ཕྱི་ལོ་༢༠༢༠ ཟླ་ ༤ ཚེས་ ༢༡ རེས་གཟའ་མིག་དམར།
༄༅། །འདི་གར་ཧོན་སུར་རབ་རྒྱས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་ཕྱིན་པའི་ཏོག་དབྱིབས་གཉན་རིམས་སྔོན་འགོག་སླད་ཧོན་སུར་རབ་རྒྱས་གླིང་ས་གནས་སུ་ངལ་སེལ་ལས་དོན་ཇི་སྤེལ་གྱི་ལས་བསྡོམས་སྙིང་བསྡུས་ནང་གསལ།
ཕྱི་ལོ་ ༢༠༢༠ ཟླ་དང་པོའི་ནང་རྒྱ་གར་ནང་ཏོག་དབྱིབས་གཉན་རིམས་དང་འབྲེལ་གནས་ཚུལ་ཐོག་མར་བྱུང་སྐབས་ས་གནས་ཡན་ལག་འཕྲོད་བསྟེན་སྨན་ཁང་དང་ཡན་ལག་བོད་ཀྱི་སྨན་རྩིས་ཁང་གཉིས་ནས་མི་མང་ལ་ཏོག་དབྱིབས་གཉན་རིམས་སྐོར་གོ་རྟོགས་སྤེལ་ཡོད། དེ་བཞིན་ལོ་གསར་རྗེས་ཕྱི་རྒྱལ་ནས་ཕེབས་མཁན་ཡོངས་རྫོགས་རང་ཁྱིམ་དུ་ཟུར་སྡོད་བྱས་ནས་འཕྲོད་བསྟེན་སྨན་ཁང་གི་འགན་ཁུར་འོག་དུས་ནས་དུས་སུ་ལུས་པོར་ཚ་བའི་ནད་རྟགས་ཡོད་མེད་བརྟག་དཔྱད་བྱ་རྒྱུས་མཚོན་ནད་རྟགས་གཞན་ཡོད་མེད་སོགས་ལ་འཐུས་ཤོར་མེད་པ་གནང་རྗེས་ཐོ་གཞུང་ནང་སྲིད་ལས་ཁུངས་དང་འཕྲོད་བསྟེན་ལས་ཁུངས་དེ་བཞིན་ས་གནས་ཉེན་རྟོགས་ལས་ཁུངས་ནས་བཀོད་མངགས་ལྟར་དུས་ཐོག་ཕུལ་ཡོད།
དེ་སྔོན་རྡ་སར་ཕྱི་རྒྱལ་ནས་ཕེབས་པའི་བོད་མི་ལོ་ན་བགྲེས་པ་ཞིག་རྡ་རམ་ས་ལའི་སྨན་ཁང་དུ་ཏོག་དབྱིབས་གཉན་རིམས་ཀྱིས་རྐྱེན་བྱས་ཏེ་འདས་གྲོང་སུ་འགྱུར་བ་དང་། ཁོང་དེ་སྔོན་ལྡི་ལི་བོད་སྒར་བསམ་ཡས་གླིང་ཛམ་པ་ལྷ་མགྲོན་ཁང་ནང་བསྡད་ཡོད་པ་ཤེས་རྟོགས་བྱུང་རྗེས་དུས་སྐབས་དེར་འདི་གའི་གཞིས་མི་གཉིས་ཀྱང་མགྲོན་ཁང་དེར་ཞག་སྡོད་བྱུང་བའི་གནས་ཚུལ་ཤེས་རྟོགས་བྱུང་མ་ཐག་ཁོང་གཉིས་ལ་ཞིབ་འཇུག་སྐབས་གཞིས་མི་གཅིག་ལྡི་ལི་ནས་དམག་སྒར་དུ་ཐད་ཀར་ཕེབས་འདུག་པ་དང་། གཞན་དེ་གཞིས་ཆགས་སུ་འབྱོར་མཚམས་ཐེམ་སྤང་གནང་ནས་སྨན་པས་བརྟག་དཔྱད་བྱེད་སྐབས་ན་ཚ་རྩ་བ་ནས་འགོས་མེད་པ་ར་འཕྲོད་བྱུང་།
