ཕྱི་ལོ་ ༢༠༢༠ ཟླ་ ༤ ཚེས་ ༡༡ རེས་གཟའ་སྤེན་པ།
༄༅།། གནས་ཚུལ་ཤེས་རྟོགས་བྱུང་གསལ། ཕྱི་ལོ་ ༢༠༢༠ ཟླ་ ༤ ཚེས་ ༨ བོད་ཟླ་ ༢ ཚེས་ ༡༥ ཉིན་དཔལ་ལྡན་འབྲུག་པའི་རྗེ་མཁན་ཁྲི་ཟུར་༸སྐྱབས་རྗེ་ངག་དབང་བསྟན་འཛིན་དོན་གྲུབ་མཆོག་དགུང་གྲངས་ ༩༥ པའི་ཐོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཡོད་འདུག་པ། བསྟན་པ་སྤྱི་དང་ཁྱད་པར་དཔལ་ལྡན་འབྲུག་པའི་བསྟན་པར་གོད་ཆགས་ཆེན་པོ་ཞིག་ཡིན་ན། འདི་ག་ནས་བོད་མི་སེར་སྐྱ་སྤྱིའི་ཚབ་ཞུས་ཏེ་མྱ་ངན་གུས་བཏུད་དང་། ༸སྐྱབས་རྗེ་དམ་པ་གང་དེའི་གྲྭ་ཚང་འདུས་སྤྱི་དང་སྐུ་ཉེ་རྗེས་ཤུལ་རྣམས་ཀྱིས་གཙོས་དཔལ་ལྡན་འབྲུག་པའི་དད་སློབ་སེར་སྐྱ་མང་ཚོགས་ཡོངས་ལ་སྙིང་ནས་ཐུགས་གསོ་ཞུ་རྒྱུ་ཡིན། ༸སྐྱབས་རྗེ་དམ་པ་དེས་བསྟན་པ་རིས་མེད་གསན་བཞེས་མཛད་ཚུལ་ཁྲོད་བོད་དང་རྒྱ་གར་དུ་འབྲུག་པ་ཆོས་མགོན་བརྒྱད་པ་དང་། མཁྱེན་བརྩེ་ཆོས་ཀྱི་བློ་གྲོས། ཞེ་ཆེན་རབ་འབྱམས་ཀུན་བཟང་བསྟན་པའི་ཉི་མ། གཏེར་ཆེན་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་སོགས་རིས་མེད་བསྟན་བདག་བླ་ཆེན་དུ་མ་བསྟེན་ཚུལ་གསལ་བ་དང་། ཕྱི་ལོ་ ༡༩༨༦ ལོར་དཔལ་ལྡན་འབྲུག་པའི་བསྟན་བདག་རྗེ་མཁན་པོ་ཁྲི་རབས་ ༦༨ པའི་མཚན་བཞེས་མཛད་པ། ཕྱི་ལོ་ ༢༠༠༨ ལོར་འབྲུག་རྒྱལ་ཁབ་ཀྱི་གཟེངས་རྟགས་མཐོ་ཤོས་དང་པོ་དེ་འབུལ་བཞེས་མཛད་པ་བཅས་གང་གི་རྗེས་སློབ་ཡོངས་ཀྱི་དད་པའི་གསོས་སུ་གྱུར། མཐའ་དོན། ༸སྐྱབས་རྗེ་དམ་པ་དེ་ཉིད་ཀྱི་ཐུགས་དགོངས་ཟབ་མོ་ཇི་མཆིས་ཡོངས་སུ་རྫོགས་པ་དང་། སླར་ཡང་བསྟན་འགྲོའི་མགོན་དུ་ཡང་སྤྲུལ་ཟླ་གསར་མྱུར་དུ་འཆར་བའི་སྨོན་འདུན་ཞུ་རྒྱུ་བཅས། འཕགས་ཡུལ་དྷ་རམ་ས་ལ་ནས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་ཕྱི་ལོ་ ༢༠༢༠ ཟླ་ ༤ ཚེས་ ༡༠ ལ་སྤེལ།།
