ཕྱི་ལོ་ ༢༠༢༠ ཟླ་ ༤ ཚེས་ ༢༧ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༤ ཚེས་ ༢༥ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ཕེབས་པའི་སྐུའི་འཁྲུངས་སྐར་དུས་ཆེན་དང་བསྟུན། རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ནང་རྟེན་གཞི་བྱས་པའི་བྱེས་ཀྱི་གདན་ས་བཀྲ་ཤིས་ལྷུན་པོས་ཐེམ་སྤང་བཀའ་རྒྱར་བརྩི་སྲུང་ཞུ་ཆེད་དགོན་པའི་ངོ་དེབ་བརྒྱུད་བགྲོ་གླེང་བསྐོང་ཚོགས་གནང་སྐབས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་འགན་འཛིན་སོ་ཕི་རི་ཆ་ཌི་སན་ Sophie Richardson མཆོག ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཨ་རིབ་ཝི་ར་ནི་ MP Arif Virani མཆོག ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་བསྟན་འཛིན་རྡོ་རྗེ་མཆོག རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་མེ་ཐིའུ་མེ་ཁ་ཆི་ Matteo Meccaci མཆོག་བཅས་ཀྱིས་ཀུན་གཟིགས་པཎ་ཆེན་རིན་པོ་ཆེ་མཆོག་རྒྱ་ནག་གཞུང་གི་བཙན་འོག་ནས་མགྱོགས་མྱུར་གློད་བཀྲོལ་གཏོང་དགོས་པའི་རེ་འདུན་ཤུགས་ཆེ་བཏོན་གནང་འདུག་པ་དང་། ལས་རིམ་གཙོ་སྐྱོང་བ་ཨ་རིའི་མང་གཙོ་ཡར་རྒྱས་བསྟི་གནས་ཁང་National Endowment for Democracy གི་ཨེ་ཤི་ཡའི་འབྲེལ་མཐུད་པ་པདྨ་ལགས་ཡིན་འདུག
སྐབས་དེར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་དོན། སྤྱིར་བཏང་བྱས་ནས་དགའ་སྤྲོ་དང་བཅས་འཁྲུངས་སྐར་སྲུང་བརྩི་ཞུ་དགོས་པ་ཞིག་རེད། འོན་ཀྱང་བློ་ཕམ་པ་ཞིག་ལ་དེ་རིང་འཁྲུངས་སྐར་གྱི་ཉིན་མོར་ལྟས་དབང་གིས་ཀུན་གཟིགས་པཎ་ཆེན་རིན་པོ་ཆེ་མཆོག་རྒྱ་ནག་གཞུང་གིས་བཙན་དབང་འོག་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༥ འཁོར་བའི་དུས་ཚིགས་ཀྱང་འཁེལ་བཞིན་ཡོད། རྒྱ་ནག་གཞུང་གིས་མི་ལོ་ཧྲིལ་པོ་ ༢༥ རིང་ཀུན་གཟིགས་པཎ་ཆེན་དགེ་འདུན་ཆོས་ཀྱི་མ་མཆོག་དང་། ཁོང་གི་ནང་མི་དང་བཅས་པའི་གཞི་རྩའི་འགྲོ་བ་མིའི་ཐོབ་ཐང་ལ་མུ་མཐུད་བརྩི་མེད་རྡོག་རོལ་བཏང་དང་གཏོང་བཞིན་ཡོད།
