༢༠༢༠ ཟླ་ ༤ ཚེས་ ༢༣ རེས་གཟའ་ལྷག་པ།
༄༅། །ཐེངས་འདིར་རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་ལ་བརྟེན་ནས་འཛམ་གླིང་ས་ཕྱོགས་གང་སར་འགྲོ་འདུག་སྤྱོད་གསུམ་ལ་དམ་བསྒྲགས་ཧ་ཅང་བྱས་དང་བྱེད་མུས་ལ་བརྟེན། མི་མང་ཚོར་དཀའ་ངལ་ཧ་ཅང་འཕྲད་བཞིན་པ་མ་ཟད། ལྷག་པར་རང་རེའི་གནས་ཚང་རྒྱ་གར་འཕགས་ཡུལ་གྱི་ཡུལ་མི་ཉམ་ཐག་ཚོར་ཉིན་རེའི་འཚོ་རྟེན་མེད་པར་གྱུར་སྟབས་བཀྲེས་སྐོམ་གྱིས་མནར་བཞིན་པའི་དུས་སྐབས་འདིར་སྐྱབས་རྗེ་ཀུན་བདེ་གླིང་རྟ་ཚག་རྗེས་དྲུང་རིན་པོ་ཆེ་མཆོག་གིས་བདུན་ཕྲག་སྔོན་མར་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གི་མཚན་ཐོག་ངལ་སེལ་ལས་གཞིར་དམིགས་ནས་ཞལ་འདེབས་ཧིན་སྒོར་འབུམ་ལྔ་གནང་བ་དང་། རྒྱ་གར་གྱི་སྲིད་བློན་མོ་དི་མཆོག་གི་མཚན་ཐོག་ཞལ་འདེབས་ཧིན་སྒོར་འབུམ་འབུམ་གཅིག་གནང་འདུག
ཕྱོགས་མཚུངས་བྱེས་ཀྱི་གདན་ས་ཆེན་པོ་དཔལ་ལྡན་འབྲས་སྤུངས་དགོན་པ་ཆགས་གནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་ཀྱི་ཡུལ་མི་ཉམ་ཐག་ཚོར་ཧིན་སྒོར་འབུམ་དགུའི་ཟ་འབྲུ་འབྲས་དང་གྲོ་ཞིབ། སྣུམ། བྱེ་མ་ཀ་ར། ཇ་དང་འོ་མ་སོགས་སྦྱིན་པ་རྒྱ་ཆེ་གནང་བ་སོགས་མདོར་ན་རིན་པོ་ཆེ་མཆོག་གི་ཀུན་བདེ་གླིང་བླ་བྲང་ནས་རྒྱ་གར་རྒྱལ་ཡོངས་སུ་ངལ་སེལ་ལས་གཞིར་དམིགས་ནས་ཧིན་སྒོར་ས་ཡ་གཉིས་ཙམ་འགྲོ་གྲོན་བཏང་གནང་བ་དང་། གཞན་ཡང་བོད་མིའི་སྒྲིག་འཛུགས་ཀྱིས་ཏོག་དབྱིབས་གཉན་རིམས་སྔོན་འགོག་གི་ལས་གཞི་སྤེལ་བཞིན་པར་གདུང་སེམས་མཉམ་སྐྱེ་མཚོན་སླད་ཧིན་སྒོར་ལྔ་འབུམ་བརྒྱ་དང་བཅུ་གསུམ་ ༥༠༠༡༡༣ ཞལ་འདེབས་སུ་གནང་འདུག ཕྱོགས་མཚུངས་རྒྱ་གར་ལྷོ་ཕྱོགས་དཔལ་ལྡན་སྨད་རྒྱུད་གྲྭ་ཚང་གིས་ས་གནས་ཡུལ་མིར་ངལ་སེལ་ལས་གཞི་སྤེལ་བཞིན་པར་རྒྱབ་སྐྱོར་མཚོན་སླད་ཀུན་བདེ་གླིང་བླ་བྲང་ནས་ཧིན་སྒོར་ ༥༠༠༠༠ ཞལ་འདེབས་སུ་གནང་འདུག་པ་བཅས།།