ནད་ཡམས་གནས་སྟངས་གནས་ཡུལ་རྒྱལ་ཁབ་ནང་ཛ་དྲག་ཆག་མ་ཐག་འབྲེལ་ཡོད་རྫོང་གི་འཕྲོད་བསྟེན་ལྷན་ཁང་ནས་ཆེད་དུ་མི་སྣ་ས་གནས་སུ་བཏང་དེ་གཞིས་མི་ཡོངས་ལ་ནད་ཡམས་དང་འབྲེལ་ཚ་བ་དང་ནད་རྟགས་སོགས་ཡོད་མེད་བརྟག་དཔྱད་གནང་བ་དང༌། ད་སྐབས་ས་གནས་འཕྲོད་བསྟེན་སྨན་ཁང་གི་རྐང་འགན་འོག་ཁྱབ་ཁོངས་གཞིས་མི་ཡོངས་ལ་ཚ་བ་དང་ནད་རྟགས་གཞན་ཡོད་མེད་སོགས་བརྟག་དཔྱད་ཐེངས་གཉིས་པའི་ལས་གཞི་འགྲོ་མུས་ཡིན།
དེ་བཞིན་གཞིས་མི་མང་ཚོགས་ལ་འཕྲོད་བསྟེན་དང་འབྲེལ་ Sanitizer དང་ཁ་རས་སོགས་འཕྲོད་བསྟེན་སྨན་ཁང་བརྒྱུད་མཐུན་རྐྱེན་མི་སྨན་པ་སྦྱོར་བཞིན་ཡོད་པ་དང༌། དམིགས་བསལ་རྒས་གསོ་ཁང་དང་འཕྲོད་བསྟེན་ལས་བྱེད་ཀྱིས་གཙོས་ལས་བྱེད་རྣམས་ལའང་གོང་གསལ་ལྟར་མཐུན་རྐྱེན་སྦྱོར་བཞིན་ཡོད། ད་དུང་འདི་ལས་ནས་ས་གནས་བུད་མེད་ཚེམ་བཟོ་ཁང་བརྒྱུད་ཁ་རས་གྲངས་ ༢༠༠༠ ལྷག་ཁྱབ་ཁོངས་གཞིས་མི་ཡོངས་ལ་བགོ་འགྲེམས་ཞུ་བཞིན་ཡོད།
དེ་སྔོན་རྒྱ་གར་དབུས་གཞུང་ནས་འགྲོ་བསྐྱོད་བཀག་སྡོམ་བཀའ་རྒྱ་མ་ཕེབས་སྔོན་ནས་འདི་ལས་ནས་ཆེད་མངགས་མཉམ་འབྲེལ་ཚོང་ཁང་དང་གཞིས་མི་སྒེར་གྱི་ཚོང་ཁང་ཁག་གཅིག་ལ་འགྲོ་བསྐྱོད་བཀག་སྡོམ་བཀའ་ཕེབས་ཚེ་གཞིས་མི་རྣམས་ལ་ཟ་འབྲུ་སོགས་ཀྱི་དཀའ་ངལ་སེལ་ཆེད་དེ་ནས་གྲ་སྒྲིག་དགོས་རྒྱུ་རེ་སྐུལ་ལྟར་གྲ་སྒྲིག་གནང་སྟབས་དཀའ་ངལ་འཕྲད་མེད།
ནད་ཡམས་དང་འབྲེལ་མ་འོངས་པར་ཛ་དྲག་གནས་སྟངས་བྱུང་ཚེ་ནད་པ་བསྟེན་གཏུགས་སོགས་ཀྱི་ལས་དོན་ཁག་འདི་གའི་སྨན་ཁང་འགན་འཛིན་ནས་ཐད་ཀར་འབྲེལ་ཡོད་རྫོང་གི་སྨན་པ་དང་སྨན་ཁང་ཁག་ལ་འབྲེལ་བ་ཞུ་མུས་དང་། ས་གནས་འགོ་འཛིན་ལས་ཁུངས་ནས་ཀྱང་དགོས་གལ་ནམ་བྱུང་ལ་མཐུན་འགྱུར་ཇི་དགོས་ཞུ་བཞིན་ཡོད། དོགས་གཞི་ཡོད་རིགས་ཟུར་བཀག་ཆེད་དགོན་པ་དང༌། སྨན་ཁང༌། ཁང་མིག་གཞན་བཅས་ནང་མི་གྲངས་ ༢༠ ཙམ་ཤོང་ཚད་གྲ་སྒྲིག་ཡོད། ད་དུང་དགོན་སྡེ་ཁག སྨན་ཁང་དང་རྒས་གསོ་ཁང་བཅས་ལ་བསྡོམས་ PPE Set གྲངས་ ༣༥ གྲ་སྒྲིག་ཡོད།
རྒྱ་གར་དབུས་གཞུང་ནས་ཕྱི་རྒྱལ་རོགས་དངུལ་ལེན་བེད་ཆོག་པའི་ཆོག་མཆན་ཡོད་མཁན་ཚོགས་སྡེ་ཁག་གིས་གཙོས་སྤྱི་སྒེར་གང་རུང་ནས་ད་ལྟའི་ནད་ཡམས་སྔོན་འགོག་སླད་ཞལ་འདེབས་རོགས་རམ་སོགས་གང་ཐུབ་གནང་ཐབས་དགོས་པ་ཕེབས་དོན་བཞིན་རྒྱལ་ཁབ་ཀྱི་སྲིད་བློན་དང་མངའ་སྡེའི་བློན་ཆེན་གཉིས་ཀྱི་ངལ་སེལ་མ་དངུལ་སླད་གཞིས་ལས་ཁང་དང་ཁྱབ་ཁོངས་ཚོགས་སྡེ་ཁག་བཅས་ནས་ཁྱོན་ཧིན་སྒོར་ས་ཡ་གཅིག་དང་བཞི་འབུམ་༼༡༤༠༠༠༠༠།༠༠༽ ཞལ་འདེབས་ཕུལ་ཐུབ་པ་བྱུང་བ་དང༌། དེ་བཞིན་ས་གནས་རྫོང་དཔོན་གཞོན་པའི་ལས་ཁུངས་དང་ MLA སོགས་ནས་འབོད་སྐུལ་ཞུས་པ་བཞིན་ཉེ་འཁོར་ཡུལ་མི་ཉམ་ཐག་ཚོར་ཁྱོན་ཧིན་སྒོར་ས་ཡ་གཅིག་དང་བདུན་འབུམ་སུམ་ཁྲི་བརྒྱད་སྟོང་བདུན་བརྒྱ་སུམ་བཅུ་ ༼༡༧༣༨༧༣༠།༠༠༽ ཡི་ཟ་འབྲུ་དང་ཁ་རས། Sanitizer སོགས་ཀྱི་མཐུན་རྐྱེན་ཞལ་འདེབས་ཕུལ་ཐུབ་པ་བྱུང་ཡོད།
ས་གནས་འགོ་འཛིན་ཁྱབ་ཁོངས་དཔལ་ལྡན་རྒྱུད་སྨད་གྲྭ་ཚང་ནས་ད་ལྟའི་ནད་ཡམས་སྔོན་འགོག་སླད་ཡན་ལག་འཕྲོད་བསྟེན་སྨན་ཁང་ལ་ཧིན་སྒོར་འབུམ་གཅིག་དང་དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་སུ་ཧིན་སྒོར་འབུམ་གསུམ་བཅས་ས་གནས་འགོ་འཛིན་ལས་ཁུངས་བརྒྱུད་ཛ་དྲག་ངལ་སེལ་ཞལ་འདེབས་གནང་བྱུང༌། ས་གནས་འགོ་འཛིན་ལས་ཁུངས་དང་ཡན་ལག་འཕྲོད་བསྟེན་སྨང་ཁང་། དེ་བཞིན་སྤྱི་མི་བཅས་ནས་རྐང་འགན་འོག་གཞིས་གྲོང་ཆ་ཚང་ནང་དུས་ནས་དུས་སུ་འབུ་སྨན་གཏོར་བཞིན་ཡོད།།
