ཕྱི་ལོ་ ༢༠༢༠ ཟླ་ ༤ ཚེས་ ༣༠ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༤ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་བོད་ཀྱི་བརྙན་འཕྲིན་བརྒྱུད་གསུང་དོན། དེ་སྔ་ཞུས་པ་ལྟར་ཕྱི་ཟླ་ ༥ ཚེས་ ༣ རྗེས་རྒྱ་གར་གྱི་མི་འབོར་ས་ཡ་སུམ་བརྒྱ་ལྷག་ཙམ་ཞིང་ལས་སོགས་ཀྱི་སླད་ཕྱི་ལ་འཐོན་གྱི་ཡོད་སྟབས། ཕན་ཚུན་རྒྱང་ཐག་བཞག་ནས་བསྡད་རྒྱུར་ཧ་ཅང་དཀའ་ངལ་ཆེན་པོ་འཕྲད་ཀྱི་རེད། ཕྱི་ཟླ་ ༥ འདི་ཧ་ཅང་ཚབས་ཆེན་པོ་ཡིན་པར་བརྟེན་བཙན་བྱོལ་བོད་མིའི་གཞིས་ཆགས་དང་། སློབ་གྲྭ་སོགས་སྒོ་ངེས་པར་དུ་བརྒྱག་དགོས། ཕྱི་ཟླ་ ༥ ནང་འཛིན་གྲྭ་ ༡༠ དང་ ༡༢ སློབ་ཕྲུག་རྣམས་ཡིག་རྒྱུགས་ཚར་རྗེས་མུ་མཐུད་སློབ་གྲྭར་བཞུགས་རོགས་ཞུ་རྒྱུ་ཡིན།   

དེ་བཞིན་རྡ་སར་བཞུགས་མཁན་དང་ཕྱི་ནས་ཕེབས་མཁན་ཡིན་ནའང་རེད། ཆེས་ཛ་དྲག་ཡིན་ན་མ་གཏོགས་ཕྱི་ཟླ་ ༥ ནང་མ་ཕེབས་རོགས་ཞེས་ཞུ་རྒྱུ་ཡིན། གལ་ཏེ་བོད་མི་ཞིག་གི་བརྒྱུད་ནས་ནད་ཡམས་བྱུང་བ་ཡིན་ན། རྡ་ས་དང་བོད་མིའི་སྒྲིག་འཛུགས་གོ་བརྒྱག་དགོས་པ་སོགས་ཀྱི་གནས་སྟངས་ཛ་དྲག་ཆགས་ས་རེད།   དེ་ནས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་བཙན་བྱོལ་བོད་མིའི་གཞིས་ཆགས་ཁག་གི་ནང་གྲ་སྒྲིག་ཇི་ལྟར་གནང་དང་གནང་མུས་ཡིན་པའི་སྐོར་གསུང་གི་རེད། གཞན་ཡང་དགོན་སྡེ་ཁག་དང་གཞིས་ཆགས། མི་སྒེར་སོགས་ནས་རྒྱ་གར་ཡུལ་མི་དཀའ་ངལ་ཅན་རྣམས་ལ་སྐམ་ཟས་རིགས་བགོ་འགྲེམས་གནང་བཞིན་འདུག་པར་རྗེས་སུ་ཡི་རང་དང་བསྔགས་བརྗོད་ཡོད། གལ་ཏེ་ཕྱི་ཟླ་ ༥ པའི་ནང་རབ་བྱུང་ན་སྐམ་ཟས་རིགས་རྒྱ་གར་ས་གནས་རྫོང་དཔོན་ལས་ཁུངས་སུ་ཐད་ཀར་བསྐྱལ་ཐུབ་ན་ཡག་པོ་འདུག དེ་མིན་གོ་ནོར་ཐེབས་ཏེ་ཕྱིས་སུ་བོད་མི་ནས་ནད་ཡམས་དེ་འགོས་སོང་ཞེས་པའི་གླེང་སློང་རིགས་བྱུང་བ་ཡིན་ན་ཡག་པོ་མེད་པ་མ་ཟད། བོད་མི་ཞིག་ལ་ནད་ཡམས་དེ་འགོ་ནའང་བོད་པའི་སྤྱི་ཚོགས་ལ་གྱོང་གུད་ཆེན་པོ་འབྱུང་བའི་ཉེན་ཁ་ཡོད་སྟབས། ཚང་མས་ཡིད་གཟབ་ངེས་པར་དུ་བྱེད་དགོས། བཙན་བྱོལ་བོད་མིའི་གཞིས་ཆགས་ཁག་ཏུ་བོད་མི་སུ་འདྲ་ཞིག་ལ་ཏོག་དབྱིབས་གཉན་རིམས་རྐྱེན་པས་འཚོ་བའི་དཀའ་ངལ་སོགས་གང་ཡོད་ཀྱང་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་། གཞིས་ཆགས་སོ་སོའི་འབྲེལ་ཡོད་ས་གནས་འགོ་འཛིན་དང་། སྨན་ཁང་འགན་འཛིན། སྨན་པ། སྨན་ཞབས་པ་སོགས་ཀྱི་འབྲེལ་གཏུག་ཁ་པར་ཨ་གྲངས་བཀོད་ཡོད་པ་དེར་འབྲེལ་བ་བྱེད་དགོས། ཞེས་སོགས་ཀྱི་གསུང་བཤད་གནང་རྗེས་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་གསུང་དོན།