བོད་མིའི་སྒྲིག་འཛུགས་དང་བོད་དོན་རྒྱབ་སྐྱོར་ཚོགས་པ། དེ་བཞིན་བོད་རིགས་སྤྱི་མཐུན་ཚོགས་པ་སོགས་ཀྱིས་ད་བར་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་དུ་བཞུགས་ཡོད་མེད་དང་། སྐུའི་འཕྲོད་བཞེས་ཀྱི་གནས་སྟངས། ལྷག་པར་སློབ་གཉེར་གྱི་གནས་བབ་སོགས་ཇི་འདྲ་ཡིན་མིན་རྩད་ཞིབ་ཆེད་འབད་བརྩོན་ཡོད་དགུ་རྩལ་སྤྲུག་གནང་དང་གནང་བཞིན་ཡོད་ཀྱང་ད་བར་བཟང་ཕྱོགས་ཀྱི་གྲུབ་འབྲས་གང་ཡང་ཐོན་མེད། བོད་ནང་གི་གནས་སྟངས་ཇི་འདྲ་ཡིན་མིན་དེ་ལས་གསལ་རྟོགས་ཐུབ་རྒྱུ་རེད། ཅེས་གསུང་པ་མ་ཟད། པཎ་ཆེན་སྐུ་ཕྲེང་ ༡༠ མཆོག་གིས་རྒྱ་ནག་གཞུང་ལ་ཡིག་འབྲུ་ཁྲི་བདུན་གྱི་ཞུ་ཡིག་གནང་སྟེ་རྒྱ་ནག་དམར་ཤོག་ཚོགས་པས་བོད་ཐོག་འཛིན་པའི་སྲིད་བྱུས་དེ་ལ་བརྟེན་ནས་བོད་ནང་གི་བོད་མིའི་ཆོས་དང་རིག་གཞུང་། སྐད་ཡིག་དང་བཅས་པའི་གནས་སྟངས་ལ་ཉེན་ཚབས་ཆེན་པོ་བཟོ་བཞིན་པའི་སྐོར་སོགས་གསལ་བཤད་གནང་ཡོད།
དེ་ལྟ་བུའི་དཔའ་མཛངས་སྙིང་སྟོབས་ཅན་གྱི་མཛད་རྗེས་ནི་བོད་མི་ཚོས་ནམ་ཡང་རྗེད་ཐབས་མེད། ཞུ་སྙན་དེ་ལྟར་གནང་བར་བརྟེན་ཕྱི་ལོ་ ༡༩༧༧ བར་རྒྱ་ནག་གཞུང་གིས་ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་བཙོན་འཇུག་གི་ཉེས་ཆད་ཚབས་ཆེན་བཀལ་ཡོད། ལོ་རྒྱུས་དེ་དག་འབའ་པ་ཕུན་ཚོགས་དབང་རྒྱལ་གྱི་མི་ཚེའི་ལོ་རྒྱུས་ནང་གསལ་པོར་བཀོད་ཡོད། བོད་མི་གཞོན་སྐྱེས་ཚོས་ཀྱང་ཁོང་གི་མཛད་རྗེས་ཤེས་པའི་ཐོག་ནས་སྐུ་གོང་མའི་བཀའ་དྲིན་བསམ་ཤེས་ཀྱིས་པཎ་ཆེན་སྐུ་ཕྲེང་བཅུ་གཅིག་མཆོག་མགྱོགས་མྱུར་གློད་བཀྲོལ་ཆེད་ལས་འགུལ་སྤེལ་རོགས།
ཨ་རིའི་ཕྱི་སྲིད་ལྷན་ཁང་དང་སྲིད་གཞུང་ཁག་གིས་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གི་བཙན་འོག་ནས་མགྱོགས་མྱུར་གློད་བཀྲོལ་ཆེད་རེ་འདུན་གྱི་ཞུ་ཡིག་དང་བསྒྲགས་གཏམ་སོགས་སྤེལ་བ་བརྒྱུད་ད་བར་རྒྱབ་སྐྱོར་གནང་དང་གནང་མུས་ལ་ཐུགས་རྗེ་ཆེ་ཞུ་རྒྱུ་དང་། ལས་འགུལ་མུ་མཐུད་སྤེལ་རོགས་ཞུ་རྒྱུ་ཡིན། ཞེས་གསུངས།
ཕྱོགས་མཚུངས་གཟིག་རྒྱབ་རིན་པོ་ཆེ་མཆོག་གིས། རྒྱ་ནག་གཞུང་ནས་མི་ལོ་ཧྲིལ་པོ་ ༢༥ སོང་ཡང་ད་བར་རིན་པོ་ཆེ་མཆོག་གང་དུ་ཡོད་མེད་དང་། སྐུའི་འཕྲོད་བཞེས་ཀྱིས་མཚོན་གནས་སྟངས་བཟང་ངན་གང་ཡིན་ཐོག་གསལ་བཤད་རྩ་བ་ནས་མ་བྱས་པར་བརྟེན་ང་ཚོར་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་སེམས་འཚབ་ཤུགས་ཆེ་འདུག