ཕྱི་ལོ་ ༢༠༢༠ ཟླ་ ༤ ཚེས་ ༡༧ རེས་གཟའ་པ་སངས།

༄༅། །ལྷོ་ཀོ་རི་ཡའི་སྲིད་འཛིན་སྐུ་ཞབས་མུན་ཇེ་ཨིན་ Moon Jae-in མཆོག་གི་ཆབ་སྲིད་ཚོགས་པར་ཉེ་ཆར་རྒྱལ་ཡོངས་གྲོས་ཚོགས་འོས་བསྡུ་ཆེན་མོའི་ནང་རྒྱལ་ཁ་ཐོབ་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་ལ་འཚམས་འདྲི་མཛད་དོན།  སྐུ་ཉིད་ཀྱིས་ཀོ་རི་ཡ་གླིང་ཕྲན་ནང་ཞི་བདེ་བརྟན་ལྷིང་ཡོང་ཐབས་སླད་འབད་བརྩོན་མུ་མཐུད་གནང་བཞིན་པར་ངོས་ཀྱིས་བཅོས་མིན་ཡི་རང་བསྔགས་བརྗོད་ཞུ་རྒྱུ་ཡིན།  མུ་མཐུད་མི་མང་གི་རེ་འདུན་བསྒྲུབ་སླད་སྐུ་ཉིད་ཀྱིས་ངལ་བ་ཁྱད་གསད་གནང་རྒྱུར་ངོས་ལ་ཡིད་ཆེས་ཡོད། ཟླ་ཤས་གོང་ནས་ཏོག་དབྱིབས་གཉན་རིམས་ཁྱབ་གདལ་ཕྱིན་པར་བརྟེན་འཛམ་གླིང་ཡོངས་ལ་སྔར་མ་གྲགས་པའི་དཀའ་ངལ་འཕྲད་བཞིན་ཡོད། དེ་ལྟར་ནའང་སྲིད་འཛིན་མཆོག་གི་དབུ་ཁྲིད་འོག་ཀོ་རི་ཡར་མཚོན་ན་ནད་རིམས་སྔོན་འགོག་ལས་གཞི་མིག་དཔེ་འོས་པ་ཞིག་སྤེལ་དང་སྤེལ་མུས་ལ་ངོས་ཀྱིས་གོ་སྐབས་འདི་བརྒྱུད་འཚམས་འདྲི་ཞུ་རྒྱུ་ཡིན། 

ང་ཚོ་བོད་མིར་མཚོན་ན་ཀོ་རི་ཡའི་ངོ་ཤེས་གྲོགས་པོ་མང་པོ་ཡོད་པ་ཕལ་ཆེར་སྐུ་ཉིད་ཀྱི་མཁྱེན་གསལ་རེད།  ཀོ་རི་ཡར་སྲོལ་རྒྱུན་གྱི་ནང་པ་མང་པོ་ཡོད།  ཉེ་ལམ་ལོ་ཤས་གོང་ནས་བཟུང་ཀོ་རི་ཡའི་ནང་པའི་ཁྲོད་ནས་རྒྱ་གར་ནང་རྟེན་གཞི་བྱས་པའི་བོད་པའི་ནང་ཆོས་སློབ་གཉེར་ཁང་ནང་ཞུགས་མཁན་ཇེ་མང་དུ་འགྲོ་བཞིན་འདུག  ཕྱོགས་མཚུངས་རྒྱ་གར་ནང་གནས་མཇལ་དུ་ཕེབས་མཁན་ཀོ་རི་ཡའི་ནང་པའི་ཆོས་གྲོགས་མང་པོ་ཞིག་ངོས་དང་ཡང་ཡང་ཐུག་གི་ཡོད། ཅེས་བཀའ་སློབ་སྩལ་བ་དང་སྦྲགས།  མཐར་སྲིད་འཛིན་མཆོག་གི་ལས་དོན་གང་ཅིར་བྱ་བ་ལམ་ལྷོངས་ཡོང་བ་དང་མི་མང་གི་མངོན་འདོད་ཡིད་བཞིན་དུ་འགྲུབ་པའི་སྨོན་འདུན་མཛད་པ་བཅས། །

གསུང་འཕྲིན་ངོ་མ་ཨིན་ཡིག་ནས་ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས། ཨིན་ཡིག་ལ་རྩ་འཛིན་ཡོང་བ་ཞུ།