ཕྱི་ལོ་ ༢༠༢༠ ཟླ་ ༤ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༤ ཚེས་ ༡༤ རེས་གཟའ་མིག་དམར་སྔ་དྲོ་ཆུ་ཚོད་ ༡༠ ཐོག་རྒྱ་གར་གྱི་སྲིད་བློན་སྐུ་ཞབས་ནརེནྡྲ་མོ་ཌི་མཆོག་གིས་རྒྱ་གར་རྒྱལ་ཡོངས་ཐེམ་སྤང་བཀའ་རྒྱ་ཕར་འགྱང་གནང་བའི་གསལ་བསྒྲགས་སྤེལ་འདུག
དེ་ཡང་རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམས་འགོག་ཆེད་དེ་སྔ་ཕྱི་ཟླ་ ༣ ཚེས་ ༢༥ ནས་ཕྱི་ཟླ་ ༤ ཚེས་ ༡༤ བར་རྒྱ་གར་རྒྱལ་ཡོངས་ཐེམ་སྤང་བཀའ་རྒྱ་བསྡམས་ཟིན་ཡང་། རྒྱ་གར་གཙོ་གྱུར་འཛམ་གླིང་གང་སར་ནད་ཡམས་ཀྱི་ཛ་དྲག་གནས་སྟངས་མུ་མཐུད་ལྷག་སྟབས། ཕྱི་ཟླ་ ༤ ཚེས་ ༡༤ རེས་གཟའ་མིག་དམར་སྔ་དྲོ་ཆུ་ཚོད་ ༡༠ ཐོག་སྲིད་བློན་མོ་ཌི་མཆོག་གིས་བརྙན་འཕྲིན་ཐད་སྲིང་བརྒྱུད་ཕྱི་ཟླ་ ༤ ཚེས་ ༡༥ ནས་ཕྱི་ཟླ་ ༥ ཚེས་ ༣ བར་ཐེམ་སྤང་བཀའ་རྒྱ་ཕར་འགྱང་གནང་བའི་གསལ་བསྒྲགས་སྤེལ་གནང་འདུག རྒྱ་གར་ནང་ལ་མཚོན་ན་ད་བར་ཏོག་དབྱིབས་ནད་པ་མི་གྲངས་ཁྲི་གཅིག་བྱུང་བ་དང་། ནད་ཡམས་དེས་རྐྱེན་བྱས་ནས་མི་གྲངས་ ༣༣༩ འདས་གྲོངས་སུ་གྱུར་ཡོད།
དེ་རིང་སྔ་དྲོར་སྲིད་བློན་མཆོག་གིས་གསུང་པ་ལྟར་ན། འབྱུང་འགྱུར་ཕྱི་ཟླ་ ༤ ཚེས་ ༢༠ ནང་ཚུད་ལ་མངའ་སྡེ་སོ་སོའི་ནང་ནད་ཡམས་ཁྱབ་པའི་ས་ཁུལ་ཁག་ངོས་འཛིན་གྱིས་དམིགས་བསལ་བརྟག་དཔྱད་ནན་པོ་གནང་འཆར་ཡོད་པ་མ་ཟད། ས་ཁུལ་དེ་དག་ངོས་འཛིན་མཚམས་ས་གནས་དེ་དག་ཏུ་ཐེམ་སྤང་བཀའ་རྒྱ་སྔར་མུས་མཇུག་སྐྱོང་གནང་རྒྱུ་ཡིན་ཡང་། ནད་ཡམས་མ་ཁྱབ་པའི་ས་གནས་གཞན་ཁག་ཏུ་གནས་སྟངས་ལ་གཞིགས་པའི་དམ་བསྒྲགས་ཕྲན་བུ་ལྷོད་དུ་གཏོང་འཆར་ཡོད་པ་གསུངས། འོན་ཀྱང་ཕྱི་ཟླ་ ༤ ཚེས་ ༢༠ བར་རྒྱ་གར་རྒྱལ་ཡོངས་ནང་དེ་སྔ་ལྟར་རང་ཁྱིམ་གྱི་ཐེམ་པ་བརྒལ་ནས་མི་སུ་གཅིག་ཕྱི་རོལ་དུ་རང་འཚམ་གྱིས་འཐོན་མི་ཆོག་པའི་བཀའ་རྒྱ་བསྡམས་ཡོད་པ་མཇུག་སྐྱོང་གནང་རྒྱུའི་ཆོད་སེམས་བརྟན་པོ་ཡོད་པ་གསུངས། །
