནས་བདེ་དོན་ལས་ཁུངས། བདེ་ལེགས་སྨན་ཁང་། བོད་ཁྱིམ་སློབ་གྲྭ། བོད་ཀྱི་སྨན་རྩིས་ཁང་། སིམ་ལ་དང་རྒྱ་གར་གཞུང་གི་སྨན་ཁང་ཁག་ལའང་བགོ་འགྲེམ་གནངཐུབ་པ་བྱུང་འདུག།
དེང་སྐབས་ནད་ཡམས་ཁྱབ་གདལ་འགྲོ་བཞིན་པའི་ཛ་དྲག་གི་དུས་སྐབས་སུ་མི་སྒེར་ཞིག་ནས་མ་སྐུལ་དྭང་བླངས་སྒོ་ནས་རྣམ་དཔྱོད་ཀྱི་རྩལ་ལ་བརྟེན་ནས་གསར་གཏོད་ཀྱི་བྱ་ཞག་བསྒྲུབས་པ་ཙམ་མ་ཟད། གཏོང་ཕོད་ཀྱི་བྱ་བ་རླབས་ཆེན་དེར་འཕྲོད་བསྟེན་ལས་ཁུངས་ཀྱི་ངོས་ནས་ཡི་རང་བསྔགས་བརྗོད་ཞུ་རྒྱུ་ཡིན།།
