༢༠༢༠ ཟླ་ ༤ ཚེས་ ༣༠ རེས་གཟའ་ཕུར་བུ།
༄༅། །ཏོག་དབྱིབས་གཉན་རིམས་སྔོན་འགོག་ཆེད་ཐེམ་སྤང་བཀའ་རྒྱ་སྲུང་བརྩི་ཞུ་བཞིན་པའི་སྐབས་འདིར། ཌལ་ཧོར་ས་གནས་འགོ་འཛིན་ལས་ཁུངས་ཀྱི་སྣེ་ཁྲིད་འོག་ས་གནས་བོད་ཀྱི་གཞོན་ནུ་དང་བུད་མེད་ལྷན་ཚོགས། དབུ་མའི་ལམ་གྱི་ལས་འགུལ་ཚོགས་པ། བློ་གསལ་གླིང་སྒྲོལ་མ་ལྷ་ཁང་བཅས་ཀྱིས་མཉམ་རུབ་ཐོག་ནས་ངལ་སེལ་ལས་འགུལ་ཆེད་ཞལ་འདེབས་འདུ་རུབ་ཀྱི་ལས་འགུལ་ཤུགས་ཆེ་སྤེལ་བར། ས་གནས་བོད་མི་དང་ཕྱི་རྒྱལ་གནས་སྡོད་བོད་མི་རྣམས་ཀྱིས་ཞལ་འདེབས་ཕོན་ཆེ་གནང་འདུག
ཞལ་འདེབས་ཧིན་སྒོར་འབུམ་གཅིག་ལྷག་གིས་ཁ་རས་དང་ལག་ཤུབས་སོགས་ནད་ཡམས་སྔོན་འགོག་གི་ཡོ་བྱད་ཉོས་ནས་རྒྱ་གར་ཡུལ་མི་ཉམ་ཐག་རྣམས་ལ་འགོ་འགྲེམས་གནང་འདུག གཞན་ཡང་དབུས་སའི་གཞུང་གཉིས་ཀྱིས་ཏོག་དབྱིགས་གཉན་རིམས་སྔོན་འགོག་ལས་གཞིར་སྔ་ཕྱིར་ལས་འགུལ་ཚགས་ཚུད་སྤེལ་བ་མ་ཟད། ལྷག་པར་སྨན་པ་དང་སྨན་ཞབས་པ། ས་གནས་ཉེན་རྟོག་མི་སྣ་སོགས་ཐད་ཀར་ནད་ཡམས་སྔོན་འགོག་ལས་གཞིར་གདོང་ལེན་གནང་བཞིན་པ་རྣམས་ལ་ཡི་རང་བསྔགས་བརྗོད་དང་ཐུགས་རྗེ་ཆེ་ཞུས་འདུག་པ་བཅས།།