ཀུན་གཟིགས་པཎ་ཆེན་རིན་པོ་ཆེ་མཆོག་གི་རྗེས་འབྲང་སློབ་མ་རྣམས་དང་། རྒྱལ་སྤྱིའི་སྲིད་གཞུང་དང་གཞུང་འབྲེལ་མིན་པའི་ཚོགས་པ། དེ་བཞིན་མི་སྒེར་སོགས་ཀྱིས་རྒྱ་ནག་གཞུང་ལ་གནོན་ཤུགས་ཇི་ཙམ་སྤྲད་ཀྱང་ཉན་འཇོག་རྩ་བ་ནས་བྱས་པར། རིན་པོ་ཆེ་མཆོག་གི་གནས་སྟངས་ཡག་པོ་ཡོད། ཅེས་གསལ་བཤད་དེ་ཙམ་ཞིག་དུས་རྟག་ཏུ་མ་ཎི་བགྲངས་བ་ལྟར་བྱས་ནས་ཁུངས་འཁྱོལ་ཐབས་བྱེད་བཞིན་པ་རེད། ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་ནས་ད་བར་མི་ལོ་ཧྲིལ་པོ་ ༢༥ སོང་ཡང་རྒྱ་ནག་གཞུང་གིས་ཁོང་གི་སྐུ་པར་ཚད་ལྡན་ཞིག་ཀྱང་ཕྱིར་བསྒྲགས་བྱེད་མེད། དེ་ལྟ་བུའི་གསང་རྒྱའི་དམ་བསྒྲགས་འོག་རིན་པོ་ཆེ་མཆོག་གནས་བཞིན་ཡོད་སྟབས། ད་ཆ་ང་ཚོའི་བསམ་བློར་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཨེ་ཡོད་ན། སྙམས་པའི་སེམས་འཚབ་སྐྱེ་བཞིན་པ་ཆོས་ཉིད་རེད། རིན་པོ་ཆེ་མཆོག་རྒྱ་ནག་གཞུང་གི་བཙོན་འོག་ནས་གློད་བཀྲོལ་ཐུབ་དགོས་པའི་གནས་སྟངས་དེ་བཞིན་ད་ཆ་ཉིན་རེ་བཞིན་ཛ་དྲག་ཏུ་འགྲོ་བཞིན་ཡོད། ང་ཚོས་རིན་པོ་ཆེ་མཆོག་ལ་བདེན་མཐའ་མ་གསལ་བར་ལས་འགུལ་དུས་ནམ་ཡང་མཚམས་འཇོག་བྱ་རྒྱུ་མིན། ཞེས་སོགས་གསུངས།
དེ་བཞིན་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་འགན་འཛིན་སོ་ཕི་རི་ཆ་ཌི་སན་ Sophie Richardson མཆོག་གིས། རྒྱལ་སྤྱིའི་ཁྲིམས་ཀྱི་གནས་བབ་འོག ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གི་བཙན་འོག་ནས་མི་ལོ་ཧྲིལ་པོ་ ༢༥ རིང་གར་སོང་ཆ་མེད་དུ་གྱུར་བའི་གནས་སྟངས་དེ་ནི་ཆབ་སྲིད་བཙོན་པ་ལོ་ན་ཆུང་ཤོས་ཆགས་ཡོད་ཅིང་། ལྷག་པར་རྒྱལ་སྤྱིའི་ཁྲིམས་འོག་ནས་གར་སོང་ཆ་མེད་དུ་གྱུར་བའི་བཙོན་ཡུན་རིང་ཤོས་མྱོང་མཁན་གྱི་བཙོན་པ་ཞིག་ཆགས་ཡོད་སྟབས། རྒྱ་ནག་གཞུང་གིས་སྲིད་བྱུས་དེ་ནི་མཐའ་ཅིག་ཏུ་ནོར་འཁྲུལ་ཅན་ཞིག་ཡིན། རྒྱ་ནག་གཞུང་གི་བྱེད་བབ་དེ་ལས་རང་འདོད་ཀྱིས་བོད་བརྒྱུད་ནང་བསྟན་ལ་དབང་སྒྱུར་བྱེད་ཐབས་བྱེད་བཞིན་པ་གསལ་པོར་མཚོན་ཐུབ། ལྷག་པར་སྲིད་བྱུས་དེའི་ཉེར་ལེན་ལ་བརྟེན་ནས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་ཙམ་མ་ཟད། རྒྱ་ནག་གཞུང་གིས་ངོས་འཛིན་བྱས་པའི་ཁྱིའུ་རྒྱལ་མཚན་ནོར་བུ་ཟེར་བ་ཁོ་པ་དང་ནང་མི་བཅས་པར་ལུས་སེམས་གཉིས་ལ་དོན་མེད་བརྡབ་གསིག་ཆེན་པོ་བཟོས་པ་དང་། ཆབ་སྲིད་ཀྱི་འཁྲབ་སྟོན་དེའི་འོག་ཉེས་མེད་མི་སེར་དེ་དག་གི་གཞི་རྩའི་འགྲོ་བ་མིའི་ཐོབ་ཐང་ལའང་རྡོག་རོལ་བཏང་ཡོད།
