ཕྱི་ལོ་ ༢༠༢༠ ཟླ་ ༤ ཚེས་ ༩ རེས་གཟའ་ཕུར་བུ།

ཕྱི་ལོ་ ༢༠༡༩ ཟླ་ ༨ ཚེས་ ༢༠ ཉིན།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སྐུ་ཞབས་ཤིབ་རཱཇ་སིངྒ་ཅོ་ཧཱན་ Shivraj Singh Chouhan མཆོག་སླར་ཡང་རྒྱ་གར་དབུས་མདྱ་པྲཱ་ཌེ་ཤི་ Madhya Pradesh མངའ་སྡེའི་སྤྱི་ཁྱབ་བློན་ཆེན་དུ་འོས་འདེམས་བྱུང་བར་འཚམས་འདྲི་གནང་དོན།  སྐུ་ཉིད་སླར་ཡང་མངའ་སྡེའི་སྤྱི་ཁྱབ་བློན་ཆེན་དུ་འོས་འདེམས་བྱུང་བར་ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་དགའ་བསུའི་འཚམས་འདྲི་ཞུ་རྒྱུ་བཞིན་ཡོད།  གཉན་འཕྲང་གི་དུས་སྐབས་འདིར་སྐུ་ཉིད་ལ་སྤྱི་མོས་ཐོག་ནས་མངའ་སྡེའི་སྤྱི་ཁྱབ་བློན་ཆེན་དུ་བདམས་པ་དེས་སྐུ་ཉིད་ཀྱི་དབུ་ཁྲིད་ཀྱི་འཇོན་ཐང་ལ་མང་ཚོགས་ཀྱིས་ཇི་ཙམ་བརྩི་བཀུར་ཞུ་བཞིན་ཡོད་པ་མངོན་ཐུབ། 

རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་ད་ཆ་རྒྱལ་ཁབ་ ༡༨༤ ལྷག་ནང་དུ་ཁྱབ་ཟིན་ཞིང་། རྒྱ་གར་གཞུང་མང་གཉིས་ནས་ཀྱང་ནད་ཡམས་དེར་གདོང་ལེན་གནང་བཞིན་པའི་དུས་སྐབས་འདིར་ང་ཚོ་བོད་མི་བཙན་བྱོལ་བ་ཚོས་སྒོ་ཀུན་ནས་འབད་བརྩོན་དེར་ཆོད་སེམས་བརྟན་པོས་རྒྱབ་སྐྱོར་ཞུས་དང་ཞུ་མུས་ཡིན།  སྐུ་ཉིད་ལ་ལོ་མང་རིང་དབུ་ཁྲིད་ཀྱི་ཉམས་མྱོང་དང་འཇོན་ཐང་ཡོད་སྟབས། མངའ་སྡེའི་མི་མང་ཚོར་ཕན་ཐོགས་རླབས་ཆེན་འབྱུང་ངེས། 

རང་ཉིད་ལ་མཚོན་ན་སྐུ་ཉིད་དེ་སྔ་ཨིན་ཌོར་ Indore ནང་རྒྱལ་སྤྱིའི་ནང་པའི་ལྷན་ཚོགས་སུ་ཕེབས་པ་དང་། དེ་རྗེས་གྲོང་ཁྱེར་པུ་ནེ་རུ་ Pune རྒྱ་གར་རྒྱལ་ཡོངས་སློབ་ཕྲུག་ལྷན་ཚོགས་ཐོག་ཕེབས་སྐབས་མཇལ་རྒྱུའི་གོ་སྐབས་བཟང་པོ་ཐོབ་བྱུང་།  ལྷག་པར་སྔ་ལོར་བོད་མིའི་སྒྲིག་འཛུགས་སུ་ཕེབས་པ་དེ་ནི་ང་ཚོར་ཆེ་མཐོང་ཧ་ཅང་ཐོབ་བྱུང་། དེར་བརྟེན་ད་ཐེངས་གོ་སྐབས་འདི་བརྒྱུད་ངས་སྐུ་ཉིད་མཆོག་གིས་མངའ་སྡེའི་ས་ཁུལ་འདྲ་མིན་ནང་བོད་མི་སུད་ཚོང་བ་ཚོར་མཐུན་འགྱུར་རོགས་རམ་རྒྱ་ཆེ་གནང་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན།  མཐའ་དོན་ནད་ཡམས་འདི་ལས་མགྱོགས་མྱོར་གྲོལ་ཐུབ་པ་དང་།  སྐུ་ཉིད་ཀྱི་འབྱུང་འགྱུར་ལས་དོན་མཐའ་དག་བཀྲ་ཤིས་ལོ་ལེགས་ཡོང་བའི་སྨོན་འདུན་ཤུགས་དྲག་དང་བཅས། །