ཕྱི་ལོ་ ༢༠༢༠ ཟླ་ ༤ ཚེས་ ༢༧ རེས་གཟའ་ཟླ་བ། 

༄༅། །ཕྱི་ལོ་ ༢༠༢༠ ཟླ་ ༤ ཚེས་  ༢༠ ཉིན་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་ཟུར་པ་གྲོང་རེ་ཚང་བློ་བཟང་མཁས་གྲུབ་མཆོག་ཨ་རིའི་ཝ་ཤིང་ཊོན་མངའ་སྡེའི་ཝན་ཀུ་བར་གྲོང་ཁྱེར་གྱི་རང་ཁྱིམ་དུ་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་དམ་པ་དེ་ཉིད་ཀྱི་ཆེད་དུ་ཕྱི་ལོ་ ༢༠༢༠ ཟླ་ ༤ ཚེས་ ༢༧ རེས་གཟའ་ཟླ་བའི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་ལས་བྱེད་རྣམས་ནས་དྲྭ་ལམ་ཐོག་སྐར་མ་ ༤༥ རིང་སྨོན་ལམ་གསུང་འདོན་གནང་ཡོད།  

སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན།  དེ་རིང་གྲོང་རེ་ཚང་བློ་བཟང་མཁས་གྲུབ་དམ་པ་མཆོག་གི་ཆེད་དུ་མཆོད་འབུལ་སྨོན་གསུང་འདོན་སླད་ང་ཚོ་འདིར་འཛོམས་པ་རེད།  རྒྱུན་དུ་ལས་བྱེད་ཚང་མ་ཚང་འཛོམས་ཀྱིས་མཆོད་འབུལ་གནང་སྲོད་ཡོད།  འོན་ཀྱང་ད་ཆ་རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཀྱིས་རྐྱེན་པས་ལས་བྱེད་ཚང་འཛོམས་ཡོང་ཐབས་མེད།  འོན་ཀྱང་བོད་མིའི་སྒྲིག་འཛུགས་ལས་ཁུངས་ཁག་གི་བཀའ་བློན་རྣམ་པ་འདིར་ཕེབས་ཡོད།  དེ་རིང་དམ་པ་ཁོང་གི་བདུན་ཚིགས་དང་པོ་དང་བསྟུན་ལས་བྱེད་རྣམས་ Google Hangout དྲྭ་ལམ་བརྒྱུད་སྨོན་ལམ་གསུང་འདོན་གནང་བཞིན་ཡོད།  

ཕྱོགས་མཚུངས་ཕྱི་ལོ་ ༢༠༢༠ ཟླ་ ༤ ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཟུར་པ་ཀརྨ་དབང་ཕྱུག་ལགས་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག  ཁོང་ཡང་རྒྱུན་ལྡན་སྙུན་གཞི་རྐྱེན་པས་སྐུ་གྲོངས་པ་རེད།   ཏོག་དབྱིབས་གཉན་རིམས་ལ་བརྟེན་ནས་བོད་མི་ཁ་ཤས་འདས་གྲོངས་སུ་གྱུར་བ་རྣམས་ལའང་དེ་རིང་སྨོན་ལམ་གསུང་འདོན་གནང་བ་རེད།  ཚང་མས་ཐུགས་སྨོན་མཚམས་སྦྱོར་ངེས་པར་གནང་རོགས་ཞུ་རྒྱུ་ཡིན།   ཞེས་སོགས་ཀྱི་གསུང་བཤད་གནང་རྗེས་དམ་པ་ཁོང་ལ་གཞུང་འབྲེལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་ཆེད་ཉིན་རྒྱབ་ནས་དབུས་ཀྱི་ལས་ཁུངས་ཁག་ལས་མཚམས་བཞག་ཡོད།

