ཕྱི་ལོ་ ༢༠༢༠ ཟླ་ ༤ ཚེས་ ༡༤ རེས་གཟའ་མིག་དམར།
༄༅། །ལ་དྭགས་བསོད་ནམས་གླིང་བོད་མིའི་ས་གནས་འགོ་འཛིན་ལས་ཁུངས་ནས་ལ་དྭགས་དབུས་འཛིན་མངའ་ཁུལ་གྱི་འཕྲོད་བསྟེན་དྲུང་ཆེ་རིག་འཛིན་བསམ་འཕེལ་ལགས་སུ་ཏོག་དབྱིབས་གཉན་རིམས་སྔོན་འགོག་གི་ལས་གཞིའི་ཆེད་ཧིན་སྒོར་ལྔ་འབུམ་བདུན་ཁྲི་དྲུག་སྟོང་སུམ་བརྒྱ་དྲུག་ཅུ་རེ་ལྔ་ཐམ་པ་གདུང་སེམས་མཉམ་སྐྱེའི་ཞལ་འདེབས་ཕུལ་འདུག
དེ་ཡང་ཏོག་དབྱིབས་གཉན་རིམས་ཀྱི་དཀའ་ངལ་འཕྲད་བཞིན་པའི་སྐབས་འདིར་ལ་དྭགས་དབུས་འཛིན་མངའ་ཁུལ་གཞུང་དང་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ Ladakh Autonomous Hill Development Council ནས་ལ་དྭགས་ཁུལ་གྱི་བོད་མི་ཚོར་བཟའ་བཅའ་རིགས་ཀྱིས་མཚོན་པའི་མཁོ་ཆས་རིགས་མཁོ་སྤྲོད་གནང་བ་དང་།
དེ་བཞིན་ལ་དྭགས་དབུས་འཛིན་མངའ་ཁུལ་གྱི་སྨན་པ་དང་སྨན་ཞབས་པ་སོགས་ཀྱིས་ནད་པར་ལྟ་རྟོག་གནང་དང་གནང་བཞིན་པར་ལ་སྤྱི་ཚེ་བརྟན་དབང་ཕྱུག་ལགས་ཀྱིས་ཐུགས་རྗེ་ཆེ་ཞུས་ཡོད། ཉིན་གྲངས་ ༢༡ རིང་རྒྱ་གར་རྒྱལ་ཡོངས་སུ་ཐེམ་སྤང་བཀའ་རྒྱ་གསལ་བསྒྲགས་གནང་བ་ནས་བཟུང་ལ་དྭགས་བསོད་ནམས་གླིང་ས་གནས་འགོ་འཛིན་ལས་ཁུངས་ནས་བོད་མི་ཉམ་ཐག་དང་། རྒན་འཁོགས་སོགས་ཁྱོན་མི་གྲངས་ ༢༥ ཙམ་ལ་བཟའ་བཅའ་རིགས་བགོ་འགྲེམས་གནང་ཐུབ་ཡོད་པ་མ་ཟད། མུ་མཐུད་བོད་མི་ཉམ་ཐག་གྲངས་ ༥༥ ལྷག་ཡོད་པ་རྣམས་ལ་བཟའ་བཅའ་རིགས་བགོ་འགྲེམས་གནང་རྒྱུ་ཡིན་པ་བཅས།།
