ཕྱི་ལོ་ ༢༠༢༠ ཟླ་ ༣ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༣ ཉིན་དཔལ་ལྡན་བཀའ་ཤག་ནས་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་འཇིགས་མེད་ཚེ་རིང་ལགས་ལྷོ་ཨ་མི་རི་ཀའི་སྐུ་ཚབ་དོན་གཅོད་དུ་བསྐོ་གཞག་བསྩལ་དོན་ལྟར། ཕྱི་ལོ་ ༢༠༢༠ ཟླ་ ༣ ཚེས་ ༣ ཉིན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་སྤྲོད་དཔང་གནང་སྟེ་ལྷོ་ཨ་མི་རི་ཀའི་སྐུ་ཚབ་དོན་གཅོད་གསར་པ་འཇིགས་མེད་ཚེ་རིང་ལགས་དང་སྐུ་ཚབ་དོན་གཅོད་ཟུར་པ་ཚེ་དབང་ཕུན་ཚོགས་ལགས་བཅས་ལྷན་འཛོམས་ཀྱིས་རྩིས་སྤྲོད་རྩིས་ལེན་གྱི་མཛད་སྒོ་སྟབས་བདེ་ཞིག་ཚོགས་ཡོད།
དེ་ཡང་འཇིགས་མེད་ཚེ་རིང་ལགས་ནི། ཕྱི་ལོ་ ༡༩༦༧ ཟླ་ ༣ ཚེས་ ༡ ཉིན་རྒྱ་གར་བྱང་ཕྱོགས་ལ་དྭགས་སུ་སྐྱེས་ཤིང་། ཕྱི་ལོ་ ༢༠༠༥ ཟླ་ ༡ ཚེས་ ༣༡ ནས་ཟུང་འབྲེལ་དྲུང་ཆེའི་གནས་རིམ་ཐོག་ཀམ་པུ་ཌར་ལས་གཞི་ཁག་དང་ཕྱི་དྲིལ་ལས་ཁུངས་ཀྱི་ཟུང་དྲུང་དུ་བསྐོ་གཞག་གནང་། ཕྱི་ལོ་ ༢༠༡༢ ཟླ་ ༢ ཚེས་ ༤ ནས་དྲུང་འཕར་གནས་རིམ་དུ་གནས་སྤར་གནང་ཡོད་པ་དང་། ཕྱི་ལོ་ ༢༠༡༦ ཟླ་ ༨ ཚེས་ ༡ ནས་འོས་བསྡུའི་དྲུང་འཕར་དང་ལས་བྱེད་འདེམས་བསྐོ་ལྷན་ཁང་གི་དྲུང་ཚབ་གཅིག་ལྕོགས་སུ་བསྐོ་གཞག་གནང་། ཕྱི་ལོ་ ༢༠༡༧ ཟླ་ ༥ ཚེས་ ༡༧ ནས་ལས་བྱེད་འདེམས་ལྷན་གྱི་དྲུང་ཆེར་བསྐོ་གཞག་གནང་། ཕྱི་ལོ་ ༢༠༡༩ ཟླ་ ༢ ཚེས་ ༡ ནས་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་དང་འོས་བསྡུ་ལས་ཁང་གི་ལས་འགན་གཅིག་ལྕོགས་གནང་ཡོད་པ་བཅས།།