ང་ཚོ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ངོས་ནས་འདས་པའི་མི་ལོ་ ༢༥ རིང་བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་རྒྱ་ནག་གཞུང་གིས་བརྩི་མེད་རྡོག་རོལ་ཇི་ཙམ་བཏང་དང་གཏོང་བཞིན་པས་མཚོན་བོད་མི་འབྲོག་པ་གནས་སྤོ་བྱས་བཅུག་པ། དེ་བཞིན་བོད་མིའི་ཆོས་དད་རང་དབང་ཐད་དམ་བསྒྲགས་སུན་གཙེར་ཧ་ཅང་བཟོ་བཞིན་པ་དེ་དག་གསལ་འདོན་བྱས་དང་བྱེད་མུས་ཡིན། དེར་བརྟེན་དེ་རིང་གི་སྐབས་འདི་བརྒྱུད་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་མཚོན་བོད་མི་ཆབ་སྲིད་བཙོན་པ་ཡོངས་རྫོགས་མགྱོགས་མྱུར་གློད་བཀྲོལ་དགོས་པའི་རེ་འདུན་ཤུགས་ཆེ་འདོན་རྒྱུའི་དུས་སྐབས་ཤིག་ཡིན། ཞེས་གསུངས།
གཞན་ཡང་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཨ་རིབ་ཝི་ར་ནི་ Arif Virani མཆོག་གིས་གསུང་དོན། ཕྱི་ལོ་ ༡༩༩༥ ཟླ་ ༥ པར་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གི་བཙན་འོག་ནས་གར་སོང་ཆ་མེད་དུ་གྱུར་ཡོད་སྟབས། འཛམ་གླིང་ནང་གི་བཙོན་པ་ལོ་ན་ཆུང་ཤོས་དེ་ཆགས་ཡོད། བོད་མིའི་བླ་ན་མེད་པའི་དབུ་ཁྲིད་༸གོང་ས་ཏཱ་ལའི་བླ་མ་མཆོག་གིས་དགེ་འདུན་ཆོས་ཀྱི་ཉི་མ་མཆོག་ལ་པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་མཛད་ནས་ཉིན་གྲངས་གསུམ་ལས་མ་སོང་བར་རྒྱ་ནག་གཞུང་གིས་བཙན་ཁྲིད་བྱས་ཡོད། དུས་སྐབས་དེ་ནས་ད་བར་མི་ལོ་ཧྲིལ་པོ་ ༢༥ རིང་རིན་པོ་ཆེ་མཆོག་གང་དུ་ཡོད་མེད་གནས་སྟངས་རྩ་བ་ནས་ཤེས་རྟོགས་མ་ཐུབ། ད་ཆ་གནས་སྟངས་ཧ་ཅང་ཛ་དྲག་པོ་ཞིག་ཆགས་ཡོད་པ་མ་ཟད། ལྷོ་ཨ་ཕི་རི་ཀའི་སྲིད་འཛིན་ཟུར་པ་ནེལ་སན་མན་ཌེ་ལ་མཆོག་གི་གནས་སྟངས་ལྟར་རྩིས་ཆོག ནེལ་སན་མན་ཌེ་ལ་མཆོག་ལ་ཨིན་ཇིའི་གཞུང་གིས་ལོ་མང་རིང་བཙོན་འཇུག་བྱས་པ་དེས་རྒྱལ་སྤྱིའི་ཐོག་ཨིན་གཞུང་གི་སྲིད་བྱུས་ལ་མིང་རྗེས་ངན་པ་ཆགས་པ་རེད། ཅེས་སོགས་གསུངས།
