ཕྱི་ལོ་ ༢༠༢༠ ཟླ་ ༤ ཚེས་ ༩ རེས་གཟའ་ཕུར་བུ། 

༄༅། །ཡུ་རོབ་གྲོས་ཚོགས་ཀྱི་གྲོས་ཚོགས་འཐུས་མི་པེ་ཊི་ར་སི་ Petras Auštrevičius མཆོག་དང་། ཨོ་སི་ར་མཆོག  Aušra Maldeikienė  ཧན་ནེ་སི་མཆོག  Hannes Heide ཧྥི་རན་སི་སི་ཁོ་མཆོག Francisco Guerreiro པེ་ཊི་ར་  Petra De Sutter མཆོག་བཅས་ནས་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་གཙོ་འཛིན་དང་ཡུ་རོབ་ལྷན་ཚོགས་ཀྱི་ཚོགས་གཞོན་སྐུ་ཞབས་ཇོ་སིབ་བྷོར་རེལ་Joesp Borrell མཆོག་ལ་ཉེ་བའི་ཆར་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཐད་ལ་ཐེ་བྱུས་བྱ་རྒྱུ་ཡིན་པའི་ཁ་གསལ་བཟོས་ཡོད་སྟབས། ཡུ་རོབ་སྤྱི་མཐུན་ཚོགས་པའི་ངོས་ནས་གནད་དོན་དེའི་སྐོར་ལངས་ཕྱོགས་ཅི་ཞིག་འཛིན་བཞིན་ཡོད་པའི་སྐོར་བཀའ་འདྲི་ཞུས་པར། སྐུ་ཞབས་ཇོ་སིབ་བྷོར་རེལ་མཆོག་གིས་ཕྱི་ལོ་ ༢༠༢༠ ཟླ་ ༤ ཚེས་ ༡ ཉིན་ལན་འདེབས་གནང་དོན། ཡུ་རོབ་སྤྱི་མཐུན་ཚོགས་པའི་ངོས་ནས་གྲངས་ཉུང་མི་རིགས་ཁག་དང་། ལྷག་པར་བོད་དང་ཡུ་གུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་ཐུགས་འཚབ་གནང་གི་ཡོད་པ་མ་ཟད། རྒྱ་ནག་གཞུང་ལ་གྲངས་ཉུང་མི་རིགས་ཁག་དང་ལྷག་པར་བོད་དང་ཡུ་གུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་བརྩི་བཀུར་ཞུ་དགོས་པ་རེད། ཅེས་འབོད་སྐུལ་ཞུས་ཡོད།

དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དང་། རྒྱལ་ཚོགས་ཀྱི་འགྲོ་བ་མིའི་སྤྱི་ཚོགས་དང་། རིག་གཞུང་། བདེ་དོན་ཚོགས་ཆུང་བཅས་ཀྱི་ནང་དུའང་གནད་དོན་དེའི་སྐོར་གླེང་སློང་གནང་ཡོད་པ་མ་ཟད། རྒྱ་ནག་གི་འགོ་ཁྲིད་ཚོ་དང་མཉམ་གནད་དོན་དེའི་སྐོར་གླེང་སློང་གནང་ཡོད། ཅེས་དང་།

ཡུ་རོབ་སྤྱི་མཐུན་ཚོགས་པའི་ངོས་ནས་རྒྱ་ནག་གཞུང་གིས་བོད་ཀྱི་ནང་པའི་ཐུན་མོང་མ་ཡིན་པའི་ཡང་སྲིད་ངོས་འཛིན་ལམ་ལུགས་གཞིར་བཞག་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་པའི་ཡང་སྲིད་གནད་དོན་ཐད་བོད་ཀྱི་ཐུན་མིན་བླ་སྤྲུལ་ངོས་འཛིན་ལམ་ལུགས་ལ་བརྩི་བཀུར་ཞུ་དགོས་པ་དང་། ཡུ་རོབ་སྤྱི་མཐུན་ཚོགས་པའི་ངོས་ནས་མུ་མཐུད་གནད་དོན་འདིའི་སྐོར་གླེང་སློང་གནང་གི་རེད། ཅེས་སོགས་གསུངས།།