ཕྱི་ལོ་ ༢༠༢༠ ཟླ་ ༣ ཚེས་ ༢ རེས་གཟའ་ཟླ་བ།

༄༅། །ཨིན་ཡུལ་གྱི་རྒྱལ་ས་ལོན་ཊོན་དུ་རྟེན་གཞི་བྱས་པའི་འཛམ་གླིང་གི་ཆེས་རྙིང་ཤོས་གྲས་དང་གྲགས་ཅན་ཝ་ཊི་ཀིན་སི་ Watkins Books ཞེས་པའི་དཔེ་དེབ་ཁང་གིས་འདི་ལོ་ཕྱི་ཟླ་ ༢ ཚེས་ ༢༩ ཉིན་ཕྱི་ལོ་ ༢༠༢༠ ལོའི་འཛམ་གླིང་གི་འགྲོ་བ་མིའི་སེམས་ཁམས་ལ་བཟང་པོའི་ཤུགས་རྐྱེན་ཆེ་ཤོས་སྐྲུན་མཁན་གྱི་མི་སྣ་གྲགས་ཅན་འཚོ་བཞུགས་བརྒྱ་བདམས་པའི་ཁྲོད་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨང་དང་པོར་འདེམས་སྒྲུག་ཞུས་འདུག

དེ་ཡང་ཝ་ཊི་ཀིན་སི་དཔེ་དེབ་ཁང་གི་ལུས་སེམས་སྲོག་གི་བརྙན་དེབ་ Watkins Mind Body Spirit magazine དཔྱིད་ཀའི་འདོན་ཐེངས་ཨང་ ༦༡ ནང་གསལ་བ་ལྟར་ན། དཔེ་དེབ་ཁང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་འཛམ་གླིང་གི་འགྲོ་བ་མིའི་སེམས་ཁམས་ལ་བཟང་པོའི་ཤུགས་རྐྱེན་ཆེས་ཐེབས་མཁན་གྱི་མི་སྣ་ཨང་དང་པོར་འདེམས་སྒྲུག་ཞུས་ཡོད་པ་དང་། ཨང་གཉིས་པ་ཡི་ཤུའི་བླ་ཆེན་བྷོབ་ཧྥི་རན་སི་སི་ Pope Francis མཆོག ཨང་གསུམ་པ་སི་ཝེ་ཌེན་ Sweden གྱི་ཁོར་ཡུག་ལས་འགུལ་བ་གྲགས་ཅན་གྷི་རེ་ཊ་ཐུན་བྷར་གྷི་ Greta Thunberg ལགས་སོགས་འཛམ་གླིང་གི་མི་སྣ་གྲགས་ཅན་བརྒྱ་ཐམ་པ་འདེམས་སྒྲུག་གནང་འདུག ལུས་སེམས་སྲོག་གི་བརྙན་དེབ་ཅེས་པས་ལོ་ལྟར་འཛམ་གླིང་ནང་ཆོས་ཕྱོགས་དང་། ཆབ་སྲིད། རྩོམ་པ་པོ། གློག་བརྙན་བཟོ་སྐྲུན་པ། སྒྱུ་རྩལ་བ་སོགས་འཛམ་གླིང་གི་གྲགས་ཅན་མི་སྣ་བརྒྱ་ཐམ་པ་འདེམས་སྒྲུག་གནང་བཞིན་ཡོད།།