ཕྱི་ལོ་ ༢༠༢༠ ཟླ་ ༤ ཚེས་ ༡༣ རེས་གཟའ་ཟླ་བ།
༄༅། །རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་ལ་བརྟེན་ནས་རྒྱ་གར་རྒྱལ་ཡོངས་ཐེམ་སྤང་བཀའ་རྒྱ་བདུན་ཕྲག་གཉིས་ཕར་འགྱང་གནང་འཆར་ཡོད་པར་བརྟེན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་བོད་མི་བཙན་བྱོལ་བ་རྣམས་ནས་ཡུལ་ཁྲིམས་ལ་མུ་མཐུད་བརྩི་བཀུར་དང་ལེན་གནང་དགོས་པའི་འབོད་སྐུལ་གནང་འདུག འཛམ་གླིང་མཉམ་འབྲེལ་རྒྱལ་ཚོགས་ཀྱི་འཕྲོད་བསྟེན་ལས་ཁུངས་ལ་ཏོག་དབྱིབས་གཉན་རིམ་ཁྱབ་གདལ་ཕྱིན་ཡོད་པ་སྙན་སེང་ཞུས་ནས་ད་བར་ཉིན་གྲངས་ ༡༠༡ ཕྱིན་ཡོད་པ་དང་། རྒྱ་གར་ནང་ལ་མཚོན་ནའང་རྒྱ་གར་སྲིད་བློན་མོ་ཌི་མཆོག་གིས་ཕྱི་ལོ་ ༢༠༢༠ ཟླ་ ༣ ཚེས་ ༢༥ ཉིན་ནས་ཕྱི་ཟླ་ ༤ ཚེས་ ༡༤ བར་ཁྱོན་ཉིན་གྲངས་ ༢༡ རིང་ཐེམ་སྤང་བཀའ་རྒྱ་བསྡམས་ནས་ད་ཆ་བཙང་ལ་ཉེ་ཡང་། ནད་ཡམས་ཁྱབ་གདལ་འགྲོ་རྒྱུའི་ཚད་གཞི་ཧ་ཅང་མྱུར་བའི་ཛ་དྲག་གི་གནས་སྟངས་མུ་མཐུད་ལྷག་ཡོད་སྟབས་རྒྱ་གར་དབུས་སའི་གཞུང་གིས་ཐེམ་སྤང་བཀའ་རྒྱ་བདུན་ཕྲག་གཉིས་རིང་ཕར་འགྱངས་གནང་འཆར་ཡོད་འདུག
འཛམ་གླིང་ཁྱོན་དུ་ཏོག་དབྱིབས་གཉན་རིམ་ཕོག་པ་མི་གྲངས་ས་ཡ་གཅིག་དང་འབུམ་བཞི་བྱུང་ཡོད་ཅིང་། འདས་གྲོངས་སུ་གྱུར་བ་མི་གྲངས་ ༨༥༥༢༢ བྱུང་ཡོད། དེར་བརྟེན་བོད་མི་བཙན་བྱོལ་བ་ཚོས་རྒྱུན་ལྡན་ཆོས་ཕྱོགས་གཙོ་བོར་གྱུར་བའི་མང་ཚོགས་འདུ་འཛོམས་རིགས་གཏན་ནས་མ་སྤེལ་བར་རང་གནས་སུ་བཞུགས་དགོས་པ་དང་། དེ་སྔ་རྒྱལ་ས་ལྡི་ལིའི་མངའ་ཁུལ་ནི་ཛ་མུ་དིན་ནང་ཁ་ཆེའི་ཆོས་པ་ཁག་གཅིག་གིས་གཞུང་གི་བཀའ་རྒྱ་བསྡམས་མིན་ལ་ལྟོས་མེད་འདུ་འཛོམས་བྱས་རྐྱེན་ཏོག་དབྱིནས་གཉན་རིམས་ཁྱབ་གདལ་ཤུགས་ཆེ་བྱུང་ཡོད། ནོར་འཁྲུལ་དེ་ང་ཚོས་བསྐྱར་ལྡབ་བྱེད་མི་རུང་བར་བརྟེན་མི་གཞན་དང་ལྷན་འདུ་འཛོམས་རིགས་སྤངས་དགོས་པ་སྲིད་སྐྱོང་མཆོག་གིས་འབོད་སྐུལ་གནང་འདུག
