ཕྱི་ལོ་་༢༠༢༠ ཟླ་ ༤ ཚེས་ ༧ རེས་གཟའ་མིག་དམར། 

༄༅། །བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་རྒྱ་གར་གྱི་མདྷ་ཡ་པར་ཌེ་ཤིའི་མངའ་སྡེའི་ Madhya Pradesh སྤྱི་ཁྱབ་བློན་ཆེན་སྐུ་ཞབས་ཤིབ་རཱཇ་སིངྒ་ཅོ་ཧཱན་ Shivraj Singh Chouhan མཆོག་སླར་ཡང་མངའ་སྡེའི་སྤྱི་ཁྱབ་བློན་ཆེན་དུ་བདམས་ཐོན་བྱུང་བར་འཚམས་འདྲིའི་གསུང་འཕྲིན་ཞིག་ཕུལ་བའི་ནང་འཁོད་དོན།
དེ་སྔ་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གིས་སྐུ་ཉིད་མཆོག་ལ་མཇལ་འཕྲད་དང་། ལྷག་པར་ན་ནིང་ལོར་བོད་མི་མང་སྤྱི་འཐུས་ལྷན་ཚོགས་ནས་སྐུ་ཉིད་མཆོག་བོད་མི་མང་སྤྱི་འཐུས་ལྷན་ཚོགས་སུ་སྣེ་ལེན་ཞུ་རྒྱུའི་གོ་སྐབས་བྱུང་བར་དགའ་པོ་བྱུང་། ང་རང་སྒེར་ལ་མཚོན་ནའང་སྐུ་ཉིད་མཆོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ་གདན་ཞུ་དང་ཕན་ཚུན་ཤེས་ཡོན་སྤེལ་རེས་སོགས་ཀྱི་གོ་སྐབས་བྱུང་བར་ཧ་ཅང་དགའ་པོ་བྱུང་། མཇལ་འཕྲད་འདི་དག་གིས་སྐུ་ཉིད་མཆོག་གིས་བོད་དོན་དང་བོད་མི་མང་ལ་སེམས་ཐག་ཉེ་པོ་དང་རྒྱབ་སྐྱོར་གནང་གི་ཡོད་པ་ཁུངས་སྐྱེལ་ར་སྤྲོད་གསལ་པོར་སྟོན་གྱི་ཡོད། དེང་སྐབས་འཛམ་གླིང་ཡོངས་ལ་ཏོག་དབྱིབས་གཉན་རིམས་ཁྱབ་བརྡལ་དུ་འགྲོ་བཞིན་པའི་སྐབས་འདིར། སྐུ་ཉིད་མཆོག་གིས་སོ་སོའི་མངའ་སྡེའི་ནང་ནད་ཡམས་སྔོན་འགོག་གི་ལས་འགུལ་སྤེལ་བཞིན་པར་བསྔགས་བརྗོད་དང་ནད་ཡམས་འདི་ཉིད་འཛམ་གླིང་ནང་གང་མགྱོགས་ཞི་བའི་སྨོན་འདུན་ཞུ།
སྐུ་ཉིད་མཆོག་གི་སྤྱི་ཁྱབ་བློན་ཆེན་གྱི་དུས་ཡུན་གསར་པ་འགོ་འཛུགས་དང་འབྲེལ་སྐུ་ཉིད་མཆོག་ལ་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག་ངས་བོད་གཞིས་བྱེས་གཉིས་ཀྱི་བོད་མི་རྣམས་ཀྱི་ཚབ་ཞུས་ཏེ་རྒྱ་གར་གཞུང་མང་གཉིས་ནས་ད་བར་བོད་དོན་དང་བཙན་བྱོལ་བོད་མི་རྣམས་ལ་འདས་པའི་ལོ་ངོ་ ༦༠ རིང་རྒྱབ་སྐྱོར་གྱིས་མཐུན་འགྱུར་རོགས་རམ་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། སྐུ་ཉིད་མཆོག་གིས་སོ་སོའི་མི་མང་གི་ཆེད་དུ་ཆོད་སེམས་བརྟན་པོའི་སྒོ་ནས་ཞབས་ཞུ་བསྒྲུབས་ཏེ་གྲུབ་འབྲས་གཟེངས་སུ་ཐོན་པ་བྱུང་བར་རྗེས་སུ་ཡི་རངས་ཞུ། སྐུ་ཉིད་ཀྱི་དབུ་ཁྲིད་ལམ་སྟོན་འོག་མ་འོངས་པར་མདྷ་ཡ་པར་ཌེ་ཤིའི་མངའ་སྡེའི་མི་མང་གི་འཚོ་བ་ཡར་རྒྱས་གོང་འཕེལ་དང་སྐུ་ཉིད་ཀྱི་བྱ་གཞག་རྣམས་ལམ་ལྷོངས་ཡོང་བའི་སྨོན་འདུན་དང་བཅས། ཞེས་གསུངས།།