སྤྱིར་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཨ་རིབ་ཝི་ར་ནི་ Arif Virani མཆོག་གིས་དེ་སྔ་ཕྱི་ལོ་ ༢༠༡༨ ལོར་ཡུལ་དེའི་གྲོས་ཚོགས་ནང་བོད་རང་སྐྱོང་ལྗོངས་ཀྱི་སྐུ་ཚབ་ཏུ་རློམ་པའི་ཚོགས་མི་ཁག་གཅིག་ལ་ཉན་ཞིབ་བྱེད་སྐབས་ཀུན་གཟིགས་པཎ་ཆེན་རིན་པོ་ཆེ་གང་དུ་ཡོད་མེད་དང་། ཁོང་གི་གནས་སྟངས་ཇི་ཡིན་རྒྱ་ནག་གཞུང་གིས་གསལ་བཤད་བྱེད་དགོས་པའི་རེ་འདུན་དང་དྲི་བ་བཏང་གནང་ཡོད་འདུག
ཕྱོགས་མཚུངས་ཁེ་ན་ཌའི་སྲིད་གཞུང་ལ་མཚོན་ན་ཕྱི་ལོ་ ༡༩༩༥ ལོར་རྒྱ་ནག་གཞུང་གིས་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་བཙན་ཁྲིད་བྱས་མ་ཐག་ནས་བཟུང་ད་བར་གོ་སྐབས་ནམ་བྱུང་ལ་རིན་པོ་ཆེ་མཆོག་དང་ནང་མི་རྣམས་གང་དུ་བཞུགས་ཡོད་མེད་དང་། སྐུའི་འཕྲོད་བཞེས་ཀྱི་གནས་སྟངས་གང་འདྲ་ཡོད་མེད། ལྷག་པར་བསླབ་པ་སློབ་གཉེར་གྱི་གནས་སྟངས་གང་འདྲ་ཡོད་མེད་ཀྱི་དྲི་བ་བཏང་དང་གཏོང་མུས་ཡིན་སྐོར་གྲོས་ཚོགས་འཐུས་མི་ཁོང་གིས་གསུངས།
ལྷག་པར་ཕྱི་ལོ་ ༢༠༡༤ ལོར་ཁེ་ན་ཌའི་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་དང་རྒྱལ་ཚོགས་ཀྱི་ཆོད་དད་རང་དབང་ཐོག་དམིགས་བསལ་ཚོགས་མི་དང་བཅས་པར་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་རྟོག་ཞིབ་ཐུབ་སླད་རྒྱ་ནག་གཞུང་ལ་འབོད་སྐུལ་ཞུས་པ་བརྒྱུད་དངོས་སུ་ཁོང་བཀག་ཉར་བྱ་ཡུལ་ས་གནས་སུ་སྐྱོད་ཐབས་བྱེད་དགོས་པ་དང་། རྒྱ་ནག་གཞུང་གིས་བོད་དང་ཤར་ཏུར་ཀི་སི་ཐན་ནང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་དང་གཏོང་བཞིན་པར་སྐྱོན་བརྗོད་ཤུགས་ཆེ་གནང་བ་གྲོས་ཚོགས་འཐུས་མི་མཆོག་གིས་བགྲོ་གླེང་སྐབས་དེར་གསལ་འདོན་གནང་འདུག
གཞན་ཡང་བགྲོ་གླེང་སྐབས་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་བསྟན་འཛིན་རྡོ་རྗེ་མཆོག་གིས་ཉེ་ལམ་རྒྱ་ནག་གཞུང་གིས་རྩ་ཁྲིམས་དོན་ཚན་ ༢༢ ཐོག་བསྐྱར་བཅོས་བྱས་ནས་ཆོས་ལུགས་བླ་སྤྲུལ་འདེམས་སྒྲུག་བྱ་རྒྱུའི་ཐོབ་ཐང་ཡོད་པ་བཟོས་ཤིང་། ཨ་རིའི་གྲོས་ཚོགས་དང་སྲིད་འཛིན་མཆོག་ལ་དེ་སྔ་ཨ་རིའི་སྲིད་འཛིན་ཨོ་བྷ་མ་མཆོག་གི་ལས་ཡུན་རིང་ Magnitsky bill ཞེས་པའི་ཁྲིམས་འཆར་གཏན་འབེབས་གནང་བ་བརྒྱུད་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་མཁན་ཚོར་ཁྲིམས་ཆད་གཏོང་སྲོལ་ཡོད་པ་ལྟར། ཐེངས་འདིར་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་བཙན་ཁྲིད་བྱེད་མཁན་དང་གར་སོང་ཆ་མེད་དུ་གྱུར་བའི་གནས་སྟངས་བཟོ་མཁན་རྒྱ་ནག་འབྲེལ་ཡོད་ལས་བྱེད་སུ་ཡིན་རུང་ཁྲིམས་འཆར་དེའི་འོག་ནས་ཉེས་པ་དགལ་དགོས་པའི་རེ་འདུན་ཤུགས་ཆེ་བཏོན་འདུག
