ཕྱི་ལོ་ ༢༠༢༠ ཟླ་ ༣ ཚེས་ ༣༡ རེས་གཟའ་མིག་དམར།
༄༅། ། ཕྱི་ལོ་ ༢༠༢༠ ཟླ་ ༣ ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་ན་རེནྡྲ་མོ་དི་ Shri Narendra Modi མཆོག་ལ་གསུང་འཕྲིན་ཞིག་སྩལ་ཏེ། ཏོག་དབྱིབས་གཉན་རིམས་འཛམ་གླིང་ཡོངས་སུ་ཁྱབ་བརྡལ་ཕྱིན་ཏེ་ད་ལྟ་རྒྱ་གར་ནང་དུའང་ཁྱབ་བཞིན་ཡོད་པས་སྲིད་བློན་མཆོག་གིས་ཉིན་རེ་བཞིན་ཧུར་བརྩོན་ཆེན་པོས་ནད་ཡམས་སྔོན་འགོག་སླད་འབད་བརྩོན་གནང་བཞིན་པར་རྒྱབ་སྐྱོར་ཡོད་ཅེས་གསུངས་ཡོད།
དེ་ཡང་གསུང་འཕྲིན་ནང་འཁོད་དོན། ད་ལྟའི་དཀའ་རྙོག་འདིར་རྒྱལ་སྤྱིའི་སྤྱི་ཚོགས་ནས་གདོང་ལེན་བྱ་དགོས་པའི་གནད་དོན་གལ་ཆེན་པོ་ཞིག་ཡིན། ཞེས་དང་། སྐུ་ཉིད་མཆོག་གིས་ད་ལྟའི་ནད་ཡམས་འདི་སྔོན་འགོག་ཆེད་ཁྱིམ་མཚེས་རྒྱལ་ཁབ་ཨབ་གྷན་ན་སི་ཐན་དང་བྷང་ལ་དེ་ཤི། བལ་ཡུལ། འབྲུག མལ་དིབ་སི། པ་ཀི་སི་ཐན། ཤྲི་ལངྐཱ་སོགས་ཡོངས་གྲགས་སུ་ SAARC ཞེས་པའི་མཐུན་ཚོགས་རྒྱལ་ཁབ་ཁག་དང་ལྷན་ཛ་དྲག་གི་མ་དངུལ་ཆེད་འཛུགས་དང་གནས་ཚུལ་བརྗེ་ལེན། དེ་བཞིན་ཕན་ཚུན་གོ་རྟོགས་སྤེལ་རེས་གནང་བར་རྗེས་སུ་ཡི་རང་ཡོད།
འདི་ལྟ་བུའི་མཉམ་ལས་ཀྱིས་སླད་མར་དཀའ་ངལ་གཞན་སེལ་བ་ལའང་མིག་དཔེར་འོས་པ་ཞིག་ཏུ་མངོན། དེར་བརྟེན་ངོས་ཀྱིས་གདུང་སེམས་མཉམ་སྐྱེ་དང་རྒྱབ་སྐྱོར་མཚོན་ཆེད་དུ་དགའ་ལྡན་ཕོ་བྲང་ཐེབས་རྩ་ནས་སྲིད་བློན་མཆོག་གི་ཐེབས་རྩ་བརྒྱུད་མགོན་མེད་ཉམ་ཐག་ཚོར་ཉིན་རེའི་དགོས་མཁོའི་བཟའ་བཅའ་དང་སྨན་རིགས་སོགས་སུ་འགྲོ་གྲོན་གཏོང་ཆེད་ཞལ་འདེབས་ཕུལ་གྱི་ཡོད། ཅེས་བཀའ་གནང་ཡོད་པ་དང་། གཞན་ཡང་ངོས་ཀྱིས་དགའ་ལྡན་ཕོ་བྲང་གི་ལས་བྱེད་ཡོངས་ནས་ཀྱང་རང་གི་ཉིན་གཅིག་གི་ཕོགས་དངུལ་རྣམས་སྲིད་བློན་མཆོག་གི་ཐེབས་རྩར་འབུལ་རྒྱུ་ཡིན་པའང་བརྗོད་འདོད་བྱུང་།
ངོས་ཀྱིས་དེ་སྔ་བརྗོད་ཟིན་པ་ལྟར། ད་ཐེངས་ནད་ཡམས་སྔོན་འགོག་གི་རྐྱེན་པས་མི་མང་པོ་ཞིག་ལ་དཀའ་ངལ་འཕྲད་ཀྱི་ཡོད་པ་དང་། ལྷག་པར་འཚོ་རྟེན་ངེས་མེད་ཀྱི་ཉམ་ཐག་རྣམས་ལ་དཀའ་ངལ་འཕར་མ་འཕྲད་བཞིན་ཡོད་པ་ཤེས་ཀྱི་ཡོད། སྲིད་བློན་མཆོག་གི་ཐེབས་རྩ་བརྒྱུད་ད་ཐེངས་ནད་ཡམས་སྔོན་འགོག་གི་རྐྱེན་པས་ཛ་དྲག་རོགས་སྐྱོར་དགོས་པའི་ཉམ་ཐག་རྣམས་ཀྱི་དཀའ་ངལ་དངོས་སུ་སེལ་ཐུབ་པའི་རེ་བ་ཡོད།
མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། རྒྱ་གར་གྱི་སྲིད་བློན་མཆོག་གི་བློ་བརྟན་འགྱུར་མེད་ཀྱི་དབུ་ཁྲིད་འོག་ནད་ཡམས་སྔོན་འགོག་ཆེད་ལས་འགུལ་རབ་དང་རིམ་པ་སྤེལ་བཞིན་ཡོད་སྟབས་དེ་དག་གིས་ནུས་པ་ཐོན་པའི་ཡིད་ཆེས་ཡོད། ཅེས་གསུང་འཕྲིན་བསྩལ་འདུག་པ་བཅས། །