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ COVID19 ལས་དོན་ཚོགས་ཆུང་གིས་བོད་མི་བཙན་བྱོལ་བའི་ཁྲོད་ཏོག་དབྱིབས་གཉན་རིམས་ཀྱི་གནས་སྟངས་ཇི་བྱུང་གཟའ་འཁོར་གཅིག་གི་རེས་གཟའ་ཕུར་བུ་ནམ་ཡིན་བོད་ཀྱི་བརྙན་འཕྲིན་བརྒྱུད་གསར་འགོད་གསལ་བསྒྲགས་དུས་ཐོག་སྤེལ་རྒྱུ་མ་ཟད། བོད་མིའི་སྒྲིག་འཛུགས་ལས་ཁུངས་ཁག་གི་དྲུང་ཆེས་གཙོས་པའི་ཛ་དྲག་ཚོགས་ཆུང་གི་ཚོགས་མི་རྣམས་ནས་ཏོག་དབྱིབས་གཉན་རིམས་ལ་གདོང་ལེན་ཇེ་དགེ་ཐབས་ལམ་འཚོལ་སླད་ཚོགས་འདུ་ཡང་ཡང་ཚོགས་པ་བརྒྱུད་གནས་སྟངས་ཛ་དྲག་ཇི་བྱུང་རྩད་ཞིབ་གནང་མུས་ཡིན་སྐོར་སྲིད་སྐྱོང་མཆོག་གིས་གསུངས།
གཞན་ཡང་སྲིད་སྐྱོང་མཆོག་གིས་གཞིས་ཆགས་ཁག་གི་ས་འགོས་གཙོས་སྨན་ཞབས་པ་དང་འབྲེལ་ཡོད་ཏོག་དབྱིབས་གཉན་རིམས་ལ་དངོས་ཤུགས་བརྒྱུད་ནས་གདོང་ལེན་གནང་བཞིན་པའི་དབུས་སའི་བོད་མི་ཡོངས་ལ་བསྔགས་བརྗོད་གནང་འདུག ལྷག་པར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མཐུན་འགྱུར་འོག་བརྙན་འཕྲིན་བརྒྱུད་སློབ་ཚན་འདྲ་མིན་སློབ་ཁྲིད་གནང་བའི་ཤེས་ཡོན་གོང་འཕེལ་གྱི་ལས་རིམ་རྩ་ཆེ་དེར་ཡི་རང་བསྔགས་བརྗོད་རྒྱ་ཆེ་གནང་བ་དང་སྦྲགས། ཕ་མ་ཚོས་ཕྲུ་གུར་གོ་སྐབས་ཆུད་ཟོས་སུ་མ་བཏང་བར་ཕྲུ་གུ་ཚོར་དུས་ཐོག་སློབ་ཁྲིད་ཀྱི་གོ་སྐབས་ལོངས་སུ་སྤྱོད་ཐུབ་དགོས་པའི་འབོད་སྐུལ་གནང་འདུག ཕྱོགས་མཚུངས་བོད་མི་གཞོན་སྐྱེས་ལུས་སྦྱོང་དང་སྲོལ་རྒྱུན་སྒོམ་སྒྲུབ་ཉམས་ལེན་བརྒྱུད་ལུས་སེམས་གཉིས་ཀར་བདེ་ཐབས་ལ་འབུངས་དགོས་པ་མ་ཟད། རང་ཁྱིམ་དུ་བཞུགས་རིང་ཕ་མ་གཉིས་ལ་སྲི་ཞུ་བསྒྲུབ་དགོས་པ་དང་། སྤུན་མཆེད་རྣམས་དང་འཆམ་མཐུན་དགོས་པའི་ལམ་སྟོན་གནང་འདུག་པ་བཅས། །