ལྷག་པར་ཁོང་གིས་དེ་སྔ་ཕྱི་ལོ་ ༢༠༡༩ ཟླ་ ༡༠ ནང་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གི་ Sam Brownback མཆོག་བཞུགས་སྒར་དུ་ཕེབས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུས་པ་མ་ཟད། ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པའི་རེ་འདུན་ཤུགས་ཆེ་བཏོན་གནང་བར་ཐུགས་རྗེ་ཆེ་གསུངས།
མཐར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་མེ་ཐིའུ་མེ་ཁ་ཆི་ Matteo Meccaci མཆོག་གིས་གསུང་དོན། རྒྱ་ནག་གཞུང་གིས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་དང་། ཀུན་གཟིགས་པཎ་ཆེན་རིན་པོ་ཆེ་མཆོག་གིས་དབུས་བོད་བརྒྱུད་ནང་བསྟན་གྱི་བླ་སྤྲུལ་རྩད་གཅོད་ཞུ་རྒྱུའི་སྲོལ་རྒྱུན་ལམ་ལུགས་ལ་ཐེ་བྱུས་བྱས་པ་བརྒྱུད་བོད་ལ་ཁྲིམས་འགལ་གྱི་དབང་སྒྱུར་བྱེད་བཞིན་པ་དེར་རྒྱལ་སྤྱིའི་མིག་ལམ་དུ་ཁྲིམས་མཐུན་གྱི་བདག་དབང་ཐོབ་ཐབས་བྱེད་བཞིན་ཡོད་པ་དེ་ནི་འཛམ་གླིང་མི་མང་ས་ཡ་མང་པོར་དངོས་སུ་ཧ་ཅང་ཕན་ཐོགས་ཡོད་པའི་བོད་བརྒྱུད་ནང་བསྟན་གྱི་སྲོལ་རྒྱུན་ལམ་ལུགས་ལ་བརྩི་མེད་བཏང་བ་ཡིན་སྟབས། རྒྱ་ནག་གཞུང་གི་བྱེད་བབ་དེས་བོད་མིའི་ཐུན་མིན་ཆོས་ཕྱོགས་ཀྱི་རིན་ཐང་ལ་བརྩི་མེད་རྡོག་རོལ་བཏང་བ་དང་། བསམ་བཞིན་དུ་བོད་ཀྱི་ཐུན་མིན་རིག་གཞུང་རྩ་མེད་གཏོང་ཐབས་བྱས་པ་ཞིག་རེད། ཅེས་དང་།
དེང་སྐབས་འཛམ་གླིང་ཁྱོན་དུ་ཏོག་དབྱིབས་གཉན་རིམས་ཁྱབ་བརྡལ་བྱུང་བར་བརྟེན་དཀའ་ངལ་མི་ཟད་པ་འཕྲད་བཞིན་པ་དེའང་རྒྱ་ནག་གཞུང་གི་དངོས་ཡོད་དྲང་བདེན་གྱི་གནས་སྟངས་སྦས་བསྐུངས་བྱས་ནས་དུས་རྟག་ཏུ་འཁྱོགས་བཤད་ཁོ་ན་བྱས་པའི་ཉེར་ལེན་ལ་བརྟེན་ནས་བྱུང་བ་ཞིག་ཡིན། བོད་མི་ཚོས་རྒྱ་ནག་གཞུང་གི་དེ་ལྟ་བུའི་བྱེད་བབ་འོག་མི་ལོ་ ༦༠ ལྷག་རིང་དཀའ་སྡུག་མྱངས་ཡོད། རྒྱ་ནག་གཞུང་གི་སྲིད་བྱུས་དེར་དུས་དང་མཚམས་པའི་བསྐྱར་བཅོས་མ་བྱས་ཚེ་རྒྱ་རིགས་ཙམ་མ་ཟད། འཛམ་གླིང་ཁྱོན་ཡོངས་ལའང་གནོད་ཚབས་ཆེན་པོ་བཟོ་ངེས་ཡིན། ཞེས་སོགས་གསུངས།།
