ཕྱི་ལོ་ ༢༠༢༠ ཟླ་ ༣ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༢༠ ཟླ་ ༣ ཚེས་ ༦ ཉིན་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ཡུ་རོབ་བོད་དོན་ཞུ་གཏུག་ལས་བྱེད་རིག་འཛིན་ཆོས་སྒྲོན་ལགས་རྣམ་གཉིས་ཀྱིས་སྦེལ་ཇམ་གྲོས་ཚོགས་ཁང་དུ་གྲོས་ཚོགས་འཐུས་མི་སྐུ་ཞབས་སམ་མུལ་ཁོ་གོ་ལ་ཊི་ Mr. Samuel Cogolati མཆོག་དང་ཐུག་འཕྲད་གནང་ཡོད།
སྐབས་དེར་སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་གྲོས་ཚོགས་འཐུས་མི་སྐུ་ཞབས་སམ་མུལ་ཁོ་གོ་ལ་ཊི་མཆོག་གིས་སྦེལ་ཇམ་གཞུང་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན་དང་བོད་ནང་གི་ཆོས་དད་རང་དབང་སླད་རྒྱབ་སྐྱོར་གནང་དགོས་པའི་འབོད་སྐུལ་གནང་བར་ཐུགས་རྗེ་ཆེ་ཞུས་ཡོད། སྐུ་ཞབས་སམ་མུལ་ཁོ་གོ་ལ་ཊི་མཆོག་གིས་ཀྱང་སྦེལ་ཇམ་གྲོས་ཚོགས་ཁང་དུ་དགོས་གལ་ནམ་བྱུང་ལ་བོད་དོན་ཆེད་རྒྱབ་སྐྱོར་དང་གླེང་སློང་གནང་རྒྱུ་ཡིན་པའི་ཁས་ལེན་གནང་ཡོད།
གཞན་ཡང་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྐུ་ཞབས་སམ་མུལ་ཁོ་གོ་ལ་ཊི་མཆོག་ལ་འདི་ལོའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་འཁྲུངས་སྐར་དུས་ཆེན་ལ་མགྲོན་འབོད་གནང་ཡོད་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། བོད་ནང་ཏོག་དབྱིབས་ནད་དུག་ཁྱབ་གདལ་དུ་འགྲོ་བཞིན་པ། ལོ་ལྔའི་རིང་བསྟུད་མར་བོད་ནི་འཛམ་གླིང་ནང་ཆེས་རང་དབང་མེད་པའི་རྒྱལ་ཁབ་ཨང་གཉིས་པ་ཡིན་པ་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་རང་དབང་ཁང་པས་ཕྱི་ལོ་ ༢༠༢༠ ལོའི་སྙན་ཐོའི་ནང་བཀོད་ཡོད་པ། དེ་བཞིན་བོད་དོན་སྦེལ་ཇམ་གྲོས་ཚོགས་ནང་གླེང་སློང་གནང་དགོས་པ་སོགས་ཀྱི་སྐོར་གསུངས་ཡོད། སྐུ་ཞབས་སམ་མུལ་ཁོ་གོ་ལ་ཊི་མཆོག་གིས་མུ་མཐུད་བོད་དོན་དང་འབྲེལ་བའི་གནད་དོན་སྐོར་གླེང་སློང་གནང་རྒྱུ་ཡིན་པའི་ཞལ་བཞེས་གནང་ཡོད་པ་བཅས།།