རྒྱ་གར་རྒྱལ་ཡོངས་ནང་ཕྱི་ཟླ་ ༥ ཚེས་ ༣ བར་ཐེམ་སྤང་བཀའ་རྒྱ་ཕར་འགྱང་གནང་ཡོད་པ་དེས་སྤྱི་ཡོངས་ཀྱི་ཆ་ནས་ཕན་ཐོགས་ཧ་ལས་པ་ཡོང་གི་ཡོད་པ་ང་ཚོས་ངོས་འཛིན་ཞུ་བཞིན་ཡོད། རྒྱ་གར་དབུས་གཞུང་གིས་གཙོས་མངའ་སྡེ་གཞུང་དང་བོད་མིའི་སྒྲིག་འཛུགས་ཀྱི་ལམ་སྟོན་སོགས་ལ་བརྟེན་ནས་ཏོག་དབྱིབས་གཉན་རིམས་རྒྱ་གར་ནང་ཁྱབ་བརྡལ་དེ་ཙམ་བྱུང་མེད། ཕྱི་ཟླ་ ༥ ཚེས་ ༣ རྗེས་ལ་ཐེམ་སྤང་བཀའ་རྒྱ་ལྷོད་ཡངས་འགྲོ་སྲིད་པ་རེད། ཐེམ་སྤང་བཀའ་རྒྱ་ལྷོད་ཡངས་བཏང་མིན་ལ་མ་ལྟོས་པར་ང་ཚོའི་ངོས་ནས་ཐེམ་སྤང་བཀའ་རྒྱ་ཕྱི་ཟླ་ ༥ ཆ་ཚང་གནང་ཐུབ་པ་ཡིན་ན་དེས་ཏན་ཏན་ཕན་ཐོགས་ཡོང་ས་རེད།
ཐེམ་སྤང་བཀའ་རྒྱ་ལྷོད་ཡངས་བཏང་བ་ཡིན་ན་བོད་མིའི་གཞིས་ཆགས་ཁག་ཏུ་ཞིང་ཁ་འདེབས་ལས་བྱེད་པར་ཡུལ་མི་གླ་དགོས་ཀྱི་ཡོད་པ་རེད། རྒྱ་གར་གྱི་ཡུལ་མི་ཞིག་བོད་མིའི་ཞིང་ཁ་འདེབས་ལས་བྱས་ནས་ན་བ་ཡིན་ན་བོད་མིའི་སྒྲིག་འཛུགས་ལ་དཀའ་ངལ་འཕྲད་རྒྱུའི་ཉེན་ཁ་ཆེན་པོ་འདུག དེར་བརྟེན་ད་ལྟའི་ཆར་བོད་མིའི་གཞིས་ཆགས་ཁག་མང་པོའི་ནང་དང་བླངས་ཐོག་རྒྱལ་སྒོ་ཟུར་དུ་བཙུགས་ཏེ་ཕྱི་མི་གཞིས་ཆགས་ནང་ལ་གཏོང་གི་མེད་པ་སོགས་ཧ་ལས་པའི་ཚགས་ཚུད་གནང་གི་འདུག   