དེ་ཡང་གྲོང་རེ་ཚང་བློ་བཟང་མཁས་གྲུབ་མཆོག་ནི། ཕྱི་ལོ་ ༡༩༣༩ ལོར་ཁམས་བྲག་གཡབ་གྲོང་རེས་ཚང་དུ་འཁྲུངས། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་པ་དང་། ཕྱི་ལོ་ ༡༩༦༥ ཟླ་ ༤ ཚེས་ ༢༣ ཉིིན་གཞུང་ཞབས་སུ་ཞུགས་ནས་ཆོས་དོན་ལྷན་ཁང་གི་ཡིག་འབྲི་དང་། དངུལ་གཉེར། རྩིས་པ་བཅས་ཀྱི་ལས་འགན་བཞེས། ཕྱི་ལོ་ ༡༩༧༣ ཟླ་ ༡ ཚེས་ ༦ ཉིན་གནས་བདུན་པར་གནས་སྤར་གྱིས་ཆོས་དོན་དྲུང་གཞོན་དང་། ཕྱི་ལོ་ ༡༩༧༣ ཟླ་ ༡༡ ཚེས་ ༦ ཉིན་དྲུང་ཆེ་ལས་རོགས་ཀྱི་གནས་རིམ་ཐོག་ཚོགས་དྲུང་གི་ལས་འགན་བཞེས།  ཕྱི་ལོ་ ༡༩༧༥ ཟླ་ ༦ ཚེས་ ༢༡ ཉིན་ནས་གནས་སྐབས་དགོངས་ཞུ་གནང་།

ཕྱི་ལོ་ ༡༩༧༧ ཟླ་ ༣ ཚེས་ ༡༠ གནས་བདུན་པའི་ལས་གནས་ཐོག་ལས་བྱེད་བདག་གཉེར་ཁང་གི་ལས་འགན་བཞེས། ཕྱི་ལོ་ ༡༩༨༣ ཟླ་ ༡ ཚེས་ ༡༧ ནས་གནས་དྲུག་པར་གནས་སྤར་གནང་སྟེ་སྦིར་ནང་ཆེན་གཞིས་འགོའི་ཐུགས་འགན་བཞེས།  ཕྱི་ལོ་ ༡༩༨༦ ཟླ་ ༩ ཚེས་ ༢༩ ནས་དྷ་སའི་བདེ་དོན་དང་བོད་མིའི་མཉམ་ལས་བཟོ་འགོ་གཅིག་ལྕོགས་ཀྱི་ཐུགས་འགན་བཞེས། ཕྱི་ལོ་ ༡༩༩༡ ཟླ་ ༡༡ ཚེས་ ༡ ནས་གནས་རང་འཇགས་ཐོག་ཆོས་རིག་དྲུང་ཆེ་ལས་རོགས་དང་། ཕྱི་ལོ་ ༡༩༩༢ ཟླ་ ༨ ཚེས་ ༡ དྲུང་ཆེ་ལས་འཕར་དང་རྗེས་སུ་དྲུང་ཆེའི་ལས་གནས་ཐོག་བསྐོ་བཞག་གནང་། ཕྱི་ལོ་ ༡༩༩༣ ཟླ་ ༥ ཚེས་ ༣ ནས་ཆོས་རིག་དྲུང་ཆེའི་ལས་འགན་བཞེས་མུས་སྐབས་སྒྲིག་གསལ་ལྟར། ཕྱི་ལོ་ ༡༩༩༨ ཟླ་ ༧ ཚེས་ ༡ ནས་ལོ་གཉིས་བགྲེས་ཡོལ་ཕར་འགྱངས་གནང་སྟེ་མུ་མཐུད་མཛད་འགན་བཞེས། ཕྱི་ལོ་ ༢༠༠༠ ཟླ་ ༧ ཚེས་ ༡ ནས་བགྲེས་ཡོལ་བསྩལ། ཕྱི་ལོ་ ༢༠༠༠ ཟླ ༡༠ ཚེས་ ༡ ཉིན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་མཛད་ཁུར་དམ་འབུལ་གྱིས། ༢༠༠༥ ཟླ་ ༧ ཚེས་ ༡ ཉིན་དགུང་ནའི་བབ་ཀྱིས་བགྲེས་ཡོལ་དུ་ཕེབས་ཡོད། གྲོང་རེ་ཚང་བློ་བཟང་མཁས་གྲུབ་མཆོག་གིས་མི་ལོ་བཞི་བཅུ་ལྷག་རིང་བོད་མིའི་སྒྲིག་འཛུགས་ནང་ཕྱག་ལས་རྒྱ་ཆེ་གནང་ཡོད་པ་བཅས། །