ཕྱི་ལོ་ ༢༠༢༠ ཟླ་ ༤ ཚེས་ ༡༧ རེས་གཟའ་པ་སངས། 

༄༅། །འདི་གར་སིམ་ལ་སྤྱི་ཁྱབ་ལས་ཁུངས་ནས་བཏང་གནས་ནང་འཁོད་དོན། བར་ལམ་རྒྱ་ནག་ཝུ་ཧན་གྲོང་ཁྱེར་ནས་བྱུང་བའི་ཏོག་དབྱིབས་གཉན་རིམས་ COVID-19  འཛམ་གླིང་ཡུལ་གྲུ་གང་སར་ཁྱབ་གདལ་དུ་འགྲོ་བཞིན་པའི་ཛ་དྲག་གི་གནས་སྟངས་འོག འཛམ་གླིང་རྒྱལ་ཁབ་སྤྱི་དང་། ལྷག་པར་རང་རིགས་བོད་མི་བཙན་བྱོལ་བ་རྣམས་ཀྱི་གནས་ཡུལ་རྒྱ་གར་དུའང་ནད་ཡམས་དེ་བཞིན་ཁྱབ་གདལ་ཤུགས་ཆེར་འགྲོ་བཞིན་པར་གདང་ལེན་ཆེད། དབུས་དང་མངའ་སྡེའི་གཞུང་ནས་ཛ་དྲག་ངལ་སེལ་ལས་གཞི་རྒྱ་ཁྱབ་ཏུ་སྤེལ་བཞིན་པ་དང་།  སྔོན་འགོག་ལ་དམིགས་སྟེ་ཕྱི་ཟླ་ ༣ ཚེས་ ༢༥ ནས་ཟླ་ ༥ ཚེས་ ༣ བར་རྒྱལ་ཡོངས་ཐེམ་སྤང་དགོས་པའི་བཀའ་རྒྱ་བསྒྲགས་ཡོད། དུས་སྐབས་འདིར་བོད་མིའི་སྒྲིག་འཛུགས་ཀྱི་ལམ་སྟོན་ལྟར་ཧི་མཱ་ཅལ་མངའ་སྡེའི་ནང་ཡུལ་མི་ཉམ་ཐག་དང་ཉིན་གླའི་ཐོག་འཚོ་གནས་བྱེད་བཞིན་པ་རྣམས་ལ་དཀའ་ངལ་མང་དག་ཅིག་འཕྲད་བཞིན་ཡོད་སྟབས། སིམ་ལ་ས་གནས་སྤྱི་ཁྱབ་པས་ལམ་སྟོན་འོག་སིམ་ལ་ཁུལ་སྡོད་ཚོགས་སྡེ་ཁག་དང་། མི་མང་ཡོངས་ནས་གདུང་སེམས་མཉམ་སྐྱེ་མཚོན་སླད་ཕྱི་ལོ་ ༢༠༢༠ ཟླ་ ༤ ཚེས་ ༡༧ ཉིན་སྔ་དྲོ་ཆུ་ཚོད་ ༡༠།༣༠ ཐོག་སིམ་ལ་སྤྱི་ཁྱབ་གཙོས། ས་གནས་འཐུས་ཚོགས་ཀྱི་རྒྱུན་ལས་དང་། རང་འཐུས་ཚོགས་གཙོ་བཅས་ནས་མངའ་སྡེའི་སྤྱི་ཁྱབ་བློན་ཆེན་ཇེ་རཱམ་ཐཱ་ཀུར་ Jai Ram Thakur མཆོག་ལ་ཆེད་བཅར་གྱིས་སྤྱི་ཁྱབ་བློན་ཆེན་གྱི་ངལ་སེལ་ཐེབས་རྩར་ཞལ་འདེབས་ཁྱོན་བསྡོམས་ཧིན་སྒོར་ཆིག་འབུམ་ལྔ་ཁྲི་གསུམ་སྟོང་ལྔ་བརྒྱ་ཐམ་པ་ ༡༥༣,༥༠༠ ཕུལ་ཐུབ་པ་བྱུང་ཡོད་པ་མ་ཟད། རིང་མིན་སིམ་ལ་གནས་འཁོད་བོད་མིའི་ངོས་ནས་ད་ལྟའི་གནས་སྐབས་འདིར་དྭང་བླངས་མཐུན་འགྱུར་ཇི་དགོས་གནང་ཐབས་ཞུ་རྒྱུ་ཡིན་སྐོར་སྙན་སེང་ཞུ་སྐབས་སྤྱི་ཁྱབ་བློན་ཆེན་མཆོག་ནས་ཀྱང་བོད་མི་རྣམས་ཀྱི་སྐྱིད་སྡུག་མཉམ་མྱོང་གནང་བར་དགྱེས་ཚོར་ཆེ་བཞེས་ཀྱིས་མཛའ་བརྩེའི་རྣམ་འགྱུར་དང་བཅས་ཐུགས་རྗེ་ཆེ་གསུང་པ་བཅས། །