བོད་མི་ཚོས་སྔོན་འགོག་གི་རིགས་དེ་མུ་མཐུད་གནང་རོགས་གནང་ཞེས་འབོད་སྐུལ་ཞུ་རྒྱུ་ཡིན། གལ་ཏེ་ཕྱི་ཟླ་ ༥ ནང་རྒྱ་གར་རྒྱལ་ཡོངས་ལ་ཏོག་དབྱིབས་གཉན་རིམས་ཛ་དྲག་ཏུ་ཕྱིན་པ་ཡིན་ན་བོད་མིའི་སྒྲིག་འཛུགས་ཀྱི་ངོས་ནས་གྲ་སྒྲིག་ག་རེ་ཡོད་ཅེས་ཞུ་བ་ཡིན་ན། བཀའ་ཤག་གི་ལམ་སྟོན་འོག་ནང་སྲིད་ལས་ཁུངས་ཀྱི་ངོས་ནས་ཁྱབ་ཁོངས་ས་གནས་འགོ་འཛིན་ ༤༥ whatsApp རུ་ཁག་བཟོས་ཡོད། ས་གནས་འགོ་འཛིན་རྣམ་པས་ཉིན་རེ་བཞིན་ས་གནས་ནས་གནས་ཚུལ་གང་བྱུང་བ་ནང་སྲིད་ལས་ཁུངས་ལ་སྙན་སེང་ཞུ་བཞིན་ཡོད།

བོད་མི་རྒན་གཞོན་ཚང་མས་ཁ་ལུད་སྣ་ལུད་གང་སར་མ་གཡུག་རོགས་གནང་། བོད་མིའི་གཞིས་ཆགས་ཁག་གི་ནང་ཏོག་དབྱིབས་གཉན་རིམས་ཀྱི་རྐྱེན་པས་ཛ་དྲག་བྱུང་བ་ཡིན་ན་མཐུན་རྐྱེན་གྲ་སྒྲིག་ཞུས་ཡོད། ད་བར་ས་གནས་འགོ་འཛིན་དང་དགོན་སྡེ་ཁག་ནས་བོད་མི་སྟོང་ཕྲག་གཅིག་ཙམ་དང་། ཡུལ་མི་ཆིག་ཁྲི་ལྷག་ལ་བཟའ་བཅའི་རིགས་རོགས་རམ་གནང་འདུག ས་གནས་འགོ་འཛིན་དང་དགོན་སྡེ་སོགས་ནས་བོད་མི་དང་ཡུལ་མི་ཚོར་བཟའ་བཅའི་རིགས་སྦྱིན་གཏོང་གནང་བཞིན་པའི་སྐབས་བར་ཐག་རིང་ཙམ་གཞག་དགོས། བོད་མི་ཚོའི་ངོས་ནས་རྒྱ་གར་གྱི་སྲིད་བློན་མཆོག་དང་། མངའ་སྡེའི་སྤྱི་ཁྱབ་བློན་ཆེན་མཆོག ས་གནས་རྫོང་དཔོན་མཆོག་བཅས་ཀྱི་མཚན་ཐོག་ཏུ་གདུང་སེམས་མཉམ་སྐྱེའི་ཞལ་འདེབས་ཕོན་ཆེ་ཕུལ་ཡོད། ཅེས་དང་།

གཞན་ཡང་ཉེ་ཆར་བརྒྱུད་ལམ་ཁག་གཅིག་གི་ནང་དངོས་བདེན་མིན་པའི་གནས་ཚུལ་ཁྱབ་སྤེལ་བྱེད་བཞིན་པ་དེར་གསལ་བཤད་དང་། བོད་མིའི་སྒྲིག་འཛུགས་ནང་སྲིད་ལས་ཁུངས་དང་། ཤེས་རིག་ལས་ཁུངས། འཕྲོད་བསྟེན་ལས་ཁུངས་བཅས་ནས་བོད་མི་ཉམ་ཐག་དང་རྒས་འཁོགས་སོགས་ལ་གཟིགས་སྐྱོང་དང་།  སློབ་ཕྲུག་ཚོའི་ཤེས་ཡོན་ཐོག་མཐུན་འགྱུར་རོགས་རམ་གནང་བཞིན་ཡོད་པའི་སྐོར་ངོ་སྤྲོད་ཞིབ་ཕྲ་གནང་ཡོད། །